YAASINƆ.
14.
Nↄgbɛ̃ ↄ̃ndↄ̃de dì ↄn kátɛ, a fayasaride sↄ̃ àdi ↄn fãkↄ̃a. 
Gbɛ̃ kũ àdi yã kɛ a zɛ́a Dikiri vĩna vĩ, gbɛ̃ kũ àdi zɛ́ sɛ́ súsuro sↄ̃ àdi a gya bo. 
Fayasaride lɛ́mɛ a gbɛ̃bↄ ũ, ↄ̃ndↄ̃de yã'onaa dì a bo. 
Tó zù kunlo, pↄ́ble gbàa dìgↄ̃ da korimɛ, òdi àre zↄ̃kↄ̃ le kũ zùnↄ gbãnao. 
Sèeda yãpurade dì ɛ́kɛ toro, sèeda ɛ́kɛde yã dìgↄ̃ manafiki vĩ. 
Lalandide dì kpátɛ kɛ ↄ̃ndↄ̃i à kurai, yãdↄ̃naa araga laakaridenɛ. 
Ǹ kɛ̃ yↄ̃nkↄa zã̀zã, zaakũ ĩni dↄ̃na learo. 
Ɔ̃ndↄ̃ dì tó laakaride laasun lɛ́ a zɛ́a, yↄ̃nkↄ fayasarikɛ dì a sãtɛ. 
Fayasaridenↄ dì taari kutɛkɛna gya bo, gbɛ̃ mananↄ dìgↄ̃ nna kũ kↄ̃o. 
Baadi a zĩda yã'ũmmana dↄ̃, gbɛ̃ pↄnna dìgↄ̃ de gbɛ̃ pãnde pↄ́ ũro. 
Gbɛ̃ vãninↄ ↄn ni mì dɛ, gbɛ̃ mananↄ bɛ ni ↄ tá. 
Zɛ́ ke kun àdi kɛ gbɛ̃nↄnɛ mana, ama a mìdɛki bi gamɛ. 
Bee yáadↄnaa gũn nɛ̀sɛɛ dì yaka, pↄnna kun kũ àdi mì dɛ kũ pↄsirao. 
Borukpɛde yãkɛnaa dì wí a musu, gbɛ̃ mana dì a yãkɛnaa gbɛ̀ le. 
Laasunsaride dì yã sĩnda pínki símɛ, laakaride dì yã náani kɛ laasunlɛnaa sariro. 
Ɔ̃ndↄ̃de dìgↄ̃ vãnikɛnaa vĩna vĩ àdi pãnɛ, yↄ̃nkↄ dì náani kpá a zĩdaa àdigↄ̃ wãna. 
Pↄfɛ̃rii dì yã futa kɛ, manafikide dì zãngu i a zĩdanɛ. 
Ɔ̃ndↄ̃saridenↄ dì gↄ̃ faya sari, laakaridenↄ dì dↄ̃na kú fùra ũ. 
Gbɛ̃ vãninↄ ni mì natɛ gbɛ̃ mananↄnɛ, yãvãnikɛrinↄ ni kútɛ nɛ̀sɛpuradenↄ kpɛ́lɛlɛa. 
Takaside, bee a gbɛ̃dake dì zãn, ama aruzɛkɛde gbɛ̃nnanↄ dìgↄ̃ dasi. 
N gbɛ̃dake gyabona bi durunnamɛ. Arubarikaden gbɛ̃ kũ àdi wɛ̃nda dↄ̃ takasidenↄnɛ ũ. 
Yã vãni lɛ́kpakũsũrinↄ ń sãtɛnaroo? Yã mana laasunlɛrinↄn sùru vĩ kũ náanio. 
Mɛ̀kpana zĩa dìgↄ̃ àre vĩ, yãbↄtɛna pã dì su kĩanaao. 
Ɔ̃ndↄ̃denↄ aruzɛkɛmɛ ń fùra ũ, yↄ̃nkↄnↄ fayasarikɛ dì su kũ fayasariyão. 
Sèeda yãpurade dì gbɛ̃ sura ba, ama sèeda ɛ́kɛde yã manafiki vĩ. 
Vĩnakɛna Dikirinɛ bi gbãnaleki náanidemɛ, à de surabaki ũ a nɛ́nↄnɛ. 
Vĩnakɛna Dikirinɛ bi ísɛ̃boki wɛ̃̀ndidemɛ, àdi tó ò bo ga bàn. 
Tó kína gbɛ̃nↄn dasi, àdigↄ̃ gakuri vĩ, bùsugbɛ̃sarikɛ bi kpatableri kisiramɛ. 
Gbɛ̃ kũ àdi pↄfɛ̃ likaro wɛ́ kɛ̃na, pↄfɛ̃rii dì a futakɛ sɛ́ lei. 
Laakarikpatɛna bi mɛ̀ aafiaamɛ, zãngu dì mɛ̀kɛmuna zĩḿma. 
Wɛ̃ndade wɛ́tãmmarii dì a Kɛ̀ri kpe bo, takaside wɛ́gwarii dì a Kɛ̀ri kpe ta. 
Tó kisira sù, àdi yãvãnikɛri nɛmɛ, bee tó gbɛ̃ mana gà, à utɛki vĩ. 
Ɔ̃ndↄ̃ dì vutɛki le laakaride nɛ̀sɛn, ama òdi e yↄ̃nkↄaro. 
Yãzɛde dì bùsu sɛ́ lei, durunna dì wé'i da gbɛ̃nↄa, bee dímɛ. 
Zↄ̀bleri laakaride yã dì ká kínagu, ama àdi a pↄfɛ̃ kipa a wé'idammariia.