ZABURA.
139.
Dauda lɛ̀ɛ. Dikiri, n ma yã gwàgwa n dↄ̃̀, 
ń ma vutɛna kũ ma futɛnaao dↄ̃, zaa zã̀zã ń ma laasunnↄ dↄ̃. 
Ndì ma táa'ona kũ ma wutɛnaao tàasi ká, n kↄ̃ dↄ̃̀ kũ ma yãnↄ pínki. 
Ari yã gↄ̃ bo ma lɛ́n, Dikiri, ń dↄ̃ sãnsãn. 
Ń likamai kpɛ kũ arɛo, n ↄ kúmala. 
Dↄ̃na bire demɛnɛ daboyã ũmɛ, à demala, ma ↄ̃ndↄ̃ dí káaro. 
Mán mani gɛ́n mà kɛ̃ n Niniaa? Mán mani bàa sí mà gɛ́n mà kuranyĩi? 
Tó ma futɛ ma gɛ musu, ń kú gwe! Tó ma wutɛki kɛ̀ gyãwãn, mↄkↄ̃mmɛ gwe! 
Tó ma futɛ ma gɛ ifãboki kpa, tó ma gɛ vutɛ ísira bara ifãlɛtɛ kpa, 
bee gwemɛ má na n ↄĩ, ĩnigↄ̃ ma kũna kũ n ↄplao. 
Tó ma pì gusira damala, ke gupura kũ à likamai li gwãani ũ, 
gu dìgↄ̃ sirannɛro, gwãani dìgↄ̃ dennɛ lán fãnantɛ̃ bàmɛ, gupura kũ gusirao dìgↄ̃ lɛɛlɛnnɛmɛ. 
Mↄkↄ̃n mɛ́ n ma gũn kɛ̀, n ma í kàsa ma da nɛ̀sɛn. 
Ma n sáabu kɛ̀ kũ ma kɛna naasi vĩ akũsↄ̃ à yãbonsarɛ vĩ. N yãkɛnanↄ dì bo ń sarɛ, má dↄ̃ sãnsãn ma nɛ̀sɛn. 
Gↄrↄ kũ n ma í kàsa nɛ́'isↄↄ gũn, ma wá ke utɛnannɛro. Kũ ma mɛ̀ tɛn li asiri gũn gwe, 
n wɛ́ sì ma nɛ́gbĩnilɛ. Lákũ n ma gↄrↄ dìtɛ nà pínki, a lɛ́ kú n takadan zaade a ke dí naaro. 
Luda, n laasunn bɛ̀ɛrɛ vĩmɛnɛ manamana, a lɛ́ vĩro fá! 
Tó má ye mà naro, ń dasi de bùsu'atɛ̃la, tó ma vu, madìgↄ̃ kú kũnwo ari tera. 
Luda, tó ĩni gbɛ̃ vãninↄ dɛdɛ dé? À gomala, ákↄ̃nↄ gbɛ̃dɛrinↄ! 
N ibɛrɛnↄ dì n yã o kũ nɛ̀sɛ vãnio, n tↄ́ bɛ̀ɛrɛ vĩ n lɛ́nlo. 
Dikiri, madì zã gbɛ̃ kũ ò zã̀ngunↄguroo? Madì gí gbɛ̃ kũ ò fùtɛnyĩnↄ kãi. 
Má yãke vĩńnɛro, se zãngu, madì ń ditɛ ma ibɛrɛnↄ ũmɛ. 
Luda, ǹ ma gwagwa ǹ ma nɛ̀sɛ dↄ̃, ǹ ma yↄ̃ ǹ ma gwa ǹ ma laasun dↄ̃. 
Ǹ gwa tó má laasun vãni ke vĩ, ǹ ma da zɛ́ kũ àdigↄ̃ kun gↄrↄ sĩnda pínkiaa gũn.