1 YUHANA.
2.
Ma nɛ́ yenyĩdenↄ, matɛn yã bire oárɛ de àsun durunna kɛro yãimɛ. Ama tó á gbɛ̃ke durunna kɛ̀, ó Zɛkũnwode vĩ De Luda kĩnaa, àkũmɛ taarisaride Yesu Kirisi ũ. 
Àkũmɛ ó durunnanↄ kútɛkɛbↄ ũ. Adi kɛ ó durunnanↄn adoro, kũ andunia pínki gbɛ̃nↄ pↄ́oomɛ. 
Tó ó yã kũ à dìtɛnↄ kũna, abirekũ mↄ̀wɛrɛ yãpura kũ ó a dↄ̃. 
Tó gbɛ̃ pì á a dↄ̃, akũ à a yã kũ à dìtɛnↄ kũnaro, ɛ́kɛdemɛ, yãpura kú a swɛ̃̀ɛ gũnlo. 
Gbɛ̃ kũ à a yã kũna sↄ̃, Luda yenyĩ papana a gũn yãpura. Pↄ́ kũ ani tó ò dↄ̃ kũ ó kú a gũnn dí: 
Gbɛ̃ kũ à pì á kú a gũn, séde àgↄ̃ kun lákũ Kirisi kun nà yã. 
Ma gbɛ̃ yenyĩdenↄ, adi kɛ yã dufun matɛn oárɛro, yã zĩ kũ ò dìtɛárɛ zaa káakumɛ. Yã zĩ pìimɛ yã kũ a mà ũ. 
Bee kũ abireo yã kũ matɛn oárɛ dufumɛ dↄ, òdi a yãpura e a kĩnaa kũ á kĩnaao, zaakũ gusira tɛn gɛ̃tɛ, akũ gupura yãpura tɛn pu sà. 
Gbɛ̃ kũ à pì a kú gupuran, akũ à zã a gbɛ̃dakegu, ade kú gusira gũmmɛ ari tera. 
Gbɛ̃ kũ à ye a gbɛ̃dakei kú gupuran, a yãke dì tó gbɛ̃ke furo. 
Gbɛ̃ kũ à zã a gbɛ̃dakegu kú gusiran, à tɛ́ gusiran, à dↄ̃ gu kũ àtɛn gɛ́nlo, kũ gusira a vĩ̀na kũ̀ yãi. 
Ma nɛ́ yenyĩdenↄ, matɛni abirekũ oárɛ kũ á durunnanↄ kɛ̃̀áwa a tↄ́ gãi yãimɛ. 
Marenↄ, matɛni abirekũ oárɛ kũ á gbɛ̃ kũ à kun zaa káaku dↄ̃ yãimɛ. Kɛfɛnnanↄ, matɛni abirekũ oárɛ kũ a zĩ̀i blè Setanwa yãimɛ. Ma nɛ́ yenyĩdenↄ, ma òárɛ kũ á De Luda dↄ̃ yãimɛ. 
Marenↄ, ma òárɛ kũ á gbɛ̃ kũ à kun zaa káaku dↄ̃ yãimɛ. Kɛfɛnnanↄ, ma òárɛ kũ á gbãna vĩ, Luda yã kú á swɛ̃̀ɛ gũn dↄ, akũsↄ̃ a zĩ̀i blè Setanwa yãimɛ. 
Àsungↄ̃ ye anduniairo, kesↄ̃ pↄ́ kũ ò kú a gũnnↄ. Tó gbɛ̃ ye anduniai, à ye De Ludairo. 
Zaakũ yã kũ à kú andunia gũn pínki, mɛ̀ pↄ́nidɛna kũ wɛ́pio kũ aruzɛkɛ ĩadãnaao, adi bo De Luda kĩnaaro, à bò andunia kĩnaamɛ. 
Andunia tɛn gɛ̃tɛ kũ a pↄ́nidɛnaao, ama ludapↄyenyĩnakɛri nigↄ̃ kun gↄrↄ sĩnda pínkimɛ. 
Ma nɛ́ yenyĩdenↄ, gↄrↄ kpɛden ó kun dí. Lákũ a mà kũ Kirisi ibɛrɛ tɛn su nà, a ibɛrɛnↄ gĩnakɛ ò kɛ̀ dasi. Abirekũ mↄ̀wɛrɛ kũ ó kú gↄrↄ kpɛde gũn. 
Gbɛ̃ pìnↄ bò ó kĩnaamɛ, ama ó gbɛ̃nↄnlo. Tó ó gbɛ̃nↄmɛ yã de ò kú kũoo. Ò bò de ò dↄ̃ kũ ń gbɛ̃ke de ó gbɛ̃ ũro yãimɛ. 
Ákↄ̃nↄ sↄ̃, Luda a Nini dìárɛ, akũ á yãpura dↄ̃ á pínki. 
Ma abire òárɛ, kũ á yãpura dↄ̃ yãimɛ, adi kɛ kũ á dↄ̃ro yãinlo. Á dↄ̃ kũ ɛ́kɛ ke dì bo yãpura gũnlo. 
Dín ɛ́kɛde ũu? Gbɛ̃ kũ à gì Yesu Arumasihukɛnaaimɛ. Gbɛ̃ bire takan Kirisi ibɛrɛ ũ, à gì De Ludai kũ a Nɛ́omɛ. 
Gbɛ̃ kũ à gì Luda Nɛ́i De Luda vĩro. Gbɛ̃ kũ à zɛ̀ kũ Luda Nɛ́o mɛ́ à De Luda vĩ dↄ. 
À tó yã kũ a mà zaa káaku gↄ̃ kú á swɛ̃̀ɛ gũn. Tó yã kũ a mà zaa káaku pì kú á swɛ̃̀ɛ gũn, ákↄ̃nↄ sↄ̃, anigↄ̃ kú Luda Nɛ́ gũn kũ a Deo. 
Pↄ́ kũ Kirisi a lɛ́ sɛ̀wɛrɛn wɛ̃̀ndi kũ àdi lákaro ũ. 
Ma yã bire òárɛ gbɛ̃ kũ òtɛni á sãtɛnↄ yã musu. 
Ákↄ̃nↄ sↄ̃, Nini kũ a lè Kirisia kú á gũn. Á bàka kú kũ gbɛ̃ke yã dadanaárɛoro, zaakũ a Nini tɛn yã sĩnda pínki dadaárɛ, à yãpura vĩ, ɛ́kɛ kú a gũnlo. Lákũ àtɛn dadaárɛ nà, àgↄ̃ kú Kirisi gũn lɛ. 
Tera sà ma nɛ́ yenyĩdenↄ, àgↄ̃ kú a gũn, de gↄrↄ kũ à bò gupuraa, ó swɛ̃̀ gↄ̃ ditɛna, wé'i sún ó kũ a sugↄrↄ zĩro. 
Zaakũ á dↄ̃ kũ Luda mana, àgↄ̃ dↄ̃ kũ yãmanakɛri sĩnda pínki bi a nɛ́mɛ.