Sɑkɑri.
3.
Sɑkɑri u Yosue yɑ̃ku kowo tɔnwero wɑ u yɔ̃ Yinni Gusunɔn gɔrɑdon wuswɑɑɔ. Mɑ Setɑm u yɔ̃ win nɔm geuɔ u kɑ nùn tɑɑrɛ wɛ̃. 
Mɑ Yinni Gusunɔn gɔrɑdo u Setɑm sɔ̃ɔwɑ u nɛɛ, Gusunɔ u nun gerusi wi, wi u Yerusɑlɛmu gɔsɑ. A ǹ yɛ̃ mɑ Yosue u sɑ̃ɑwɑ nge dɑ̃ɑ nɔɔ ge bɑ wunɑ dɔ̃ɔn di? 
N deemɑ yɑ̃ɑ disinuginɑ Yosue u sebuɑ u kɑ yɔ̃ gɔrɑdo win wuswɑɑɔ. 
Mɑ gɔrɑdo wi, u be bɑ yɔ̃ win wuswɑɑɔ sɔ̃ɔwɑ u nɛɛ, bu Yosuen yɑ̃ɑ disinugii ni wunɔ. Mɑ u Yosue sɔ̃ɔwɑ u nɛɛ, wee nɑ nun wunɛn torɑnu wunɑ. Mɑ nɑ nun tɔ̃ɔ bɑkɑ yɑ̃nu sebusiɑ. 
U mɑɑ woodɑ wɛ̃ u nɛɛ, bu nùn dɑwɑni ye yɑ dɛɛre bɔkusio. Mɑ bɑ nùn ye bɔkusiɑ. Mɑ bɑ nùn yɑ̃nu sebusiɑ. Sɑɑ ye sɔɔ, gɔrɑdo wi, u yɔ̃ mi. 
U Yosue gɑri yini sɔ̃ɔwɑ u nɛɛ, 
ɑmɛniwɑ wi, Gusunɔ wɔllu kɑ tem Yinni u geruɑ. U nɛɛ, ɑ̀ n sĩimɔ win swɛɛ sɔɔ, mɑ ɑ win woodɑbɑ mɛm nɔɔwɑmmɛ, wunɑ kɑɑ win sɑ̃ɑ yeru kɑ ten yɑɑrɑn sɔmburu kpɑrɑ. U koo nun kowɑ be bɑ win sɔmburu mɔ̀n turo. 
Yosue, wunɛ yɑ̃ku kowo tɔnwero, wunɛ kɑ wunɛn tɔn be bɑ sɔ̃ wunɛn wuswɑɑɔ, i swɑɑ dɑkio i nɔ. Tɔn be, bɑ ko n ginɑ sɑ̃ɑwɑ yĩreru wi u sisin sɔ̃. Domi Yinni Gusunɔ u koo win sɔm kowo gɔrimɑ wi u sɑ̃ɑ kpii pɔturɑ. 
Wunɛ Yosuen wuswɑɑɔ, u kperu gɑru yiimɔ. Wuswɛɛ nɔɔbɑ yiruwɑ tɑ mɔ. Win tiiwɑ u koo yore te sɔɔ. Kpɑ u tem mɛn torɑnu wunɑ sɔ̃ɔ teeru. 
Wi, Gusunɔ wɔllu kɑ tem Yinni u nɛɛ, yen tɔ̃ɔ te, i ko i sokunɑ i nuku dobu ko bɔri yɛndun sɔ̃ bɛɛn dɑ̃ɑ gbɑɑnɔ.