MATIU.
7.
Àsun gbɛ̃ taari ero, Luda ni á taari e sero. 
Zaakũ lákũ ndì gbɛ̃ taari e nà, lɛn Luda ni n taari e lɛ. Zaka kũ n yↄ̃ońnɛ ani yↄ̃onnɛ. 
Bↄ́yãi ntɛn sɛ̃̀buru kũ à da n gbɛ̃dake wɛ́n ei, akũsↄ̃ ntɛn límukutu kũ à da n wɛ́n yã daroo? 
Kũ límukutu da n wɛ́n, à kɛ̀ dera ĩni pi n gbɛ̃dakenɛ à tó ǹ sɛ̃̀buru kũ à da a wɛ́n bonɛɛ? 
Manafikide! Ǹ límukutu kũ à da n wɛ́n bo gĩa, gbasa ǹ gu e swáswa de ǹ le ǹ sɛ̃̀buru kũ à da n gbɛ̃dake wɛ́n bonɛ. 
Àsun Luda pↄ́ kpá kifirinↄaro, de òsun ɛra ò á kari kɛro yãi. Àsun á gbɛ̀ bɛ̀ɛrɛdenↄ zu alɛdɛnↄnɛro, de òsun táa o'oaro yãi. 
À wɛ́ kɛ, Luda ni kpááwa. À wɛtɛ, áni le. À gbà lɛ́, Luda ni wɛ̃árɛ. 
Zaakũ gbɛ̃ kũ à wɛ́ kɛ̀ɛn òdi kpáa, gbɛ̃ kũ à wɛ̀tɛ sↄ̃ àdi le, gbɛ̃ kũ à gbàa lɛ̀ɛn oni wɛ̃nɛ. 
Á tɛ́, dí mɛ́ ani gbɛ̀ kpá a nɛ́a, tó à burodi wɛ́ kɛ̀aa? 
Tó à kpↄ̀ wɛ́ kɛ̀a sↄ̃, ani mlɛ̃̀ sɛ́ à kpáa yá? 
Bee kũ á vãnikɛo, á pↄ́ mana kpana á nɛ́nↄa dↄ̃. Oni á De kũ à kú musu pↄ́ mana kpana gbɛ̃ kũ ò wɛ́ kɛ̀anↄa pↄ́ o dↄ yá? 
À kɛ gbɛ̃nↄnɛ lákũ á ye ò kɛárɛ nà. Musa doka kũ annabinↄ yãnↄ mìin gwe. 
À zɛ́lɛ kpakoto sɛ́. Zɛ́ kũ a lɛ́ yàasa akũ à mɛ̀poroki vĩ dì gɛ́ kũńwo kakatɛnaa gũmmɛ. Abirekũn pari tɛn sɛ́. 
Zɛ́ kũ àdi gɛ́ kũńwo wɛ̃̀ndii gũn lɛ́ kpakoto à nakↄ̃ana, akũsↄ̃ gbɛ̃ kũ ò lè ò sɛ́nↄn dasiro. 
À laakari kɛ annabi ɛ́kɛnↄi. Òdi su á kĩnaa kũ sã bárao dana, ama lɛwanna nàdɛrinↄmɛ ń ũ. 
Áni ń dↄ̃ ń yãkɛnaaa. Òdi geepi bo lɛ̀ líaro. Òdi kaka e babare láaro. 
Lí mana dì nɛ́ nna i, lí vãni dì nɛ́ gina i. 
Lí mana dì fↄ̃ à nɛ́ ginaa ìro, lí vãni dì fↄ̃ à nɛ́ nna ìro. 
Òdi lí kũ àdi nɛ́ mana iro zↄ̃ ò zu tɛ́ gũmmɛ. 
Lɛmɛ áni ń dↄ̃ ń yãkɛnaaa lɛ. 
Adi kɛ gbɛ̃ kũ àdigↄ̃ ma sísi Dikiri, Dikiri, mɛ́ ani gɛ̃ kpata kũ à bò Luda kĩnaa gũnlo, sé gbɛ̃ kũ àdi ma De kũ à kú musu pↄyenyĩna kɛɛ. 
Yãkpatɛkɛgↄrↄ zĩ pari ni pimɛnɛ: Dikiri, Dikiri, o Luda yã òńnɛ kũ n tↄ́o bi! O tãnanↄ gòḿma kũ n tↄ́o bi! O daboyãnↄ kɛ̀ dasi kũ n tↄ́o bi! 
Mani pińnɛ súsu: Má á dↄ̃ zikiro. À gomala yãvãnikɛrinↄ! 
Abire yãi gbɛ̃ kũ à ma yã dínↄ mà, akũ à zĩ kɛ̀a de lán gbɛ̃ laakaride kũ à a kpɛ́ bò gbɛ̀ɛa bàmɛ. 
Kũ legũ mà, í dàgula, ĩa kàka à sù kpɛ́ pìia, akũ adi lɛ́tɛro, kũ ò a ɛ̃ pɛ̀tɛ gbɛ̀ɛa yãi. 
Gbɛ̃ kũ à ma yã dínↄ mà, akũ adi zĩ kɛaro de lán mìsaride kũ à a kpɛ́ bò bùsu'atɛ̃a bàmɛ. 
Kũ legũ mà, í dàgula, ĩa kàka à sù kpɛ́ pìia, akũ à gbòro à lɛ̀tɛ gbìrim. 
Kũ Yesu yã birenↄ ò à làka, a yãdannɛnaa bò pari sarɛ, 
zaakũ adi yã dańnɛ lán ludayãdannɛrinↄ bàro, à dàńnɛ kũ ikoomɛ.