ZABURA.
142.
Dauda aduakɛna gↄrↄ kũ à kú gbɛ̀wɛɛn. Matɛn ↄ́ gbãna dↄ Dikirinɛ, matɛn wɛ̃nda wiki lɛ́ Dikiria. 
Matɛni ma yã'ũmmana bↄtɛnɛ, matɛni ma warikɛna gbãnɛ. 
Tó ma nɛ̀sɛɛ yàka manamana, mↄkↄ̃n, ndìgↄ̃ ma gɛ̀sɛsɛna dↄ̃. Ò tankutɛ kpàkpamɛnɛ ma zɛ́n. 
Ǹ wɛ́ sɛ́ ǹ ma ↄpla gwa, gbɛ̃ke dì ma yã daro. Má naki vĩ doro, gbɛ̃ke dì ma aafiaa gbɛkaro. 
Dikiri, matɛn wiki lɛ́mma ma pì: Mↄkↄ̃mmɛ ma utɛki ũ, mↄkↄ̃mmɛ ma baka ũ andunian. 
Ǹ sã kpá ma wikilɛnaai, zaakũ ma gↄ̃ múkumukumɛ. Ǹ ma sí gbɛ̃ kũ òtɛn pɛ́manↄa, zaakũ ń gbãna demala. 
Ǹ ma bo kagura díkĩnan, de mà n tↄ́ bo, gbasa gbɛ̃ mananↄ likamai kũ n yã mana kɛ̀mɛnɛ yãi.