LAASUNDE.
1.
Laasunde Dauda nɛ́, Yurusalɛmu kína yãn dí. 
Makũ laasunde ma pì: Yã pã búgubugu, yã pã búgubugu, a pínki pãmɛ. 
Bↄ́ àreen bisãsiri dì le andunia gũn wari kũ àtɛn kɛ a zĩ sĩnda pínki gũnwaa? 
Kpàinↄ dì gɛ̃tɛ, wurenↄ dì su, ama andunia dìgↄ̃ kun gↄrↄ sĩnda pínkimɛ. 
Ifãntɛ̃ dì bo àdi gɛ̃, àdi wã à ɛra à gɛ́ gu kũ àdi bon. 
Ĩa dì káka gɛ̀nↄmidↄki kpa, àdi ɛra à su gugbãnduru kpa, àdigↄ̃ likara àgↄ̃ gɛ́ àgↄ̃ su. 
Swa sĩnda pínki í dìgↄ̃ ká ísira gũmmɛ, ama ísira dì paro, í pìnↄ dì ɛra ò su swa pìnↄ mìiamɛ. 
Pↄ́ sĩnda pínki dì ń kpasa, kpasa pì yã gɛ̃̀ onala. Gugwana dì mↄ́ wɛ́aro, yãmana dì sã paro. 
Yã kũ à kun yã mɛ́ ani ɛra àgↄ̃ kun dↄ, yã kũ ò kɛ̀ yãn oni ɛra ò kɛ dↄ. A dufu ke kú andunia gũnlo. 
Pↄ́ke kun kũ oni pi: Ǹ pↄ́ dufu ke gwa yá? Oi! À gĩnakɛ à kun ó ã zaa zĩ kↄ̀. 
Gbɛ̃ káakunↄ yã dìgↄ̃ dↄ gbɛ̃ken doro. Bee gbɛ̃ kũ onigↄ̃ kun zianↄ, ń yã ni dↄ gbɛ̃ken ziakpɛzĩro. 
Makũ laasunde ma kí blè Isarailanↄa Yurusalɛmu. 
Ma mɛ̀ɛ kpà yã kũ òtɛn kɛ andunia gũn pínki tàasikanaaa, ma gwàgwa ↄ̃ndↄ̃'ↄ̃ndↄ̃ ma è Luda zĩ pãsĩ dà bisãsirinↄnɛ ò kɛ. 
Ma yã kũ òtɛn kɛ andunia gũn è pínki, a pínki bi pãmɛ, pɛna gukoriamɛ. 
Pↄ́ fĩkarana porona vĩro, òdi le ò pↄ́ kũ à kunlo naroro. 
Akũ ma ò ma swɛ̃̀ɛ gũn ma pì: Ǹ gwa! Ma ↄ̃ndↄ̃ zↄ̃kↄ̃ de gbɛ̃ kũ ò kpata blè Yurusalɛmu ma ãnↄla ń pínki, ma ↄ̃ndↄ̃ kũ ma dↄ̃naao wɛ́ bò manamana. 
Akũ ma mɛ̀ɛ kpà ↄ̃ndↄ̃ asiri dↄ̃naaa de mà yↄ̃nkↄkɛ kũ mìsariyão asiri dↄ̃, akũ ma è abirekũ bi pɛna gukoriamɛ dↄ. 
Ɔ̃ndↄ̃ zↄ̃kↄ̃ↄ dì su kũ nɛ̀sɛyakana zↄ̃kↄ̃ↄomɛ, òdi yã'ũmmana le ń dↄ̃na lɛ́mmɛ.