15
Yavénu Moisés' keñu beesa
1 Tsenñu Moisés bain, naa Israel chachilla bain Yavénu beesanguitu entsandila:
Yavénu beesanguenu tenve;
tsamantsaa keewara jumu tsai keengayave;
naa kawallunu bain,
naa kawallunu chuu vingues jimu chachillanu bain
tsaa lamaasha dekepukive.
2 Yavéya inu dera kumuve;
yanu iya beesanguenu tsuyu;
yaa inu livee kemu tiyave;
yaa in Diosve;
yanu balenguunu tsuyu;
yaa in apa' Diosve;
yanaa aawa kurenu tsuyu.
3 Yavé vinguenchi tsamantsaa juve.
Ya' mumuya Yavé.
4 Yavé faraón' karulanu bain,
naa suutadulanu bain
lamaasha dechukakaakive.
Tsenñu miya' jimu bale suutadula tsamantsa dajka jumula
Ungalala tinu lamaasha depipiya deive.
5 Tsamantsa aasha lamaaren pi tainsha pu' tadive;
shupukaaba ju' chukan tsa dekive.
6 Yavé, ñu' tsamantsa pude urandyaapanguive entsangue'
ñunu kundaa kemulanu millangaami.
7 Ñu' tsamantsaa pudeechi
delandyuli keñungue' tadive,
ñunu kundaa kemulanuya;
ñu' ajararen ñi ju',
yalanu ejke ishtapeeba dejuñu ikakaren tsanguive.
8 Ñu ajaatya' juipu-eeñu,
pi yaitala dewa'di' pisundaren
aa veeta juuñui uidinmala,
tsamantsa aasha lamaaren
pi kejtala pului deelave.
9 Kundaa chachillaya entsa detive:
Bendaa ji' mi'diitu,
ti tadeeñuba dechipake' veenu detsuyu;
peeniya kalare' in tyaapachi detutekenu tsuyu, detive.
10 Tsaaren Yavé, ñuya juipu-eetu, lamaa pi tainsha pukive,
tsenñu pisunda paasha pulumaaba ju' chukan tsa dekive.
11 Yavé, ¿naaju dyus kuramulaa ñu tsaa dejun?
¿Naajulaa ñu tsaa, tsamantsa pude, munuba pullamu,
ti kike'ba tsamantsa jeetyainuu,
tsenmin yuj keenbashiinuu bain kemu dejun?
12 Ñu' tyaapa uske' pudee keewaanmala,
tuya tsaa yalanu llukikive.
13 Ñuya lalanu estyamu' mitya,
ñu' livee ke' manganu chachillanuya naa-i jinuu juñuba keewares jintsuve.
Ñu' pudeechi ñuchin juu tenasha eepunu tajintsuve.
14 Vee vee bulu i' chumu chachilla mere' dejullukenu detsuve,
Filistea chachilla bain wapannu detsuve.
15 Edomsha chumu bale rukulaya tiba kenu jutyu' naaken tsai tiyanu detsuve.
Tsenmala Moabsha chumu balelaya jelanchin dejullukentsunu detsuve.
Tsenmala Canaánsha chumulaya pensa dajkajtu tiyainu detsuve.
16 Yavé, ñunuya tsamantsa jeetyanu dejuve,
naajulaba ñunuya wapana' jelanchin shupuka juuñuu jullujtu tiyainu detsuve,
ñuchi tirenu chachilla kayu pullaindetyuya.
17 Yavé, ñaa yalanu kuwakenuushu juntsa kuyisha taji' chukaanu juve,
ñu' chunu tena mi'ke' kakiñushu junga,
ñuren ke' chujtiñu,
ñu' pupunanu yapayasha.
18 Yavé, ñaa naa-uwanuba rei ju' washke' jintsunu tsuve.
Yavénu María' keñu beesa
19 Faraónchi kawallu jumula, naa karu juula bain, naa kawallunu chuu ne' vinguemu juula bain lamaasha devinmalaren Yavé yalanu pi dewalakikaami. Tsaaren Israel chachillaya lamaa kejtalaren ejke tunu dapuila. 20 Tsenñu Aarón' tsujki, Diosa' mitya pamu shinbu María, kaa kununu main ka' beesanguiñu, vejan shinbula bain kaa kununu dekatu, beelanguisai ya' bendala jila pakaasai jindu, 21 tsenñu María entsangue beesanguemi:
Yavénu beesanguidei,
yaa tsamantsaa ju'ba tsai keewarave,
naa kawallunu bain,
naa kawallunu chuu jimulanu bain
lamaasha dechukakaaketu, tiitimi.
Pi ne saami.
22 Moisés Israel chachillanu Ungalala tinu lamaanu debaka' miya' jiñu, yala tiba den chutyu Sur tinu tenashaa jila, tsejtu pen malu nenduren jaiba pi katai'la. 23 Tsejtu Mará tenabi dejitu, junu pumu pi kushnu jui'la, saañu' mitya. Tsenñaa junu Mará mumu pula, saave titu.
24 Tsejtu junu chachilla Moisésnu vera' tya' na'baasa padundatu entsandi pake'meela: ¿Lala tyee kushnuj deewa? tila. 25 Tsenñu Moisés, Yavénu paka' pañu, Yavé chi dape keewaami. Tsenñu Moisés juntsa chi dape ka' pisha pukenmalan pi sajtu tiyaimi.
Tsejtu Yavé yala naa naaken chunuu dejuñuba mijanu ke' kere' junu lei kuwatu 26 tsandimi: Iyaa ñulla' Dios Yavéyu. Ñulla in palaa mere', iya naaju deechu' juuya kisa tyañuba tsa deke', iya naakide tiñuba demeengue', naa in lei jumula bain naatiñuba juntsanu tsangue demeenguishu juntsaa, iya kaspele Egipto' chullanu naake peya de-ere'ba ñullanuya tsanguen jutyuyu. Iyaa Yavé, ñullanu diluuñuu jutyungue ura' demandiremu juyu, timi.
27 Tsejtu bene Israel chachilla junu putu, Elim tenasha jila. Tsenñu junu tu tainsha faamu pi tene 12 jumi, tsenmin 70 kuku chi keraa bain chula. Tsenñu junu tiba bulla jutyu kajdila kuku chi keraa faapanbeetala.