YAASINƆ.
9.
Ɔ̃ndↄ̃ a kpɛ́ bò, à a gbɛ̀gbanↄ à mɛ̀n suppla à pɛ̀tɛpɛtɛ, 
à nↄ̀bↄↄ dɛ̀ à sèwɛ̃ bà, à pↄ́blenↄ soru kɛ̀ à kàtɛ. 
À a nↄkpare zĩkɛrinↄ zĩ̀, àtɛn lɛ́ zu wɛ̃tɛ sĩ̀sĩ mìsↄ̃ntɛa à pì: 
Ákↄ̃nↄ fayasaridenↄ à ɛra à mↄ́ la! Àkↄ̃nↄ laasunsaridenↄ matɛn oárɛ, 
à mↄ́ à ma pↄ́ble ble, à wɛ̃ kũ ma bà mi. 
À á yↄ̃nkↄkɛ tó, anigↄ̃ kun wɛ̃̀ndiio, à táa o wɛ̃kɛ̃na zɛ́n. 
Gbɛ̃ kũ àtɛn lalandide da zɛ́a tɛn sↄ̃sↄ̃ wɛtɛmɛ, gbɛ̃ kũ àtɛn kpãkɛ̃ yãvãnikɛriii tɛn taari wɛtɛ a zĩdanɛmɛ. 
Ǹsun kpãkɛ̃ lalandideiro, ani kɛ kũnwo ĩni, ǹ ↄ̃ndↄ̃de da zɛ́a, anigↄ̃ yenyĩ. 
Ǹ yã da ↄ̃ndↄ̃denɛ, a ↄ̃ndↄ̃ nigↄ̃ din, ǹ yã o gbɛ̃ mananɛ, a dↄ̃na ni kara. 
Vĩnakɛna Dikirinɛɛmɛ ↄ̃ndↄ̃ naana ũ, Luda kũ à kú adona dↄ̃naamɛ wɛ́kɛ̃na zɛ́ ũ. 
Zaakũ ĩni gì kɛ ma gãi, n wɛ̃̀ndi gbã̀na ni kara. 
Tó ń ↄ̃ndↄ̃, n zĩdanɛmɛ, tó lalandidemɛ n ũ, n mìi musu. 
Yↄ̃nkↄkɛ de lán nↄgbɛ̃ lɛ́de bàmɛ, à ↄ̃ndↄ̃ vĩro akũsↄ̃ à yãke dↄ̃ro. 
Àdi vutɛ gbàaa a kpɛ́lɛlɛa, a kpɛ́ kú wɛ̃tɛ sĩ̀sĩia, 
àtɛn lɛ́ zu gbɛ̃ kũ òtɛn gɛ̃tɛnↄi, àtɛn pi gbɛ̃ kũ ò tɛ́ zɛ́n súsunↄnɛ: 
Ákↄ̃nↄ fayasaridenↄ à ɛra à mↄ́ la! Ákↄ̃nↄ laasunsaridenↄ, matɛn oárɛ, 
í kpãni minaa dìgↄ̃ nna, pↄ́blenaa asiri gũn bi zↄ́mɛ. 
Gbɛ̃ pìnↄn dↄ̃ kũ abire bi gyãwãn zɛ́nlo, gbɛ̃ kũ yↄ̃nkↄkɛ ń sisinↄ sì gyãwãn tↄ̃̀nↄwɛɛn.