3
Juan tiba den chutyu tenashamungares nemi.
(Mateo 3.1-12; Marcos 1.1-8; Juan 1.19-28)
1 Kaspee tinbunu Tiberio César, romanola' kayu aa uñi, yumaa 15 añu uudenguen chunu tinbunu Poncio Pilato Judea tusha uñi juwaami; tsenmala Herodesya Galilea tunu uñi pumuwaami; tsenmala Herodes' uñaku Filipoya Iturea tunu bain, Traconítide tunu bain uñi pumuwaami; tsenmala Lisaniasya Abilene tunu uñi pumuwaami. 2 Tsenmala Anásya Caifásba juntsa tinbunu chachilla' mitya Diosnu kalen jimula' kayu aa bale ruku juwaala. Juntsa tinbutala Zacarías' na Juan, tiba den chutyu tenasha neneintsu, Dios pakare' kuinda mijakaakaami. 3 Tsenñu Juan, kumuinchi Jordán pi keetalaya chachillanu demijakares ne', yalanu veta' pensa demangue' Diosnu meengue' mungaradei, tsenmala Dios ñulla' ujcha pitsaanu tsuve, tis neneimi. 4 Entsaa puimiya Diosa' mitya pamu ruku Isaías naati pamuwaañuba tsaitaa tsaimi, entsandimuwaañu:
Tiba den chutyuin tenasha main entsandintsuve:
Bale Ruku' janu miñu ura' mandei,
ñulla' tenbukasha ya' miñu ura' mantse'kaadei.
5 Kumuinchi tu jatsuwatalaya pareju' dematsure',
naa butyutala bain kumuinchi pareju paki' mandei.
Tsenmala binda' miñutalaya ura' mantse'kare',
miñu ura' jutyundalaya jatsuwa' mannu dejuve.
6 Tsenmala Dios chachillanu livee kemu juñu mu bain katanu detsuve, * Isaías 40.3-5 ti' piikemuwaami Isaías.
7 Tsenñu Juan' junga pure' chachilla mungaakutinu jijideiñu, yalanu entsa entsandimi: Ñulla piñi juuñuu anbutimu chachillanuba, ¿maa ñullanu Dioschi taaju i' puinu kaledenashuba, engu jataa livee inu dejuve tiñaa dejayu? 8 Veta' pensa mangue', veelachiba uwain entsala Bale Ruku' miñusha demaañuve tenna keewaadei, ne ñui tene, “Lalaya Abrahamnu sera' jamu deeyu”, tya' daj pensaa keewaatyudei. Matyu uwaindiyu Diosren tsanguindyatuya, naa entsa shupukanu bain Abrahamnu sera' jimu chachi juula bain tirenuu juve. Tsa' mitya tsandyatyudei. 9 Chi tuumu jacha telelebi ma tulekemu jacha yumaa tyayaa ma tsunave. Tsaju' naaju chi bain ura' puka ityuya dedala' ñinbaasha keviimu deeve, timi Juan.
10 Tsenñu chachilla pake'meetu tsa tsandila: Tsaashu juntsaa, ¿naa kenu dejuwa? tiitila.
11 Tsenñu Juan pakatu tsandimi: Pai jali tashu juntsaa, tajtu rukunu ma jali kuwade. Tsenmin mun panda finu tana' bain, veela tajtulanu vele' kuwade, timi.
12 Tsenñu deechu' mitya lushi kamu mantsa rukula bain mungaakutinu deja', Juannu pake'meetu tsandila: Rukui, ¿lalaya tyee kenuu dejuwa? tila.
13 Tsenñu Juan pakatu tsandimi: Bale rukula ñullanu lushi naa naake kanuu juve detiñu bain tsantsan kaketu, yapa katyudei, timi.
14 Tsenñu mantsa suutadula bain pake'meetu: Tsenmala ¿Lalaya tyee kenuu dejuwa? tila.
Tsenñu Juan pakatu tsandimi: Munu bain firu' ken jutyuren tsandi', jeekaapu' anbuti' taanguityudei. Tsenmin naake depaangueñu kan dechu' bain juntsan juuren mikave tyan chudei, timi.
15 Tsenñu junu pumu chachilla yala' pensashaya, “¿Naaju rukutun?” tya', Juannu yuj keenbashintsula: “Entsaaba Dioschi Mi'ke' Kayamu jamaaba jumeete”, tyatya deitu.
16 Tsaaren Juanya kumuinchi chachillanu pakatu tsandimi: Uwain iyaa ñullanu pichee mungaakaakiyu, tsaaren bene jamuya Espíritu Santaa kuwanmala ñulla juntsachee mungaraiñuinu detsuve, tsenmin ñichi bain mungaanu tsuve. Juntsa rukuya kayu inu pulla pudeve. Ya tsaañu iya baleñu' jutyunchin, naa ya' sandalia chuwan juuba malanbu' kuwakenuba jutyuuyu. 17 Juntsa jamu rukuya trigu wa'kare' te'kamu jun tsaa ju', ya' tyaapasha tyami puja'tee pala tanave, trigu ñi ya' chiba devela' kalaanu. Tsanguemiya trigu tsurensha uukare', ya' kuyaa naa-uwanuba manbetyu ñinbaasha kepu' ikakaanu tsuve, ti' laapu' pami Juan.
18 Tsandi' kayu pure' uumi'te' papatitu, Juan Diosa' mika ura kuinda mijakaakaa kemi chachillanu. 19 Tsenmin uñi Herodesnu bain Juan nepami, yaa ya' uñaku Filipo' shinbu Herodíasnun mangañu' mitya, tsenmin kayu vera ti juula bain firu' kiiken chuñu' mitya. 20 Tsejturen kayu jungajte Herodes meenguityu' entsa bain firu' ketu, Juannu tsaa peesu pukemi.
Jesús mungarami.
(Mateo 3.13-17; Marcos 1.9-11)
21 Juan kayu peesu vityumujchi chachillanu mungaantsuñu, Jesús bain mungarami. Tsejtu Jesús Diosba kuinda kentsunu uwanu tsaa selu jurudimi, 22 tsenmalaren Espíritu Santo entsai katawa' wa'pupu keraa yanu pajaimi, tsenñu selusha main entsandiñu meejami: Ñaa in estyanu Nave. Ñu' mitya yuj sundenve, timi.
Jesúschi tinbu aa-apala
(Mateo 1.1-17)
23 Jesús 30 añu juunutalaa ya' taawasha peepumi. Jesúsya José' nave tyamuwaala.
Tsaju' Joséya Elí' nawaanmala,
24 Elíya Matat' nawaami.
Matatya Leví' nawaanmala,
Levíya Melquí' nawaami.
Melquíya Janai' nawaanmala,
Janaiya José' nawaami.
25 Joséya Matatías' nawaanmala,
Matatíasya Amós' nawaami.
Amósya Nahúm' nawaanmala,
Nahúmya Eslí' nawaami.
Eslíya Nagai' nawaanmala,
26 Nagaiya Máhat' nawaami.
Máhatya Matatías' nawaanmala,
Matatíasya Semeí' nawaami.
Semeíya Josec' nawaanmala,
Josecya Joiadá' nawaami.
27 Joiadáya Johanán' nawaanmala,
Johanánya Resá' nawaami.
Resáya Zorobabel' nawaanmala,
Zorobabelya Salatiel' nawaami.
Salatielya Nerí' nawaanmala,
28 Neríya Melquí' nawaami.
Melquíya Adí' nawaanmala,
Adíya Cosam' nawaami.
Cosamya Elmadam' nawaanmala,
Elmadamya Er' nawaami.
29 Erya Jesús' nawaanmala,
Jesúsya Eliézer' nawaami.
Eliézerya Jorim' nawaanmala,
Jorimya Matat' nawaami.
Matatya Leví' nawaanmala,
30 Levíya Simeón' nawaami.
Simeónya Judá' nawaanmala,
Judáya José' nawaami.
José Jonam' nawaanmala,
Jonamya Eliaquim' nawaami.
31 Eliaquimya Meleá' nawaanmala,
Meleáya Mená' nawaami.
Menáya Matatá' nawaanmala,
Matatáya Natán' nawaami.
Natánya David' nawaanmala,
32 Davidya Jesé' nawaami.
Jeséya Obed' nawaanmala,
Obedya Booz' nawaami.
Boozya Sélah' nawaanmala,
Sélahya Nahasón' nawaami.
33 Nahasónya Aminadab' nawaanmala,
Aminadabya Admín' nawaami.
Admínya Arní' nawaanmala,
Arníya Hesrón' nawaami.
Hesrónya Fares' nawaanmala,
Faresya Judá' nawaami.
34 Judáya Jacob' nawaanmala,
Jacobya Isaac' nawaami.
Isaacya Abraham' nawaanmala,
Abrahamya Térah' nawaami.
Térahya Nahor' nawaanmala,
35 Nahorya Serug' nawaami.
Serugya Ragau' nawaanmala,
Ragauya Péleg' nawaami.
Pélegya Éber' nawaanmala,
Éberya Sélah' nawaami.
36 Sélahya Cainán' nawaanmala,
Cainánya Arfaxad' nawaami.
Arfaxadya Sem' nawaanmala,
Semya Noé' nawaami.
Noéya Lámec' nawaanmala,
37 Lámecya Matusalén' nawaami.
Matusalénya Henoc' nawaanmala,
Henocya Jéred' nawaami.
Jéredya Mahalaleel' nawaanmala,
Mahalaleelya Cainán' nawaami.
38 Cainánya Enós' nawaanmala,
Enósya Set' nawaami.
Setya Adán' nawaanmala,
Adánya Diosa' nawaami.