ZABURA.
141.
Dauda lɛ̀ɛ. Dikiri, matɛn wiki lɛ́nyĩ, ǹ kɛ likalika, tó ma n sisi, ǹ sã kpá ma yãi. 
Ǹ tó ma aduakɛna ká n kĩnaa lán turaretiti túsukpɛ bà. Ǹ tó ma ↄ dↄna musu gↄ̃ dennɛ sa ↄkↄsi ona ũ. 
Dikiri, ǹ lɛ́sↄ damɛnɛ ma lɛ́nɛ, ǹ tó mà a lɛ́ fↄ̃. 
Ǹsun tó yã vãni ma swɛ̃̀ gátɛro, de màsun kakara kũ yãvãnikɛrinↄ ń yãvãnikɛnaa gũnlo, de màsun ń pↄ́ nnanↄ ble kũńworo. 
Tó gbɛ̃ mana ma lɛ, à gbɛ̃kɛ kɛ̀mɛnɛmɛ! Tó à kpã̀kɛ̃mai, mani gíiro, nísi kũ a kpɛ̃̀oomɛ. Madìgↄ̃ adua kɛ baala'i de gbɛ̃ vãninↄ yãkɛna gboro. 
Tó ò ń gbãnadenↄ kà sĩ̀sĩgororo wɛ̀ɛn, yãvãnikɛrinↄ ni sí kũ ma yã mɛ́ à nna. 
Lákũ òdi yàkaa para a bùru fãkↄ̃a nà, lɛn ń wá nigↄ̃ fãkↄ̃ana ń mira lɛ́a lɛ. 
Dikiri Luda, mↄkↄ̃mmɛ ma wɛ́ dↄnyĩ, ma nanyĩ, ǹsun ma kpá gairo. 
Ǹ ma bo tankutɛ kũ ò kpàkpamɛnɛnↄn, bà kũ yãvãnikɛrinↄ kpàkpamɛnɛnↄ. 
Ǹ tó gbɛ̃ vãninↄ si ń zĩda bàa gũn, makũ sↄ̃ mani gɛ̃tɛ aafia.