ZABURA.
91.
Gbɛ̃ kũ à utɛna Luda Musude ↄĩ nigↄ̃ kú Gbãnasĩndapinkide uraai. 
Ani pi Dikirimɛ a zɛki gbãna ũ, a Ludamɛ a utɛki ũ, á a náani vĩ. 
Àkũ mɛ́ ani n sí kariia, ani n sura ba kũ gagagyão. 
Ani n sↄtↄ a pↄtɛn, ĩnigↄ̃ utɛna a orun, a náanikɛna mɛ́ ani n dãkpã lán sɛ̃gbako bà. 
Gwãani karinↄ kũ fãnantɛ̃ kà vĩnlanↄ ń ke vĩna ni n kũro, 
ke gagagyã kũ àdigↄ̃ tɛ́ gusiran ke gyãgɛ̃wɛ̃tɛ kũ àdi ń le fãnantɛ̃ gbãna. 
Bee tó gbɛ̃nↄn wàa sↄↄro tɛn lɛ́tɛ n sarɛ, ke gbɛ̃nↄn dúbu kuri tɛn ga n ↄplai, pↄ́ke ni n lero. 
Ĩni wɛ́ sɛ́ ǹ gwa, ĩni e lákũ òdi wɛ́ tã yãvãnikɛrinↄa nà. 
Tó n Luda Musude kɛ̀ n utɛki ũ, tó n Dikiri kɛ̀ n kúki ũ, 
yã vãni ke ni n lero, kisira ni gɛ̃ n ↄnnlo. 
Zaakũ ani n yã o a malaikanↄnɛ, de ò n dãkpã gu kũ ntɛn gɛ́n pínki. 
Oni n sɛ́ ń ↄĩ de ǹsun gɛ̃̀ sí gbɛ̀ɛaro yãi. 
Ĩni gɛ̀sɛ zɛ músuua kũ káreo, ĩni gɛ̀sɛ pɛ́tɛpɛtɛ sàbooa kũ pitikoo. 
Dikiri pì: Zaakũ à nàmai, mani a bo, zaakũ à ma dↄ̃, mani ↄ kúa. 
Ani ma sísi, mani wea, tó yã nàkaraa, manigↄ̃ kú kãao, mani a sura ba mà a kpe ta. 
Mani a pↄ kɛ nna kũ wɛ̃̀ndi gbã̀nao, mani tó à e lákũ madì gbɛ̃ sura ba nà.