YAASINƆ.
7.
Ma nɛ́, ǹgↄ̃ ma yãnↄ kũna, ǹ ma yãditɛnanↄ da n nɛ̀sɛn. 
Ǹgↄ̃ ma yãditɛnanↄ kũna ĩnigↄ̃ kun kũ wɛ̃̀ndiio, ǹ laakari dↄ ma yãdannɛnaaa lán n wɛ́nɛ bà. 
Ǹ da n ↄnɛa tãnka ũ, ǹ kɛ̃ n swɛ̃̀ɛa lákũ òdi kɛ̃ anloa nà. 
Ǹ o ↄ̃ndↄ̃nɛ n dãren a ũ, ǹ asãnsi sísi n gbɛ̃ ũ. 
Ani n sí bona karua ↄĩ, ani n bo gbɛ̃ pãnde nↄ yãnnanna'onnɛnan. 
Má zɛna ma kpɛ́ wondoo gũn, matɛn bàai gwa. 
Akũ ma gↄ̃ gbãna kenↄ è, ↄ̃ndↄ̃ kĩ̀aḿma, kɛfɛnna ke kú ń tɛ́, à laasun vĩro. 
Àtɛn likara karua gãnulɛa, àtɛn wakalokũ kɛkɛi a bɛ kpa 
zaa ifãntɛ̃ lɛtɛnaao ari gwãani, ari gu gɛ̀ɛ à sira kũ̀ manamana. 
Akũ nↄgbɛ̃ pìi bò à sù daalɛ ↄ̃ndↄ̃'ↄ̃ndↄ̃, àtɛn ↄ má a zĩdaa lán karuaa bà. 
Kùgbãnademɛ, à wé'isari vĩ, a pↄ̀rↄ dì pɛ́tɛ bɛro. 
Zĩkenↄa àdigↄ̃ kú zɛ́dan, zĩkenↄa gãnulɛa, àdigↄ̃ kpátɛ kɛ zɛ́rankpakↄ̃a. 
Akũ à kɛfɛnna pìi kũ̀ à lɛ́ pɛ̀a, à wɛ́kpãntɛ̃ màtɛi à pì: 
Sáabukpa sa'ona kúma yã, akũ ma lɛ́ kũ ma gbɛ̃̀ɛ pì fĩnaa bò gbãra. 
Ó kↄ̃'ena yãin ma boi, matɛni n wɛtɛ ma n e la sↄ̃. 
Ma bↄrↄgↄ kpàtɛ ma gádoa kũ Misila bùsu biza wɛ́ manao. 
Ma turare'i fã̀kɛ ma wútɛkia kũ ò kɛ̀ kũ lí'ↄ gbĩ nnao kũ lítɛkɛɛo. 
Ǹ mↄ́ ò yenyĩ kɛ ari gu gɛ́ dↄo, ò ó pↄyeina kɛ ari à mↄ́wá. 
Zaakũ ma zã kú bɛro, wɛ̃tɛ kũ à gɛ̀ɛn zã̀. 
À ↄgↄsↄ̃nↄↄ yĩ̀ à gɛ̀ɛo, ari àgↄ̃ gɛ́ su mↄ ni kɛ papana. 
À a swɛ̃̀ɛ blè kũ yã dasi fãnaao, à gã nàa kũ yãnnanna'onaao. 
Akũ kɛfɛnna pìi bò à tɛ̀i gↄ̃̀nↄ, lán zù kũ òtɛn gɛ́ a kùtu kpá bà, lán gã kũ àtɛn gbá pɛ́tɛ goron bà, 
lán bã kũ àtɛn wã à sì gbɛ̀saan bà. Adi dↄ̃ kũ a a zĩda kpà gairo, ari kàa gɛ̀ɛ à a swɛ̃̀ɛ kũ̀. 
Tera sà, ma nɛ́nↄ, à ma yã ma, à laakari dↄ yã kũ àtɛn bo ma lɛ́nwa. 
Àsun tó á laasun tá a kĩnaaro, àsun sãtɛ à gɛ̃ a zɛ́nlo. 
Gbɛ̃ kũ à ń nɛ́ à ń kakatɛnↄn dasi, gbɛ̃ kũ à ń dɛdɛ pìnↄ lɛ́ vĩro. 
A bɛ bi mira zɛ́damɛ, àdi gɛ̃ kũńwo gyãwãn kpɛ́nɛn.