EBERUNƆ.
11.
Ludanaanikɛnaamɛ tãmaa kunna Luda kĩnaa sikaa sari ũ, yã kũ òdi wɛ́ sialɛro sina yãpura ũ. 
Gbɛ̃ káakunↄ ludanaanikɛna mɛ́ à tò Luda ń sáabu kpà. 
Ó ludanaanikɛna mɛ́ à tò ó dↄ̃ kũ a yã'ona mɛ́ à andunia kàtɛ. Pↄ́ kũ òdi wɛ́ sialɛron à pↄ́ kũ òdi wɛ́ sialɛ kɛ̀o. 
Habila ludanaanikɛna mɛ́ à tò a sa'ona Ludaa mana de Kainu pↄ́la. A ludanaanikɛna yãin Luda a sáabu kpà, à a dìtɛ gbɛ̃ mana ũ, akũ à a gba sì. Bee kũ à gà, ó kpɛ́ ótɛni a yã ma Luda náani kũ à kɛ̀ɛ pì yãi. 
Ɛnↄku ludanaanikɛna mɛ́ à tò Luda a sɛ̀, de àsun garo yãi. Odi a e doro, kũ Luda a sɛ̀ bona andunia gũn yãi. Ari Luda gↄ̃ a sɛ́, à a sáabu kpà, à pì a yã kàagu. 
Gbɛ̃ke yã dì ká Ludagu a náanikɛnaa sariro. Séde gbɛ̃ kũ àtɛn nai sí kũ à kun akũsↄ̃ àdi fĩna bo a ki wɛtɛrinↄnɛ. 
Kũ Luda lɛ́ dà Nuhua yã kũ odi e yãro musu, akũ à Luda náani kɛ̀, à a yã mà, à gó'itɛ kɛ̀, à a ↄndenↄ sura bào. A ludanaanikɛna mɛ́ à tò yã vùtɛ andunia, akũsↄ̃ Luda tò yã bò kãao nna a náani kũ à kɛ̀ɛ pì yãi. 
Kũ Luda Ibrahĩ sìsi de à gɛ́ bùsu kũ áni kpáa àgↄ̃ vĩ gũn, akũ Ibrahĩ Luda náani kɛ̀, à Luda yã pìi mà. À bò bɛ, bee kũ à gu kũ àtɛn gɛ́n pì dↄ̃ro. 
À Luda náani kɛ̀, akũ à bɛ pɛ̀tɛ bizakuta ũ bùsu kũ Luda a lɛ́ sɛ̀nɛɛ pìi gũn nibↄ ũ. Lɛn Isaaku kũ Yakubuo dↄ, zaakũ Luda lɛ́sɛnaa pìi gↄ̃̀ ń pↄ́ ũmɛ. 
Zaakũ wɛ̃tɛ kũ Luda kàtɛ à bò a zĩni pɛtɛnaan Ibrahĩ wɛ́ dↄi. 
Sara ludanaanikɛna mɛ́ à tò à zɛ́ lè à nↄ̀ↄ sì, bee kũ paramɛ, akũsↄ̃ à zĩ kũ̀, zaakũ à dↄ̃ kũ Luda kũ à lɛ́ sɛ̀arɛ náani vĩ. 
Bee kũ à zĩ kũ̀, gↄ̃gbɛ̃ mɛ̀n do pì buri kɛ̀ dasi lán susunɛnↄ ke ísiralɛ bùsu'atɛ̃ bà, oni fↄ̃ ò a lɛ́ dↄ̃ro. 
Gbɛ̃ pìnↄ gàga ń pínki ń ludanaanikɛnaa gũn, pↄ́ kũ à a lɛ́ sɛ̀ńnɛnↄ lenaa sari. Ò è zã̀ dire ò gbãnakɛ kpài. Ò pì, nibↄ bòasunↄmɛ ń ũ zĩtɛa la. 
Gbɛ̃ kũ òdi o lɛnↄ tɛn mↄwɛrɛ kũ òtɛni ń zĩda bùsu ni dɛmɛ. 
Tó bùsu kũ ò bòn bɛgɛn òtɛn kɛ yã, de ò zɛ́ lè ò ɛ̀ra ò tà gwe. 
Ama bùsu kũ a mana de abirekũlan òtɛni a ni dɛ, àkũ ludambɛ pↄ́ ũ. Abire yãi tó ò Luda sìsi ń Luda ũ, àdi kɛnɛ wé'iyã ũro, zaakũ à wɛ́ra kàtɛ ń pↄ́ ũ. 
Kũ Luda Ibrahĩ yↄ̃̀ à gwà, akũ Ibrahĩ Luda náani kɛ̀, à Isaaku kpà sa'opↄ ũ. Luda lɛ́ sɛ̀nɛ yã à pì, Isaaku burinↄn onigↄ̃ pińnɛ a burinↄ ũ. Bee kũ abireo à zɛ̀ kũ a nɛ́ mɛ̀n do pì kpanaao. 
À sì kũ Luda gbãna ni fↄ̃ à gɛ̀nↄ vu bona gan, akũ à de lákũ ò pì à ɛ̀ra à Isaaku lè bona gan bà. 
Isaaku Luda náani kɛ̀, akũ à sa'olɛ kɛ̀ Yakubu kũ Isauonɛ. 
Kũ Yakubu kú ga lɛ́i, akũ à Luda náani kɛ̀, à sa'olɛ kɛ̀ Yusufu nɛ́nↄnɛ, akũ à gbãna lè a gòoa à donyĩ kɛ̀. 
Kũ Yusufu kà gana, akũ à Luda náani kɛ̀, à Isarailanↄ bona Misila yã ò kũ lákũ oni kɛ kũ a gɛ̀wao nà. 
Musa de kũ a dao Luda náani kɛ̀, akũ ò a ùtɛ ari mↄ aakↄ̃ a inaa gbɛra, kũ ò è a àlesi mana yãi. Odi vĩna kɛ doka kũ Firi'auna dìtɛnɛro. 
Kũ Musa kɛ̀ zↄ̃kↄ̃, akũ à Luda náani kɛ̀, à gì ò a sísi Firi'auna nɛ́nↄgbɛ̃ nɛ́ ũ. 
À sì ò a wɛ́ tã kũ Luda gbɛ̃nↄ de kunna kũ pↄnnao durunna gũn gↄrↄ plala. 
À dìtɛ kũ wé'i kũ òdi daḿma Kirisi yãi de Misila aruzɛkɛla, zaakũ ziakpɛzĩ láadan a wɛ́ kúa. 
A ludanaanikɛna mɛ́ à tò à bò Misila, adi vĩna kɛ Firi'auna pↄfɛ̃nɛro, à zɛ̀ gíngin lákũ à Luda kũ òdi e kũ wɛ́oro èe bà. 
A ludanaanikɛna mɛ́ à tò à Vĩnla dikpɛ dìtɛ kũ aru mamana kpɛ́ lɛ́ gbĩ̀iao, de gbɛ̃dɛri sún ↄ na ń daudunↄaro yãi. 
Isarailanↄ Luda náani kɛ̀, ò bikũ̀ Isira Tɛ̃raa lán zĩtɛ kori bà. Kũ Misilanↄ yↄ̃̀a lɛ, akũ í dàńla. 
Isarailanↄ Luda náani kɛ̀, ò táa ò ò lìka Yɛrikoi ari gↄrↄ suppla, akũ a bĩni kↄ̀tɛ. 
Karua Rahabu Luda náani kɛ̀, à gu'asirigwarinↄ dìtɛ à ń gwá manamana, akũ adi kakatɛ kũ ludayãdarisarinↄoro. 
Mani pi dera dↄↄ? Mani zɛ́ le mà Gidiↄn yã oro ke Baraki ke Samusi ke Yɛfɛta ke Dauda ke Samuɛli ke annabinↄ. 
Ò Luda náani kɛ̀, akũ ò zĩ̀i blè kínanↄa, ò yã gↄ̃̀gↄ̃ gbɛ̃nↄnɛ a zɛ́a, ò lɛ́ kũ Luda sɛ̀ńnɛ gbɛ̀ɛ lè, ò músunↄ lɛ́ nàkↄ̃a, 
ò tɛ́ pãsĩ dɛ̀, ò bò fɛ̃nɛda lɛ́i, ò gbãna lè ń gbãnasarikɛ gũn, ò pãsĩ kũ̀ zĩ̀i gũn, ò pɛ̀ buri pãnde zĩ̀karinↄa, 
ò nↄgbɛ̃nↄ nɛ́ gɛ̀nↄ fùtɛ bona gan ò kpàḿma. Ò mɛ̀ɛ ũ̀ ń gbɛ̃kenↄa, akũ ò gì ò ń gbarɛ, de ò vu bona gan ò bo mana yãi. 
Ò ń gbɛ̃kenↄ fobò, ò ń gbɛ̃ kũ flã̀ao. Ò mↄ̀ↄ kà ń gbɛ̃kenↄa, ò ń ká kpɛ́siran. 
Ò ń pápa kũ gbɛ̀ɛo ò ń dɛdɛ, ò ń zↄ̃kↄ̃rɛ pla kũ sàkasakaao, ò ń dɛdɛ kũ fɛ̃nɛdao. Ò kurè sã bára kũ blè bárao dana. Ò gↄ̃̀ kori, ò ń wɛ́ tã̀, ò wari dↄ̀ḿma. 
Andunia kunna dí kↄ̃ sí kũńworo. Ò lìkaralikara sɛ̃̀n kũ kpi musunↄo, ò kú gbɛ̀wɛɛnↄn kũ tↄ̃̀nↄwɛɛnↄ. 
Bee kũ Luda gbɛ̃ pìnↄ sáabu kpà ń pínki a náani kũ ò kɛ̀ yãi, odi pↄ́ kũ à a lɛ́ sɛ̀ńnɛ lero, 
Luda gĩnakɛ à dìtɛ, ò gwena mana le de ń pↄ́la, de òsungↄ̃ papana ó sariro.