1 Jesúsra tuna sitacuare peadya tunca beta earacana tura mepehua cuanaque.

—Ijahua cuana ijehuecuina ishu micuana tyaya casa. Tumebaedya micuana cuatsashaya ejeque ujeje, eje bucha ujeje tsehue cuanaque chachane ishu. 2 Cuadishaya micuana, Yusura naruyaju eje buchique quisarati tsape ishu, ujejeda cuanaque chachane ishu jadya.

3 “Yusuja quisarati cuejara cuayaque necadujutiume ni ai buchique. Necadujutiume sari, ni shitara ni ara ishu cuanaque ni chipiru. Asicada juatsu catacati ishu jutu ishuque necadujutiume. 4 Ejeque epuju junatitsu ejera jida batsayaju tuhuadya neanicue, tuja etareju peya epuju dirunucaya tupu. 5 Eju junatiyaju tunara micuana batsacarama ayaju, masadama necuinanacue tuhuaque. Cuinanayaque neitataquenacue muru micuanaja ehuachi juque ‘Aine yatse micuana tsehue juma’ jadya tuna ayaque. Tunadya tuna inime metse, Yusuja quisarati bacacarama ahua tibu, —jadya tuna Jesúsra acuare.

6 Jadya ahuaju tuna cuacuare. Cuacuare tuna dutya epu achacha cuanaju. Yusuja quisarati cueja juyaque, ujejeda cuanaque chachane jadya tuna epu cuanaju juajecuare.

7 Ecuari Herodesratu bacacuare Jesús ai juyaqe, eje bucha juyaque jadya. Turatu bape bape jutidya inime tupucuare Jesús tsehue. Umaetu jucuare: “Jesústu baya ecuita ama. Juan Ecuita Cuana Utsaquique emajuque cacuitatitsu netitsuranucachineque tume” jadya. 8 Peya cuana bacue jucuare: “Elías ecacuitatique jutidya tume”. Peya cuana bacue jucuare: “Jesústu beru Yusu equeque quisarati cuejaquique jutidya, emajuque enetitsuranucaque”. Jadya bacatsatsutu Herodesra eje bucha adebataqui ama bacuare.

9 —Ique taa dyaque bahue Juan emajuque. Eradyatu pititubumerechine. ¿Ejeque ecuita jatsu dyadi tu Jesús? Bacaya taa quisarati ejenetaquique ama, —jadyatu Herodes jucuare.

Bacara ebari tujatu acuare Jesús.

10 Jidaque quisarati cuejara cuadishatanacuare cuanaque juetitsu tunajatu cuejaeticuare Jesús tuna eje bucha jutihua cuanaque. Jadya juatsu tujatu ecana dujucuare peya queja amaca Betsaida epu japadama, tuna canajarasha ishu. 11 Tuna cuahuaque bahue juatsutu ecuita cuana cuacuare tuna sarera. Jesusratu batsacuare ecuita cuana tuaqueja jutihuaju. Cuejacuare tujatu ecana Yusura eje bucha narue ecuana adadiyaque. Chachanecuaretu ujejeda cuanaque.

12 Amena ijeti nubihuietu peadya tunca beta earacana tura mepehua cuanara Jesús jipeticuare.

—Isaracue ecuita cuana. Padiru ecana epu cuanaju, epu ashaasha japadama cuanaju. Pacabacatidiru ecana ara ishu cuanaque, eju tahui ishuque jadya. Rehuari aijama earaqui ni ai buchique tunaja ishu, —jadya tunajatu Jesús aticuare.

13 —Cuadishaya ama tuna era. Micuanaradya ecana nemihuacue, —jadya tuna Jesúsra acuare.

—Rehua rique ecuanaja aniya pishica pan, beta jae jadya piji camadya. ¿Ai tsehue ni rique ecuana mihuama ecuita jetieque ama? Dutya ecuitaja ishu tupu ejuuque juatsu, camadya ecuana ecuau earaqui bacara, —jadya tunajatu acuare.

14 Deca cuana cuita camadya epiyebaque tuna jucuare pishica mil ecuita.

—Jaquetsu jaquetsu ecana neiyabutyabarecue; peadya cuare pishica tunca, peya cuareju pishica tunca nucadya jadya ecana neiyabutyacue, —jadyatu Jesúsra acuare tura mepehua cuanaque.

15 Cuejaya equedya tuna jucuare. Dutya tunajatu ecuita cuana iyabutyacuare. 16 Jadya juatsutu Jesúsra inacuare pishica pan, beta jae jadya. Inatsu tujatu barepaju Yusu aniya queja petacuare. Petayaquetu jucuare:

—Yusurupai mique aya, Tata, mira ecuana riyaque ara ishuque tyahua tibu, —jadya tujatu Yusu acuare.

Yusurupai au jadya aatsu tujatu pan cuana cuesibarecuare. Jadya aatsu tujatu tyabarecuare tura mepehua cuanaque, tunaja ecuita cuana tyabare ishu. Tura ecana pan tyabareya tupu tujatu pan umanashacuare. Dutyaja ishutu tupu jucuare. 17 Dutya tuna araaracuare, pana jeque juya tupu. Amena jadya juhuajutu Jesúsra mepehua cuanara jequeshacuare peadya tunca beta earacana jiti arida cuanaque pan tunara arabishahua cuana tsehue, jae jadya tsehue.

18 Peya huecacatu Jesús cuacuare peya queja amaca Yusu tsehue quisaratira. Tura mepehua cuanaque bacue tuatsehuedya jucuare. Etataque tsehue quisarati amena juatsutu Jesúsra tura mepehua cuanaque bacaduracuare:

—¿Eje buchatu ecuita cuanara ecue ishu inime tupuya? ¿Ai jadya tunara aya? —jadya tujatu ecana acuare.

19 Tunaratu quemitsacuare:

—Umae cuanarami aya Juan Ecuita Cuana Utsaquique emajuque enetitsuranucaque jadya. Peya cuanarami Elías jadya aya. Peya cuanara bacuemi aya beru Yusu equeque quisarati cuejaqui emajuque enetitsuranucaque jadya, —jadya tunajatu acuare.

20 —¿Micuanara bacue, ique ai jadya aya?

—Miquemi Mesías, Yusuja Emepeque, —jadyatu Pedrora quemitsacuare.

21 —Necuejaume jari ni ejeque buchique ique Mesiasque, —jadya tuna Jesúsra acuare.

22 Jesúsra tuna cuejanucacuare:

—IQUE ECUITA dyaque canerecatitaqui. Emuiba cuanara, pae cuanaja huaraji cuanara, cacuatsashati bahuityaqui cuanara jadya dyaque nerecaturadadiya. Iyemeredadiya tunara ique. Quimisha huecaca juatsu chacha netitsuranucaya, —jadya tuna Jesúsra acuare.

23 Jadya juatsu tuna dutya tuhua jucuare cuanaque Jesúsra isaracuare:

—Micuana eatsehue junenicara juyaque juatsu, era cuatsashaya eque neanicue, micuanaja biji eque juneniyaque nime aputatsu, arepa micuana canerecati, maju jadya jutaqui ama bucha, curusuju etata ejuu bucha. 24 Micuana ni catehuatiya eaqueja ecatyatique eiyetauju, ejetsunue ama micuana anibuque. Tume micuana majubuque ni eje tupu Yusu queja judiru ishu ama. Micuana ni eaqueja catyatihua baatsu iyetaya, Yusu tsehue micuana anisiribuque, arepa micuanaja ecuita ririya ama bucha. 25 Ecuita ni Yusu jipema, ijahuaja etiquiju ni judiruya, ni aishu buchique tujatu jida juhua riyaque yahuaju tuja dutya ai anihuaque, arepa dyaque chipiruda paju ama bucha.

26 “Iyacua riyaque yahuajutu aniya ique eje buchique quisarati aishu bisuya cuanaque. Tunajatu bisu aniya ecue quisarati cueja ishu. Ejeque huecaca IQUE ECUITA junanucabuque. Barepaju Yusu tsahuaqui cuanara tajibebuque. Ique junanucayajutu dutyara babuque ecue Etataja casa. Bisunabuquedya ique ecue ishu bisuhua cuana tsehue. 27 Pusha amadya micuana cuejaya. Umae micuana rehuaque majuhuishaya ama, dutya era ecue casa tsehue narutibuneyaque badadiya tupu, —jadya tuna Jesúsra acuare.

28 Jadya juu jadya juatsutu peadya semana junucatsu Jesús tsuracuare emataju Yusu tsehue quisaratira. Dujucuare tujatu Pedro, Santiago, Juan jadya. 29 Yusu tsehue quisaratiyaque tujatu ebutsequini cabapeticuare. Tuja unatu pajada, huecada, dyaque tiquida jucuare. 30-31 Masadaque amatu Moisés yanume, Elías yanume jadya ejitaju jucuare hueca dyaque tiquida ducu. Tume tatse Jesús tsehue quisaratinacuare. Jesús eje bucha iyetanae Jerusalénju judadiyaque tunajatu quisarati acuare. 32 Pedro ecanatu tahui idutaquima baatsu tahuicuaredya. Cabatietitsu tunajatu bacuare Jesús hueca tiquidaja edunu, beta ecuita ecatse tuatsehue netiyaju. 33 Amena Moisés, Elías jadya Jesús quejaque japacuinaajeyajutu Pedro quisaraticuare:

—Ecuana Bahuityaquique, dyaque jida taa ecuana rehua. Eau tuque ecuana quimisha erere, peadya micue ishu, peya Moisésja ishu, peya bacue Eliasja ishu, —jadya tujatu acuare.

Tuque dyaque jecutanahua tibutu ai quisarati ataqui ama jucuare. 34 Pedro quisaratiyajutu barepa juque huanira dunutillacuare. Huanira dunutillaya baatsutu Pedro ecana eanajacata jucuare. 35 Tume tunajatu bacacuare huani ducuque Yusu jadya quisaratiyaju:

—Riyaque rique ecue ebacua dyaque iyuhuedaque. Nebacajacaume. Eje bucha tura cuejaya eque nejucue, —jadya tuna Yusura acuare.

36 Jadya quisaratijacahuaju tunajatu banucacuare ama Moisés, Elías jadya, Jesús camadya. Tunaratu ni ejeque buchique cuejacuare ama tunara eje bucha bahuaque. Jesús barepaju diruhuaju piisi tunajatu cuejacuare.

37 Huecacanucatsutu Jesús, tuatsehue cuahua cuanaque jadya butecuare emata juque. Butehuajutu ecuita jetiera ama tsurutsacuare. 38 Tuna ducuratu Jesús jipeticuare. Jesús jipetitsu tujatu acuare:

—Nerecabacue ique. Riya ecue ebacua behua. Peadyaque piji ri rique ecue. Ijehuecuinacue ecue ebacua juque ijahua cuana. 39 Mididatu amena ijahuara quijahuatishayaque. Quiqueshatilla bahue reja rique. Piririshatilla bahue tuja tuque. Manutu jubahue. Ubajasa tujatu jubahue ecuatsa eque. Ijahuara tuque ecue ebacua dyaque yuamaturaya. Casatilla, nerecatura quijahuatisha jadya aatsutu chamacama cuinana bahue ijahua ebacua piji quejaque. 40 Canerecatihua datse ique mira mepehua cuana queja, ijahua ijehuecuinamere ishu datse. Arepa ijehuecuinacara aya ama bucha, tuna ijehuecuinataquima bahua, —jadyatu ebacua pijija etataquera Jesús acuare.

41 Jadya bacatsutu Jesúsra tuhua cuanaque acuare:

—¡Micuana micuana quejeneti baecua, cuejataqui ama jadya! Arepa micuana era ayaju bahua ama bucha, adebaya ama jaridya tuque micuana Yusuja casa. ¿Eje tupu cuita micuana eiduu? —jadya tujatu ecana acuare.

—Becue requeja micue bacua, —jadyatu Jesúsra acuare ebacua pijija etataque.

42 Ebacua pijira Jesús jipeajeyajutu ijahuara manu amerenucacuare. Tume tujatu yahua catsaqui amerenucacuare. Jesusratu nereda acuare ijahua ebacua piji yuamaturaqui juyaque:

—Cuinanacue riyaque ebacua piji quejaque, —jadya tujatu acuare ijahua.

Jadya quisarati aya tsehuedya cuitadyatu ebacua piji quijahuatijacacuare. Quijahuatishajacatsutu Jesúsra ebacua pijija etataque cuejacuare:

—Jee micue bacua equijahuatijaca juhua, tata, —jadya tujatu acuare.

43 Anajacatacuare tuna tuhua jucuare cuanaque.

—¡Dyaque jida, casada jadya taa Yusu! —jadya tuna jucuare.

Dutya tuhua cuanaque Jesúsra aya cuanaque baatsu eanajacata jarijudyatu Jesúsra anucacuare tura mepehua cuanaque:

44 —Nebacacue jida era cuejayaju. Nenime aputaume bacue. Ejera cuana tsetatsu inameredadiya IQUE ECUITA, —jadya tujatu ecana acuare.

45 Tura mepehua cuanaratu adebacuare ama eje buchique tura jadya ayaque. Arepa quisarati bacaya ama bucha, tunajatu eje bucha adebataqui ama bacuare, Yusuja adebamerema jari tibu. Tuna tuna bajida jucuare, “Pana cueja ecuana acue mira quisarati ahuaque”, jadya aishu.

46 Tumetu Jesúsra mepehua cuanaque caquemitsati caquemitsati jutibunecuare:

—¿Ejeque ecuana dyaque inime metseque?, —jadya tuna cabacaduratibarecuare.

47 Jesusratu adebacuaredya tunara eje bucha inime tupuyaque. Tume tujatu ihuaracuare ebacua piji tuhua netiya baatsu. Ihuaratsu tujatu tuque peque nityacuare.

48 Jadya aatsu tujatu tura mepehua cuanaque cuejacuare:

—Dyaque inime metsequetu dyaque jetiedyaque bucha cabatiyaque. Micuanara ni ecue cuanaque jida tsehue batsaya, arepa tuna riyaque ebacua piji bucha paju ama bucha, idya datse micuanara jida tsehue batsaya. Micuanara ni ique jida tsehue batsaya, tume tuque micuana ecue Etata Ique Cuadishaquique jidadya batsaya, —jadya tujatu ecana acuare.

49 Juantu quisaraticuare Jesús tsehue:

—Ecuana Bahuityaquique, ecuana micue quisarati cuejara cuachine patya, tuque ecuana bachine ejeque cuana ijahua cuana micue ebacaniju ijehuecuina juyaju. Jadya baatsu tuque ecuana achine: “ ‘Jesúsja ebacaniju rique ijahua ijehuecuinaya’ jadya ajacacue, ai mi Jesúsra mepehuaque batu”, —jadyatu Juanra Jesús acuare.

50 Jadya ahuajutu Jesúsra acuare:

—Jadya neaume. Ecuana iyuhueda baquira ecuana ujeu baya ama, —jadyatu Jesúsra acuare.

51 Eje uma huecaca ama Yusu queja dirunuca ishuque aniyajutu Jesús tuja casada inime tsehue cuacara ebari jucuare Jerusalénju, arepa tuhua tuque canerecatiyaque bahue juya ama bucha. 52 Amena cuita cuahuiera tujatu cuadishacuare icueneta umae ecuita cuana eju junatiyaque etare banati ishu. Tuna tuna cuaatsu, junaticuare Samaria yahua epuju. Cuacuare tuna Jesús, tuatsehue cuaya cuanaque jadya eju junati ishuque sarera. 53 Tumeque epuju cuanaratu icuene cuahua cuanaque jadya atsacuare:

—Nudyatsaya ama tuque ecuana Jesús, ni tuatsehue cuaya cuanaque, micuana Jerusalénju cuaya tibu, —jadya tunajatu ecana atsacuare, Samariaju cuanara israelita cuana ujeu baya tibu.

54 Icuene cuahua cuanaque tuna yudijidya dirunuca jucuare Jesús tsurutsa ishu. Tsurutsatsu tunajatu cuejatsacuare tumeque epuju cuanara nudyatsacarama ayaque. Juan, Santiago ecatseratu bacacuare tunara cuejaetiyaju. Jadya bacatsu tatse jadya jucuare:

—¿Miratu bijida baya ecuana Yusu queja bacabaca ishu, tuja barepa juque etiqui butya ishu, tumeque epuju cuanaque iyetillamere ishu, beru Elías etiqui barepa juque butyamere ishu, Yusu queja bacabacacuare bucha? —jadya tatsejatu acuare.

55 Jadya juyaju tatse Jesúsra nereda acuare:

56 —Jadya nequisaratiume. Micuana micuana baecua jari eje bucha juatsu ique riyaque yahuaju jehuaque. IQUE ECUITA jehua aniya cuanaque anishara, tuna iyetillara ama, —jadya tujatu ecatse acuare.

Jadya juatsu tuna dirucuare peya epuju.

57 Tuna ediji eque cuayajutu peadya ecuita quisaraticuare:

—Ebahuityaquique, ique junenicara juya miatsehue eju mique cuayaju, —jadya tujatu Jesús acuare.

58 —Dyaque masada tuque. Equique chapa cuanajatu aniya cani; upati cuanaja bacue eja. IQUE ECUITAja bacue aijama etare tahui ishuque, —jadyatu Jesúsra acuare.

59 Peya tujatu jadya acuare:

—Eatsehue junenicue, eje queja ique cuayaju.

—Ecuatsashaquique, icuene tuque ecue etata narutaqui tuque majuya tupu. Tuque majuhuaju, papatsu piisi miatsehue juneniya. Ihuacue jari ique, —jadya tujatu Jesús acuare.

60 —A, aijama. Iyacuadya eatsehue junenicue. Cuejaticue ecana dutya queja aniya cuanaque Yusura eje bucha narue adadiyaque. Ique adebaya ama cuanaque tuna emaju cuanaque bucha. Tunara inime tsapequi paa ai riyaque yahuaju cuanaque, emaju cuanaque papaya tupu. Peyatu mere aniya micue ishu, —jadya tujatu acuare.

61 Peyaratu Jesús acuare:

—Ecuatsashaquique, ique miatsehue pajuneni. Icuene ecue etareju cuanaque paisarati jari, —jadya tujatu acuare.

62 —A, aijama. Cashanaticue micue ai beru anicuareque. Ejeque paruparuyaque catibene bajiyuyijsvsysjs ama mere tu jidama. Tumebaedya ni mi Yusu mereya micue ai aniya cuanaque cashanaticarama tsehue, ni mi aishudya jutidya jida. —jadyatu Jesúsra acuare.