18
Njan keyah whuti Babylon 'aw 'et hoolah whuzdli
1 'Et ndoh hoh hukw'elh'az 'uyoon lizas yak'uz ndus de út'oh hoh télh'en. Soo ulhtus hoh k'úne' 'ut'en nduwhút'en. Buts'un hányuzduz ndi yun k'ut be whét'en. 2 'Ink'ez soo dultul hoh njan ndutni,
“Njan keyah whuti Babylon 'aw 'et hoolah whuzdli
hoolah whuzdli
'Ink'ez njan keyah whuti Babylon, ndi ntsi' nududeh lhai bukeyah whúzdli.
Nududeh dutsun ts'iyawh delhts'i whuzdli.
ndai dut'aiyaz dutsun 'ink'ez buts'uz dutnik,
'i chah 'et delhts'i.
3 Soo nint'uk hoh 'uyoon dune bulh tinta' 'ut'ih,
mai too k'una'a 'udun yun k'ut whut'en,
'et whuz na'a zeh hube yulhnai.
Ndi yun k'ut hubudayi cho chah hiyulh tinta' ut'ih inle.
'Ink'ez ndi yun k'ut 'uhóoket, 'en
ndun ts'eke hoh soode'a 'int'ah 'ink'ez whélhtus,
'et huwa higha soode'a huzdli.”
4 'Et doo chah ndus de yak'uz ts'ih 'uwhutni whudáts'o hoh njan nduwhútni,
“Sudune buts'uh hanáhdelh doo ka sih 'en bulh lubeshi 'oolh'en.
'Ink'ez doo ka sih ndi dune ye dzuh nudeh,
'i nuhghá doolts'it.
5 Bulubeshi nduk yat'ah ts'ih 'udéltai suli 'et huwa.
'Ink'ez yé tink'us 'int'ah, 'i ts'iyawh Yak'usda yunalni.
6 Danwhúhinla whuz na'a zeh huba 'uk'elha hoolhtsi.
'Ink'ez be 'ut'en nawh 'ultsuk huba 'uk'elha hoolhtsi.
Ndi lubot mbez nuhwhuba lhtainílhze,
'i nawh 'et 'ultsuk 'i huba lhtanaoolhdzeh.
7 Duba naducha 'ink'ez whudézti hukw'u na'a zeh yinkak usda,
whuz na'a dzuh nuzut 'ink'ez tso unli bugha óonah'aih.
Dudzi yuh hoh njan ndutni,
‘Hubudayi cho ts'eke k'una'a sída.
'Aw tsándelh chásdlah,
'ink'ez tso chah chasés'en.’
8 'Et huwa dune ye dzuh nudeh,
'ilhudzin zeh 'et ndi ts'iyawh bugha whútelts'ulh.
Bé dats'utsah, tso,
'ink'ez dai chah ts'iyawh.
'Ink'ez kwun be soo ts'iyawh duték'un.
NeMoodihti Yak'usda yuba naheyelh, 'en ulhtus 'et huwa.”
Ndi yun k'ut whut'en, 'en Babylon hoolah whuzdli hukw'e hunudleh
9 “Ndi yun k'ut whuhubudayi cho yulh tinta' 'ut'ih, 'en soo hiyulh soode'a 'uhánt'e ndun ts'eke dezk'un bulut hinilh'en hoh, hik'e tetso 'ink'ez hik'e ni unteleh. 10 Ndi ye dzuh nadinzut hinilh'en 'ink'ez hiye nuljut 'et huwa ye 'un cho nodelhúya 'ink'ez 'uhutni,
‘Keyah whuti Babylon degha nus hoontsi' huwá whults'ut,
degha nus hoontsi' huwá whults'ut.
Nyo hoolhtus keyah whuti,
'ilhuh hukw'e'hunint'o, 'et mba nahezya, whusawhélts'ut.’
11 'Et whulagha ts'ih ndi yun k'ut 'uhóoket hik'e tetso, 'ink'ez 'en chah hik'e ntedleh. Ndai hiye ooket, 'aw dune chahuyoosket suli 'et huwa. 12 Gold, silver, tse dunezti, kw'usul dunézti, naih dézti, naih dulk'un 'ankw'us dulhk'us, seluk soo dulk'un, khunai ncha bude, ivory hiyúlhni, hoonliyaz hiyilh'i ts'iyai dézti duchun, dulk'un t'eh, iron, tse, marble hiyulhni, 'ants'i ts'iyai dézti, 13 'ink'ez bulh buta'whut'en, cinnamon hiyulhni, 'ink'ez sooltsun dezk'un, khe sooltsun, yoo, Frankincense hiyulhni, mai too, 'ink'ez khe, olive hiyulhni, lhes 'ink'ez lhes hanúyeh, musdus, sheep, yeztli 'ink'ez nuyúlhbas tubulh, dune hubuyust'e 'ink'ez hubuzul chah, ts'iyawh ye 'óoket.” 14 'Et 'uhutni, “Ink'ez soo ts'uyi unzoo zeh kúndunut'a, ndai tube hika' ninzun, 'i chah ts'iyawh nch'a hoolah suli. Ndai dézti 'ink'ez soo 'uwhut'en, ndi ts'iyawh nch'a hoolah suli, 'aw naóonlelh ghait'ah.” 15 Ndunnah ndi be 'ooduket, 'en ndun ts'eke soode'a 'int'ah ubulhtsi, ndun ts'eke ye dzuh nuzut, 'i hiyé nuljut 'et huwa ye 'un cho highu nudelhúya, tube cho hutso, 'ink'ez hukw'e ni hunudleh. 16 'Ink'ez chah 'uhutni,
“Degha nus hoontsi' nghá whults'ut!
Degha nus hoontsi' nghá whults'ut!
'Iyuge! 'Iyuge!
Nyo keyah whut'i naih dulk'un 'ankwus dulhk'us,
'ink'ez dulk'un be húdelhts'i,
'ink'ez gold, tseyaz dunézti,
'ink'ez kw'usul dunezti be nahudelhúts'i.
17 Soo ts'ah'un 'ilhuh hukw'e'hunint'o ndi be soo uzde'a whucho, 'i ts'iya whuzdli.”
'Ink'ez ndunnah ts'i cho be nuke, bumoodih chah, ndunnah whuz na'a 'uhooket 'ink'ez 'oohooket, 'en ts'iyawh ye 'un cho nuhudelhúya. 18 'Ink'ez nyoo dezk'un bulut, 'i hinalh'en hoh tube cho njan nduhútni, “Aw ndóohoont'ah keyah whuti 'aw 'udun whuz na'a keyah whuti hoolah!” 19 'Ink'ez lhez hubutsi k'ehúyidzeh, 'ahúldzul, hutso, hukw'e ni hunudleh, 'ink'ez 'uhutni,
“Degha nus hoontsi' bughá whults'ut!
Degha nus hoontsi' bughá whults'ut!
Nyo keyah whuti ts'i yatoo k'ut núkat ts'iyawh soo hude'a hubulhtsi.
'Ilhuh hukw'e'hunint'o soo ts'ah'un ts'iya whuzdli.”
20 “Nuhwheni yak'uz whut'en 'ink'ez nuhwheni Yak'usda be'ildzun 'ink'ez nuhwheni whel'a,
'ink'ez nus whunilh'en chah ndun ts'eke 'ul'en bulh dahooja,
'et huwa soo cho whunélhnik!
nts'e na'a nuhwhuba nahezya whuz na'a Yak'usda nuhwhuba yuk'elha whulhtsi 'et huwa.”
Keyah whuti Babylon 'aw 'et 'ilhuz 'ustl'e' 'uhóoja
21 'Et lizas ulhtus tse cho buk'ut lhes dunutsut nduwhút'en, 'i yílhchoot 'ink'ez yatoo k'ut taínalh'uz. 'Ink'ez 'utni,
“Soo wheóonujut hoh keyah whuti Babylon whuz na'a Yak'usda nawhuntéyus
'ink'ez 'aw 'o 'at dune nahó'alh ghait'ah.
22 Nela be ts'ujun, 'i 'ujun chah, buzek whé hiye ujun
'ink'ez be ts'újih be hújih,
'aw 'o 'at dune hubuhudóts'o ghait'ah.
Ndunnah lhelhts'un dedowh 'ulh'en,
'en chah 'ilhuz huhoolah tele.
'Ink'ez tse k'ut lhes hundunutsut be duts'o 'et chah 'ilhuz 'uwhuduténilh,
'aw 'o 'at dune 'uhudoots'o ghait'ah.
23 'Aw be whét'en, 'i chah chahootélah.
'Aw nyoh dune lhghu delhts'i,
'et chah 'ilhuz 'uwhuduténilh.
Ndunnah mba 'óoket ndi yun k'ut dune ncha 'uhant'e.
Duyun k'una'a ndi yun k'ut dune lhelhts'un hudedowh nyun nabuna'a 'et huwa.
24 'Ink'ez ndunnah nus whunilh'en, dune Yak'usda be'ilhdzun, 'en hubuzkai,
'ink'ez ndi yun k'ut dune hubanghan,
'en chah ts'iyawh 'en hubuzkai 'i 'int'ah!”
ni, lizas ulhtus.