ZABURA.
88.
Ɛzɛra buri Emani lɛ̀ɛ. Dikiri Luda ma Surabari, matɛn wiki lɛ́mma fãnantɛ̃ kũ gwãanio. 
Ǹ tó ma aduakɛna kámma, ǹ sã kpá ma ↄ́ↄdↄnaai. 
Zaakũ yã'ũmmana ma nɛ̀sɛɛ pà, ma wɛ̃̀ndii kú ga lɛ́i. 
Ò ma da gbɛ̃ kũ òtɛn si gyãwãnnnↄ tɛ́, ma gↄ̃ gbãnasaride ũ. 
Ò pã kpàmai ò ma da gɛ̀nↄ tɛ́ lán gbɛ̃ kũ ò wutɛna miran sↄ̀rↄrↄnↄ bà, lán gbɛ̃ kũ ń yã dↄngu doro ń bàka kú kũnworonↄ bà. 
N ma zu wɛ̀ɛ lòkoton ari zĩtɛ tú tↄ̃̀nↄwɛɛ gusiran. 
N pↄfɛ̃ tↄ̃̀ma, a ísↄ̃ dàmala. 
N tò ma gbɛ̃nↄ ma zukũna, n tò ò ye ma kãiro. Ò ma tata, boki kunlo, 
warikɛna ma wɛ́ sira kũ̀. Matɛni n sísi zaa kↄnkↄ ari ↄkↄsi, ma ↄnↄ dↄnanyĩ. 
Gɛ̀nↄn ndì yãbonsarɛ kɛńnɛ yá? Gyãwãndenↄ mɛ́ òdi futɛ ò n sáabu kpá yá? 
Òdi n gbɛ̃kɛ baba mira gũnn yá? Òdi n náanikɛna yã o gyãwãnn yá? 
Ò n daboyãnↄ dↄ̃ gusira gũnn yá? N yãmanakɛnanↄ dↄ̃na kú yãsãnguki gũnn yá? 
Dikiri, matɛn ↄ́ↄ dↄnnɛ, ma aduakɛna kↄnkↄ dì ká n kĩnaa. 
Bↄ́yãi ntɛn gímaii, Dikiri? À kɛ̀ dera n mìkpɛrɛ zùmɛnɛɛ? 
Má kú ga lɛ́i wɛ̃ndawɛ̃nda zaa ma kɛfɛnnakɛgↄrↄa, n yã pãsĩnↄ tↄ̃̀ma, ma gↄ̃ sã̀ii. 
N pↄfɛ̃namai dàmala, n vĩnapↄnↄ ma kakatɛ. 
Ò dàmala lán í bà zaa kↄnkↄ ari ↄkↄsi, ò lìkamai mámmam. 
N tò ma gbɛ̃nↄ kũ ma gbɛ̃nnanↄ ma zukũna, gusira mɛ́ à gↄ̃̀ ma kpàasi ũ.