1 Nuw antaati machtangaz wazan támarakuri, napaa ashtareezi, nduni. Kizangzitam kamasinangaz mangishi yutarit chinakuri, napaa ashtareezi. 2 Watam Apanll kizpureeru, kanindshutaa taaku, yuwaa tputs mantsirimshee chinaku anoo yasakuwa. 3 Yutaritshishpaneetsimari tputs kiyung yachaku, tpazakiya. 4 Itaru, nuwsha wanasiriri taaki anoo ¿nitaati Apanll nda pak? Ashku, ¿tamareeja taarasheetsi nda yasach?

5 Ashiriya, nuw zurampatari tina; nuw tputsee minumtiyam mantsir tsiyatareezi. Mishat, ngichzeetstam ngichtareezi. 6 Apanll nuwaa taarashi zurampatari yasaku, Job wanasircha, táchiya. 7 Nuw wanari nda izuuru wanasir Apanllee chinakuri, tputsingaz maachiri kapung támarakuri, yuwaa tputs payukana anoo shuchitaruri, Apanll nuwaa wanichapandanaya. 8 Nuw yutaritanaari ashiranguri, tputs mzareetsi itutseersin, anush katungkusin, tatsumareetsi xpuyashtisin, kapeetchinllinaya.

9 Wanariya nuw kizaa yutarit tsiyataranguri, tputsingaz wizanll zandkuri, napanapaw ashtaruri, Wazaranll naakchu, tsiyatpi túri, ashtaruri, 10 izanllshati nllitari tputs muchchur ashiru taachiya. Ashiri washunandsha kirimiz maachinllinaya. 11 Nuw kizaa yutarit patatarinaareena, tputsshapari nuwaa kapung natsachinllinaya. Nuwaa kapung wanimaam waritachiya. 12 Anumand nuwaa maachiriti ichingaru sumaspaz ashiru chingamaam waritachinaapari. Itaru, nda nuw minumtiyam mantsirimshi patatarangina.

13 Wanari nuw m'chachureetsi nda tatsamooru tuwaptaruri, ¿mayaatstaja nuw Apanllee kamanchi? Itaru, nuw tatsamooru tuwaparangina. Mishat, nuwaa, Istanda, tákchusin, nuw uru mazinakuri, istatarina. 14 Ndunari ashiranguri, Apanll nuwaa, ¿Mayaamsha shiy ashirangsha? tákchu, ¿amcheezi nuwa? 15 Watam Apanll tatsamooru ichingarootsini tinaranguwa. Nuwaa tinarangu, ashiritam Apanlltam m'chachureetsi tinarangitamta; tatsamooru wanasir taarasheemani panarangiya. 16 Ashiriya, pukir tputs maachiri pishtarangusin, nuwsha anoo istamaam zandaranguri, nda niyrarangina. Kizsha mashind marizimun kiyung kachiyku, anootstam, Nda; waani marizimun tsipanllina, aturi nda niyrtarina. 17 Mxaxzeemsha katungtsee panamaam pachindeeri, nuwaanitari katungtareezi. Neewa. Ktungangi, mxaxzee tárangina. 18 Wapar tamapari ashiruri, kapung chinakuri istatarina. Mashindootssha ashiritam chinakuri, kapungtam istarangitamana. 19 Yuwaatssha tputs wamar ndunari, kiyung kachiykachu, kachizamun anoomsha iripungash ndunari, anoo pakchuri, 20 nuwaana opeejari pur kutama tuwapimash payuri, anootssha yáyaruri, wamareem panatarina, nda kachizamun tsipamaama. Ansha kamartarsin, ksansha kis taaksin, anumand nuwaatssha kis chinataranaya. 21 ¿Nitaati nuw mxaxzee kurakap machtayaruri, Shiy nee nlluraa wanimpanish taangcha, tárangeezi? Nda. Minumtiyam amb ashimaam nda zandarangina. 22 Nuw nda ngichkuri tina. Wanari ngichkuri túri, Apanll nuwaa waneekchu, uru titkurinungi pantsakamchuri, pachtami izuuru chpachiya. 23 Apanllee wáneesh kapungcha puniki. ¿Tamari nuw Apanllee wizpur kasiyaruri, nuwaanaatsi tapachindachee? Pinasakina.

24 Orootaa kapung payuranguri, nda anungaz chinatarina. Nda anumun mangi taturangina. 25 Maachi zapan payuranguri, anoo tupaxanxayaruri kapung kurikee putachina túri, nduntam anungaz chinataritamana. 26 Kanindap napkuri, zaree kizpuritaa wanasir kurakurtaru paktaati, psaansha tsupee kizpuritam wanasir 'sineeru, kurakurtar ashku anoo paktaati, 27 itaru nuwsha anuwaa pakuri, In kizpurcha wanasiri, túri, nda anoo Apanlleetspaz ashiruri ungirtamaam pakchiyam nda chinarangina. 28 Wanari amb ashiru chinaranguri, zari, misha tsupeetstam ungirtaranguri, anumand Apanll nuwaa wanimaam waritarangpari, watam Apanlli wamari kasiru anoo ngatkuri, anootssha ungirtaranginawa. 29 Yuwash kundarari nuwaa kizpur yutaritash wayarangu, kapung tsutashshimun kiyung kachiykuri taarangi, anush nda mangi kis taarangina. 30 Ashiritaa, nda nuw mantsir tsiyatkuri, Waani kundarari tsipanll, tárangina.

31 Mishat, nllitarit tputs iyash kusku, iyashchi tputs istamaam nda zandkuri, nda niyrtarina. 32 Anoo tputs pakuri, wishchip maamaam nda wayarangina. Uru chinampatari chinakuri, Pangishi pshtuyarus, maangtsa, átarina. 33 Mishat, nda yuwaa yutarit chinarangi anoo tputs yasatpa, aturi, kamapshirangina. Piyartach tputs kamapshiyarusin, Yutarit taakeezi, atanaya. Itaru, nuwnaa nda tárangina. 34 Nuw uru itsinsaru taakina. Ashiri tputs, Nuwaa tayutaritarundama, aturi, punikeezi. Nda tsiyatkuri, makukish kuxina ashkeezi, nda. Yuwaatstam maachiriti nuwaa mantsir tsiyatkana anootstam punimaam wanindaja. 35 Apaa, ¿Mayaamsha nuwaa kuki nda mazinaksha? Wanasirimsheetsimari tsiyatarangina. Na shiysha nuwaa kamaningandama. Yutaritshishireetsi ichingaru kirakamun yandayarush, nuwaam pananda. 36 Sheerush, nuwaam panayarush, nuwsha kirakareetsish yáyaruri, muchimuni tutayeeruri, tputsee ichingaru tuyamandachima, yuwaa yutaritshishi patatarangi, misha kamapshirangi anootsi. 37 Yuw yutarit ashirangi anoo shiyaatssha Apaa, tasaseeruri, muchee itsireeruri, Zuraktishcha. Nuw yutarittana, táchinllpa. 38 Itaru, nuw yutarit ashirangeezi. Tputsee watsapun itutsirangeezi. Mishat, nuwamari mzari kapung taap aturi, yuwaa tatsumpani atusin, tsapu ktseeyarana, anootstam nda shuchirangina. 39 Nuw wanari tputsish mazar katungtsee shuchitaruri, tarawzupaneetssha mantsir shimbayari kasataruri, 40 yuwamand yutarit ashirangi, anumand Apanll nuwaa wanichu, mzarshi tirik, misha sebaad tatsumirangi anush kapshapari kxunchiya. Nduniya ashiru, karutanandarisha kxunchiya, atina. Ashiriya, na wappa tsiyatssee, Job tárangiya.

Ashiriya na kamaneena yuwaa Job, Apanll nuwaa kiyung yachakiya, tárangu anootsi.