1 Kabo kaliyate yabo Yaubada iwaloyoi Nowa koina iba, “Yaso bwaite kalona mena yagitai kubomamo mumugam idudulai kabo mekamkavao am susuyao kwalau kwalusae waga mena. 2 Siya yakayakan yatalam kan yo pwaoli kaiwena tau yo sine kali baibaiwa seben mekalikavao mewaineliyao ukwalaili. Yo yakayakan siya nige yatatalam kan yo pwaoli kaiwena labui labui mewaineliyao ukwalaili. 3 Na man meuloili siya sievaeva kali baibaiwa seben me waineliyao ukwalaili. Na ukwalaili mekamkavao kwalusae waga mena, kabo man kali koleya uloina uloina yanuwa yaulina mena simiyamiya tabu kisi simwawasi, ukwalaili mekamkavao kwalusae. 4 Kaliyate seben imwawasi kabo kani yawalo kaliyate poti (40) yo boniyai poti galewa italu. Kabo yamayamayale meuloili yayamayaleli yaemwawasili.” 5 Kabo Nowa ginauli meuloina ipaisowaili besiele Yaubada ana walo.

6 Na Nowa ana bolime 600 kabo yalubwasi idoga. 7 Kabo mewainena, natunao mewaineliyao silusae waga mena na yakato yalubwasi siyabubu-gabaen. 8 Na mekalikavao yakayakan siya Yaubada italam kan yo pwaoli kaiwena yo siya nige itatalamwan yo man siya sievaeva yo yakayakan siya sinenenene, 9 meuloili bwaite, labui labui, tau yo sine, mekalikavao silusae waga mena besiele Yaubada ana walo. 10 Kaliyate seben imwawasi kabo yalubwasi iyawatagili idoga isae.

11 Edeededena bwaite besiele. Nowa ana bolime 600 waikena labuina koina kana kaliyate 17 koina waila lalakina idoga-saema bwatano kalona mena yo bulibuli itasoke galewa lalakina italu. 12 Kabo kaliyate poti yo boniyai poti galewa imiyamiya italutalu. 13 Kaliyatenane koina Nowa mewainena, natunao Semi, Ami yo Yapeta mewaineliyao silusae waga mena. 14-16 Na yakayakan sokasokali yo manamanasamli yo siya sinenenene yo man sievaeva, meuloili siya kali koleya uloi uloi labui labui, tau yo sine, mekalikavao Nowa silusae waga mena, besiele Yaubada ana walo. Na saugana Nowa ilusae kabo Yaubada waga kana gamwa ikausi. 17 Kaliyate poti yo boniyai poti yalubwasi iyaelemo idogadoga. Waila ilalakisosi kabo waga ipoulisae. 18-19 Waila iyaele ilalaki isaesae mwa waga ipoupouli yo iyaluyaluwan waila pwatana mena yo wailane koya isae-pwaikili, 20 koya malamalaweli na yalubwasi isae-likwaili kana mamalawe besiele seben mita kana sae. 21-23 Yamayamayale meuloili yanuwa yaulina mena siboita, besiele tomo tabe. Ginauli meuloili meyawasili simiyamiya bwatano mena simwawasi. Yaubada meuloili iyemwawasili. Na Nowa mekanakavao siya wagane koina ileboili sinamwanamwa. 24 Yalubwasi idogadoga yanuwa yaulina mena kaliyate kana baibaiwa 150 kaiwena.