YAASINƆ.
4.
Ma nɛ́nↄ, à gbɛ̃ zↄ̃kↄ̃ lɛ́damma ma, à laakari dↄa de à asãnsi le. 
Dↄ̃na súsun matɛn daárɛ, àsun pã kpá ma yãdannɛnaairo. 
Kũ má kun nɛ́ ũ ma de ↄĩ, má busana ma da nɛ́ mɛ̀n do légelege ũ. 
Ma de yã dàmɛnɛ à pì: Ǹgↄ̃ ma yã kũna n swɛ̃̀ɛ gũn, ǹ ma yãditɛnanↄ da ĩnigↄ̃ kun. 
Ǹ ↄ̃ndↄ̃ kũ ǹgↄ̃ dↄ̃na vĩ, ǹsun sãsãi ǹ pã ma yãnɛro. 
Ǹsun pã kpá ↄ̃ndↄ̃iro, ani n dãkpã, ǹgↄ̃ yei, ani ↄ kúmma. 
Ǹ ↄ̃ndↄ̃ kũ, àkũmɛ yã sĩnda pínki mì ũ, ǹ dↄ̃na wɛtɛ kũ aruzɛkɛ kũ ń vĩo pínki. 
Ǹ a kũ gbãngbãn, ani n kara, ǹ a kũ ↄplapla, ani bɛ̀ɛrɛ línnɛ. 
Anigↄ̃ de fùra mana ũ n mìia, anigↄ̃ dennɛ kífura gakuride ũ. 
Ma nɛ́, ǹ sã kpá ma yãi, ǹ yã pì da, n wɛ̃̀ndi nigↄ̃ gbã̀na. 
Ma ↄ̃ndↄ̃ zɛ́ mↄ̀nnɛ, ma n da yã mana zɛ́n. 
Tó ntɛn táa on, pↄ́ke ni kpánnɛro, tó ntɛn bàa lɛ́n, ĩni gɛ̃̀ síro. 
Ǹgↄ̃ ma lɛ́damma kũna, ǹsun gbarɛro, ǹ a kũ gbãna, zaakũ àkũmɛ n wɛ̃̀ndi ũ. 
Ǹsun yãvãnikɛrinↄ zɛ́ sɛ́ro, ǹsun tɛ́ gbɛ̃ vãninↄ zɛ́iro. 
Ǹ pãńnɛ, ǹsun naḿmaro, ǹ kɛ̃ḿma ǹ n gɛna kɛ. 
Tó odi vãni le ò kɛ̀ro, òdi i oro, tó odi gbɛ̃ le ò kari boro, i dì gɛ̃ ń wɛ́nlo. 
Zaakũ vãnikɛnaamɛ ń pↄ́ble ũ, wɛ́tãna gbɛ̃nↄaamɛ ń pↄ́mina ũ. 
Gbɛ̃ mananↄ zɛ́ de lán gudↄnaa bàmɛ, a gupura dìgↄ̃ bo lán ifãntɛ̃ bonaa bà. 
Yãvãnikɛrinↄ zɛ́ de lán gusira níkiniki bàmɛ, òdi pↄ́ kũ à tò òdi gɛ̃̀ sí dↄ̃ro. 
Ma nɛ́, ǹ laakari dↄ yã pìnↄa, ǹ sã kpá ma yã'onnɛnaaa. 
Ǹsun kpá sãkotoro, ǹgↄ̃ kũna n swɛ̃̀ɛ gũn. 
Zaakũ à de wɛ̃̀ndi ũ gbɛ̃ kũ à lè à kũnaanɛ, à de mɛ̀ pínki aafia ũ. 
A kũ à denla ǹ laakari dↄ n swɛ̃̀ yãa, zaakũ wɛ̃̀ndi zĩni bò swɛ̃̀ kĩnaamɛ. 
Ǹ bo yãvãni'onan, ǹ mì kɛ̃ yãlɛkpɛrɛ'onaaa. 
Ǹ wɛ́ dↄ n arɛ, ǹ gu gwa n kuru súsu. 
Ǹ zɛ́ sɛ́ súsu, n yãkɛnanↄ pínki ni bo mana. 
Ǹsun na ↄplai ke ↄzɛiro, ǹsun gbá pɛ́tɛ yã vãni zɛ́nlo.