YAASINƆ.
13.
Nɛ́ ↄ̃ndↄ̃de dì a de lɛ́damma ma, lalandide dì gí kpãkɛ̃naai. 
Lɛ́gbɛ nna dì gbɛ̃ ká pↄ́ manaa, náanisaride dì ble a pãsĩ gũmmɛ. 
Gbɛ̃ kũ àdi a lɛ́ kũ dì a wɛ̃̀ndi dãkpã, gbɛ̃ kũ a lɛ́ dì kúro dì a zĩda yaka. 
Ma'ãde dì pↄ́ kũ à yei lero, aniade sↄ̃ àdi nna ma. 
Gbɛ̃ mana zã̀ manafikiyãn, gbɛ̃ vãni dì wé'i daḿma àdi ń kpe bo. 
Manakɛnaa dì taarisaride sura ba, vãnikɛnaa dì durunnakɛri litɛ kpɛdangara. 
Gbɛ̃kenↄ dì ń zĩda ditɛ aruzɛkɛde ũ, ama òdigↄ̃ pↄ́ke vĩro. Gbɛ̃kenↄ dì ń zĩda ditɛ takaside ũ, ama òdigↄ̃ pↄ́ vĩ zↄ̃kↄ̃. 
Aruzɛkɛde dì a zĩda bo kũ a aruzɛkɛkɛo, takaside sↄ̃ àdi wɛ́tãmmana lero. 
Gbɛ̃ mananↄ gupura dìgↄ̃ puna, gbɛ̃ vãninↄ fitilaa dì gaḿma. 
Zĩdabinaa dì fìti da, lɛ́dammamana dì tó ò ↄ̃ndↄ̃ kũ. 
Ɔgↄ vãni dì gɛ́ arɛro, ↄgↄ kũ ò lè ísimma gũn sↄ̃ àdi kↄ̃. 
Wɛ́dↄinaa gìkɛnaa dì ń nɛ̀sɛɛ yaka, pↄ́ kũ ò yei lenaa dì su kũ wɛ̃̀ndi dufuo. 
Gbɛ̃ kũ àdi yã daro ni yã le, gbɛ̃ kũ àdi yã ma ni àre le. 
Ɔ̃ndↄ̃de yãdannɛnaamɛ ísɛ̃boki wɛ̃̀ndide ũ, àdi ń bo ga bàn. 
Wɛ́zɛ̃ mana dì tó gbɛ̃ dakarɛ mìnnao, ama náanisaridenↄ zɛ́ pãsĩ. 
Laakaridenↄ dì yã kɛ kũ dↄ̃naao, yↄ̃nkↄ dì a fayasarikɛ mↄńnɛ. 
Zĩ̀ri vãni dì gɛ̃ yãn, ìba náanide dì su aafia. 
Gina foruii dì su kũ takasio kũ wé'io, lɛ́dammamanaa dì bɛ̀ɛrɛ líńnɛ. 
Pↄ́nidɛna lenaa dì ń pↄ kɛ nna, ama yↄ̃nkↄ ye kɛ̃na yãvãnikɛnaairo. 
Gbɛ̃ kũ à tɛ́ ↄ̃ndↄ̃rinↄii dì ↄ̃ndↄ̃ kũ, gbɛ̃ kũ à kakarana kũ yↄ̃nkↄnↄ dì yã le. 
Kisira dìgↄ̃ tɛ́ durunnakɛrinↄi, nnamanamɛ gbɛ̃ mananↄ àre ũ. 
Gbɛ̃ mana dì túbi tó a daikorenↄnɛ, durunnakɛri aruzɛkɛ ni gↄ̃ gbɛ̃ mananɛ. 
Takaside bura dì pↄ́ble kɛ manamana, ama yãkɛna lɛ́kpɛrɛ dì tó à kurai. 
Gbɛ̃ kũ àdi a nɛ́ gbɛ̃ro zã̀n, gbɛ̃ kũ à ye a nɛ́i dì a toto káaku. 
Gbɛ̃ mana dì pↄ́ ble à kã, gbɛ̃ vãninↄ nɛ̀sɛɛ dìgↄ̃ da kori.