Esekiɛli.
19.
Yinni Gusunɔ u nɛɛ, ɑ gɔɔ swĩiyɔ Isirelibɑn sinɑ bibun sɔ̃, ɑ nɛɛ, 
ben mɛro u sɑ̃ɑwɑ nge gbee sunɔ niu geu ge bɑ yɛ̃ gbee sinɑnsun suunu sɔɔ. Gɑ rɑ n gen binu kpunɛwɑ gɑ n nu diisiɑmɔ. 
Mɑ gɑ gen buu teu seeyɑ gɑ kuɑ kpɛmbu. Gɑ gu yɑɑ mwɑɑbu sɔ̃ɔsi, mɑ gɑ tɔmbu sɛ̃sukum wɔri. 
Ye sɔbɑ gen gɑri nuɑ, mɑ bɑ gu yinɑ bɛriɑ. Yerɑ bɑ gu mwɑ kɑ kɔkɔru bɑ kɑ dɑ Egibitiɔ. 
Mɑ gen mɛro gɑ mɑrɑ gu wurɑmɑ. Adɑmɑ gɑ tɛmɑnɑbu kpɑnɑ, gɑ wɑ n ǹ koorɔ. Yen biruwɑ gɑ mɑɑ gen buu teu suɑ gɑ seeyɑ gɑ dɑm kuɑ, gɑ kuɑ gbee sunɔ kpɛmbu. 
Mɑ gɑ wɔri gbee sinɑnsun wuuru sɔɔ. Gɑ yɑɑ mwɑɑbu mɛɛrɑ. Mɑ gɑ tɔmbu sɛ̃sukum wɔri. 
Gɑ tem min sinɑ kpɑɑru wɔri gɑ surɑ. Mɑ mɛn wusu kuɑ bɑnsu. Mɑ tɔmbu kɑ ye yɑ wɑ̃ɑ tem mɛ sɔɔ kpuro yɑ bɛrum soorɑ gen kukiribun sɔ̃. 
Mɑ bwesenu nu mɛnnɑ nu kɑ gu tɑbu kuɑ. Bwese ni, nu nɑwɑ yɑm kpuron di. Bɑ gu suurɑ kuɑ gɑ wɔri. 
Mɑ bɑ gen wɛ̃ru yɑbɑ bɑ tɑɑbu doke bɑ gu sɔri diru gɑru sɔɔ. Yen biru bɑ kɑ gu dɑ Bɑbilonin sinɑ bokon mi. Mɑ bɑ gu kɛnusi sere bɑ ǹ mɑɑ gen kukiribu nɔɔmɔ Isirelibɑn guunɔ. 
Yinni Gusunɔ u mɑɑ nɛɛ, ben mɛro u sɑ̃ɑwɑ nge resɛm ye bɑ duurɑ dɑɑ torɑn bɔkuɔ. Resɛm ye, yɑ rɑ mɑ. Yɑ mɑɑ kɑ̃ɑsi yibɑ nim mɛ yɑ wɑɑmɔn sɔ̃. 
Yɑ kɑ̃ɑsi dɑmgii mɔ yi bɑ koo kpĩ bu kɑ sinɑ dɛki ko. Yɑ wɑɑbu wɑ̃, yen gunum kɑ yen kɑ̃ɑsi dɑbinun sɔ̃. 
Adɑmɑ bɑ ye wukɑ kɑ mɔru bɑ surɑ temɔ. Woo ge gɑ wee sɔ̃ɔ yɑri yerun di, gɑ yen mɑrum gberɑsiɑ. Yen kɑ̃ɑsi dɑmgii yi, yi gberɑ yi dɔ̃ɔ mwɑɑrɑ. 
Tɛ̃ yɑ gire tem gbebum sɔɔ mi gɑ̃ɑnu ku rɑ kpi. 
Mɑ dɔ̃ɔ u yɑrɑ sɑɑ yen kɑ̃ɑsin di u yen mɑrum mwɑ. Yɑ ǹ mɑɑ kɑ̃ɑsɑ dɑmgiɑ mɔ ye yɑ koo ko sinɑ dɛkɑ. Womu geni gɑ sɑ̃ɑwɑ gɔɔ wuri. Geyɑ bɑ ko n dɑ ko bɑ̀ n gɔɔ wuri mɔ̀.