ZABURA.
66.
Andunia gbɛ̃ sĩnda pínki, à ayuwii kɛ Dikiria. 
À lɛ̀ sí a tↄ́ gakurikɛ musu, à a táaki lɛ́ à a tↄ́ bo. 
À o Ludanɛ: N yãkɛnanↄn naasi vĩ, n gbãna zↄ̃kↄ̃ↄ dì tó n ibɛrɛnↄ kã natɛ. 
Andunia pínki dì kútɛnnɛ, òdi n táaki lɛ́ ò n tↄ́ bo. 
À mↄ́ à Luda yãkɛnanↄ gwa, yã kũ àdi kɛ bisãsirinↄnɛ naasi vĩ. 
À ísira lì gukori ũ, ò swa bikũ̀ gɛ̀sɛ. Ò pↄnna kɛ a yã musu. 
Àdigↄ̃ kí ble kũ a gbãnao gↄrↄ sĩnda pínki, a wɛ́ dìgↄ̃ kú burinↄa. Sãgbãnadenↄ sún dↄkɛ kãaoro. 
Burinↄ, à ó Luda sáabu kpá, a táakilɛna gↄ̃ dↄ á lɛ́n. 
À ó wɛ̃̀ndi dã̀kpãwɛrɛ, adi tó ó gbá sàtaro. 
Luda, zaakũ n ó lɛ́ n ó gwá, n ó baasa lán andurufuu bà. 
N ó ká kpɛ́siran, n aso tìkisii dìwɛrɛ ó kpɛ. 
N tò ò dìwá lán sↄ̃ bà, ó wɛ́ tɛ́ mà, í dàóla, akũ n su kũoo nnamana kĩnaa. 
Mani su n ↄnn mà sa'opↄ kũ òdi ká tɛ́n à tɛ́ kũ o, mani lɛ́ kũ ma kɛ̀mmanↄ fĩna bo, 
yã kũ à bò ma lɛ́n ma warikɛgↄrↄa. 
Mani sa omma kũ pↄ́ mɛ̀kpananↄ, mani sãkaronↄ kpátannɛ, mani n gbagba kũ zùsanↄ kũ blèkofĩninↄo. 
Ákↄ̃nↄ kũ á Luda vĩna vĩnↄ, à mↄ́ à ma á pínki, mani yã kũ à kɛ̀mɛnɛ oárɛ. 
Ma wiki lɛ̀a, a táakilɛna da ma lɛ́n. 
Tó ma yã vãni dà ma swɛ̃̀n, de Dikiri gì ma yã mai. 
Ama à ma yã mà, akũ à ma aduakɛnaa sì. 
Arubarikademɛ Dikiri ũ, adi gí ma aduakɛna mairo, adi gí gbɛ̃kɛ kɛmɛnɛiro.