ZABURA.
77.
Asafa lɛ̀ɛ. Ma lɛ́ zù Ludai ma a sìsi, ma wiki lɛ̀ Ludaa de à ma yã ma. 
Kũ má kú wari gũn ma Dikiri ki wɛ̀tɛ, ma ↄ sɛ̀ musu gwãani kámmabonaa sari, ma laakari gì kpátɛi. 
Kũ ma laasun tà Luda kĩnaa, akũ ma ã'ã, kũ ma dↄ a yãn, ma gↄ̃ kpam lɛɛkɛɛ. 
N tò ma wɛ́ tɛ̃̀ i'onaa, ma gↄ̃ bídi gũn má dↄ̃ deran ma ò nàro. 
Ma dↄ yã zĩnↄn kũ wɛ̃̀ kũ ò gɛ̃̀tɛnↄ. 
Ma laasunn lɛ̀ ma swɛ̃̀ɛ gũn gwãani, ma a zĩda là mà wɛtɛ mà dↄ̃. 
Ma pì: Dikiri gìwai sãnsãnn yá? A pↄ ni kɛ nna kũoo doroo? 
A gbɛ̃kɛ làka mámmann yá? A yã nigↄ̃ futɛna gↄrↄ sĩnda pínkin yá? 
Ó wɛ̃ndagwana yã sã̀ Ludagun yá? A pↄ fɛ̃̀wái, ani wɛ̃nda kɛwɛrɛ doroo? 
Akũ ma pì: Yã kũ à ũ̀man dí. Luda Musude ↄ bùsawɛrɛ. 
Mani laasun lɛ́ Dikiri yãbonsarɛnↄa, mani dↄ yã kũ à kɛ̀ yãnↄn. 
Mani n daboyãkɛnanↄ laasun lɛ́ pínki, mani n yãzↄ̃kↄ̃kɛnanↄ da ma swɛ̃̀n. 
Luda, n zɛ́ kú adona. Dikiri kpate zↄ̃kↄ̃ mɛ́ à kà lán ó Luda bàa? 
Mↄkↄ̃mmɛ Luda yãbonsarɛkɛri ũ, n n gbãna mↄ̀ burinↄnɛ. 
N n gbɛ̃nↄ sura bà kũ n gã̀sã gbãnao, ókↄ̃nↄ Yakubu kũ Yusufu burinↄ. 
Kũ ísira wɛ́ sìnlɛ Luda, kũ ísira wɛ́ sìnlɛ, akũ à kↄ́tↄ kpà, à yĩ̀gãyĩgã ari a lòkoton. 
Ludambɛ í kↄ̀tɛ, surapatana kĩni dↄ musu, n kànↄ tɛn fã legũpina ũ. 
N pũtãna kĩni dↄ zàga'ĩa gũn, n legũpinaa andunia pù pínki, zĩtɛ kɛ̀ gìri à yĩ̀gãyĩgã. 
N zɛ́ dà ísiran, n gɛ̃ki kɛ̀ í zↄ̃kↄ̃nↄ dagura, odi n gɛ̀sɛgbɛ ero. 
N do n gbɛ̃nↄnɛ arɛ lán sã kpàsaa bà Musa kũ Harunao gãi.