ZABURA.
143.
Dauda lɛ̀ɛ. Dikiri, ǹ ma aduakɛna sí, ǹ sã kpá ma wɛ̃nda wikii, ǹ wema n náani kũ n manao yãi. 
Ǹsun yãkpatɛ kɛ kũ makũ n zↄ̀bleriioro, zaakũ gbɛ̃ke taari sari n kĩnaaro. 
Ma ibɛrɛ pɛ̀tɛmai à ma nɛ, à tò má kú gusiran lán gbɛ̃ kũ à gà zaa gìkɛnaa bà. 
Akũ ma nɛ̀sɛɛ yàka manamana, ma sↄ̃pɛ̀tɛ vãni. 
Yã zĩzĩnↄ dↄ̀magu, madì laasun lɛ́ n zĩkɛnanↄa, madì n yãkɛnanↄ da. 
Ma a ↄ dↄnyĩ, madì n ni dɛ lán gukori dì í ni dɛ nà. 
Ǹ wema likalika Dikiri, ma gbãna làka. Ǹsun mìkpɛrɛ zumɛnɛro, de màsun gↄ̃ lán gbɛ̃ kũ ò sì gyãwãnnↄ bàro. 
Ǹ n gbɛ̃kɛ mↄmɛnɛ kↄnkↄ, zaakũ mↄkↄ̃mmɛ má n náani vĩ. Ǹ ma da zɛ́ kũ à de mà sɛ́a, zaakũ mↄkↄ̃mmɛ ma a swɛ̃̀ɛ kpàmma. 
Ǹ ma sí ma ibɛrɛnↄa, Dikiri, mↄkↄ̃mmɛ ma nanyĩ. 
Mↄkↄ̃mmɛ ma Luda ũ, ǹ n pↄyenyĩna yã damɛnɛ. Ǹ tó n Nini mana domɛnɛ arɛ gusaran. 
Ǹ ma wɛ̃̀ndi dãkpã n tↄ́ yãi, Dikiri, ǹ ma bo yã'ũmmanaa gũn n mana yãi. 
Ǹ ma ibɛrɛnↄ láka n gbɛ̃kɛ yãi, ǹ ma zãngurinↄ dɛdɛ ń pínki, zaakũ n zↄ̀bleriimɛ ma ũ.