1 Jesús ya' disipululanu tsandimi: Naake' bain ujcha lan jutyuuya jun jutyuve. Tsaaren mun veelanu ujcha laware'ba juntsaya mika taaju i' puinu tsuve. 2 Tsa' mitya main kailla juuñuu keenguemunu ujchaaba lawaanuushu juntsaa, kayu ujcha lawarei'mujchin, aa shupuka kutunu teepuke' lamaasha keviiñaa yachi kayu uraaba junu juve. Matyu uwain juntsangue' ujcha lawaamu chachillaya ili ilikenu aa shupuka kutunu teevi' lamaasha kevi' pipimulanuba pullake taaju kenu detsuve.

3 Naadekeñu bain ura' judei. Ñuba bulu chumu ñunu firu' kenmalaya, nepade. Tsaaren veta' pensa mantu ñunu tsanguityuuba jui'yu tita maanmalaya, kuipa faawaatintsun jutyu tiyade. 4 Naa ma malunuren mandishpai bijee ñunu firu' ketu, mandishpai bijee maja' ñunu: Firu' manguen jutyuyu, tinmalaya, yanu tsan bijee kuipa faawaatintsun jutyu tiyade, timi Jesús.

5 Jesús' mitya kuinda kenu lara' eramu rukula Bale Rukunu tsandila: Lalanu kayu daran keranguekaaka, tila.

6 Tsenñu Bale Ruku yalanu tsandimi: Uwain ñulla' keenguenu pensa mustasa ñi tsantsaa juushu juntsaa, entsa chinu: Enu muya' ji' ferasha mawajkaide, detiñu bain, uwain meenguenu juve, timi.

7 Ñulla mallee taawasha kemu chachi miyatu, juntsa ruku naa wagaralanu tu dejunlekaañu bain, naa panbasha uvejalanu dewashke' maañu bain: ¿Engu ja' chudi' panda ka' fide, timu deeyu? 8 Tsandityumujchi ne entsandimu deeve: Inchi panda ke' tala' kuwaka; tsenmin iya panda fi' kushminguendu kayu vera titi finuu juñu bain detalade. Tsanguetaa bene ñu bain panda fimin kushminguenu juve, timu deeve. 9 Tsenmin yachi taawasha kemu chachi yanu uudenguemu ruku naakide tiñuba kumuinchi juntsangueñu bain, juntsan mitya ura' kive tityu deeve. 10 Tsa' mitya ñui bain Dios tyee kenuu dejuve tiñuba millangue deke' dyamiya entsandidei: Lalaya juñu' jutyu taawasha kemula juuñu deeyu, matyu Dios tyee kide tiñuba juntsaren ne kideke' mitya, tidei, timi.

11 Jesús Jerusalénsha jinu miñuu jindu, Samaria tu kapa bain, Galilea tu kapa bain junu kejtaa tenatala puintsumi. 12 Tsai' jindu ma kaa pebulusha vingumaintsuñu, paitya ruku manbityu bishpeechi tene diluu jumula fale' Jesúsnu katawa' baataa uidila. 13 Tsejtu juntsa dii rukula uti' Jesúsnu patu tsandila: ¡Jesús, lalanu tenbityaka! tila.

14 Tsenñu Jesús dii rukulanu katatu tsandimi: Chachilla' mitya Diosnu kalen jimu rukula' junga ji' keekutiidei, timi Jesús.

Tsenñu juntsa dii rukula jinduren ura' demandiyaila. 15 Tsenñu ma rukuya ya' dii peya demanbiyaañu katatu, jindun masmi' majandu, daran pa' Diosnu yuj urave tisai miimi. 16 Tsejtu juntsa ruku Jesús' ajuusha ya' kajuru tyullake waike' keeware', yuj ura' kive timi. Juntsa ruku Samariasha chumuwaami.

17 Tsenñu Jesús pake'meetu tsandimi: ¿Ura' mandiyamula paitya ruku dejutyuu? ¿Tsen veela mandishtaapai rukulaa naa denain? 18 ¿Tsejtu entsa vee tusha chumu rukuren Diosnu yuj ura' kive tinu majaitu in? timi. 19 Tsejtu Jesús juntsa rukunu tsandimi: Mangujpa' miide, ñu kerangue' mityaa ura' mandiyave, timi.

20 Fariseola Jesúsnu pake'meetu tsandila: ¿Naamaa Diosnu rei juu tananu malun? detiñu, pakatu tsandimi: Diosnu rei juu tananu malu juñu kapukachi entsai kataamu jutyuve. 21 Mu bain: ¡Enu entsanave! naa: ¡Junbi jatsanave! ti baindindejutyuve, matyu ñulla' kejtsapalan Dios yumaa rei juñu' mitya.

22 Tsejtu Jesús ya' disipululanu tsandimi: Ñulla umanbi Chachi Tiya' Nakayamunu naa ma malu' mityan juuñuba mangatanu tyanu detsuve, tsejturen katan dejutyuve. 23 Mantsalaya entsandinu detsuve: ¡Enu entsanave! tsandityu'ba: ¡Junu jatsanave! ti'bandinu dejuve. Naa tsa detiñu bain kerangue' bendaa jityudei. 24 Matyu ma malu Chachi Tiya' Nakayamu maanu uranuya, kuidya pi'ketu naakemun, tsaa selusha nukaba depidyake' manba pi'kemin masku pashaba depitya kemushu, ya' maanu uranu bain tsaanu tsuve. 25 Tsaaren kayu tsai'mujchiren Chachi Tiya' Nakayamu pure' taaju i' pullainu tsuve, tsenmin challa tinbunu chumu chachillachi mutyan kerai'nu tsuve. 26 Matyu Noé' chunu tinbunu naa-i' puimuwaañu bain, Chachi Tiya' Nakayamu' maanu malunu bain juntsaaren junu tsuve. 27 Juntsa tinbunuba Noé kayu ya' baakusha vindyuya, mantsa chachilla panda fin chu'kera, ishkala kujchin chu'kera, mantsalaya supungan chu'ba tsanguendetsuren; Noé baakusha vinmalan, shuwa ja' pi debukenmalaren chachilla depiyaimuwa deeve. 28 Tsenmin kaspele Lot' chunu tinbunu bain tsaren imuwaave: mantsala panda fin chu'kera, binu kujchin chu'kera, atin chu'kera, ati'kan chu'kera, wajken chu'kera, ya bain ke'ba tsanguendetsuren, 29 Lot Sodoma pebulunu malu' mijiinmalaren, selusha ñi bain, ju'kemu asufee bain shuwa pajan tsa-i' chachillanu detutekemuwaave. 30 Naa Chachi Tiya' Nakayamu maja' mangatawanu uwanu bain juntsaaren inu tsuve. 31 Juntsa malunu mun ya kai'sha leka lekakinsha puna' bain yasha buli manganu mavityudei. Tsenmala mun jeendala puna' bain yasha miityudei. 32 Matyu Lot' shinbu naa-imuwaañuba juntsanu mandengakidei.* Génesis 19.15-17, 26 lende. 33 Mun ya' chungamaya maali balengure' livee inu tyashu juntsaa, uwain naa-uwanuba livee inu katan jutyuve; tsaaren in mityan ya' chungama balenguutyu' peyashu juntsaa, naa-uwanuba chumu tiyanu tsuve. 34 Uwaindiyu, juntsa kepe ma tsunjurunu pallu tsuna' bain, mainya kaya' jiñuba, kamainya shuwanu tsuve. 35 Tsenmala pai shinbu tyeeba iliken depu' bain, mainya kaya' jiñuba, kamainya shuwanu tsuve, timi. 36  † Entsa bersikulu 36 griego palaachi manbiike' kaya kiikatala pu' bain, kayu ura' manbiike' kaya kiikatalaya putyuve entsa: Pallu jeenbaasha depu' bain, mainya kaya' jiñuba, kamainya laranu tsuve. 37 Jesús tsandiñu demeetu, ya' disipulula entsandi pake'meela: Bale Ruku, tsen ¿nukaa tsaa inu jun? detiñu, tsandimi: Nuka pete tsuñuba jungaa petyutyu wa'dimu deeve, timi.