1 Ngua sca tsa̱ ngaꞌa̱ Jesús neꞌ laa nclyuꞌu yu jiꞌi̱ ñati̱; nchcuiꞌ yu chaꞌ jiꞌi̱ ycuiꞌ Ndyosi, ñiꞌya̱ nu nduꞌni lyaá Ni jiꞌi̱ nguꞌ. Loꞌo liꞌ lijya̱ lcaa sti joꞌó nu laca loo, loꞌo mstru chaꞌ joꞌó, loꞌo nguꞌ cusuꞌ jiꞌi̱ quichi̱ biꞌ, stuꞌba ti lijya̱ nguꞌ slo Jesús. 2 Nchcuane nguꞌ biꞌ jiꞌi̱ Jesús liꞌ:

―Cachaꞌ clya jiꞌi̱ ya: ¿tilaca nda chacuayáꞌ jinuꞌu̱ chaꞌ cuaꞌni cña nu ndyuꞌni nuꞌu̱? ―nacui̱ nguꞌ.

3 Liꞌ nguxacui̱ Jesús chaꞌ jiꞌi̱ nguꞌ biꞌ:

―Juaꞌa̱ naꞌ xcuane naꞌ sca chaꞌ jiꞌi̱ ma̱ chaꞌ xacui̱ ma̱ chaꞌ ꞌna: 4 ¿Tilaca nda chacuayáꞌ jiꞌi̱ jyoꞌo Juan chaꞌ ntyucuatya yu jiꞌi̱ nguꞌ lacua? ¿Ha ycuiꞌ Ndyosi? ¿Ha ñati̱ chalyuu nda chacuayáꞌ jiꞌi̱ yu?

5 Loꞌo liꞌ nguxana nguꞌ nchcuiꞌ tube nguꞌ loꞌo tyaꞌa nguꞌ:

―¿Ñiꞌya̱ ñacui̱ na juani? ―nacui̱ nguꞌ jiꞌi̱ tyaꞌa nguꞌ―. Si ñacui̱ na chaꞌ ycuiꞌ Ndyosi nda chacuayáꞌ jiꞌi̱ Juan biꞌ, liꞌ ndiꞌya̱ xacui̱ yu jua chaꞌ jiꞌna: “¿Ni chaꞌ ná jlya tiꞌ ma̱ chaꞌ nu nguluꞌu yu lacua?” 6 Si ñacui̱ na chaꞌ ñati̱ chalyuu nda chacuayáꞌ jiꞌi̱ Juan biꞌ ni, liꞌ cujuii nu quiñaꞌa̱ tsa ñati̱ nu ndiꞌi̱ re jiꞌna loꞌo quee, chaꞌ tuꞌba jiꞌi̱ ycuiꞌ Ndyosi chaꞌ nchcuiꞌ Ni loꞌo ñati̱ ngua jyoꞌo Juan biꞌ, ntiꞌ nguꞌ.

7 Liꞌ nguxacui̱ nu nguꞌ tlyu biꞌ chaꞌ ná jlo tiꞌ nguꞌ tilaca nda chacuayáꞌ jiꞌi̱ jyoꞌo Juan biꞌ, chaꞌ ntyucuatya yu jiꞌi̱ nguꞌ.

8 Liꞌ nacui̱ Jesús jiꞌi̱ nguꞌ:

―La cuiꞌ ti naꞌ, ná cachaꞌ naꞌ jiꞌi̱ ma̱ tilaca nda chacuayáꞌ chaꞌ cuaꞌni naꞌ cña re ―nacui̱.

9 Loꞌo ti nguxana Jesús nda sca cui̱i̱ loꞌo nguꞌ nu ndu̱ slo:

―Ntsuꞌu sca nu quiꞌyu nu ntsuꞌu sca loꞌo su ndyataa yu yaca siꞌyu losuꞌ tyixi jiꞌi̱ yu. Loꞌo liꞌ nda yu yuu su nduꞌni yu cña ngüijña xaꞌ ñati̱. Chacuaꞌ liꞌ nduꞌu yu ndyaa yu tyijyuꞌ tyu̱u̱ tsa tyempo. 10 Nu loꞌo cua ndyalaa tyempo suu nguꞌ siꞌyu biꞌ, liꞌ ngulo nu xuꞌna yuu biꞌ cña jiꞌi̱ sca msu jiꞌi̱ yu, chaꞌ tsaa jña jiꞌi̱ nguꞌ nu ndyuꞌni cña neꞌ loꞌo jiꞌi̱ yu, chaꞌ ta nguꞌ sa yuꞌbe siꞌyu nu ngaꞌa̱ chaꞌ tyacua jiꞌi̱ xuꞌna yuu biꞌ. Pana nu nguꞌ biꞌ ni, ngujuiꞌi̱ nguꞌ jiꞌi̱ msu biꞌ, nguloꞌo nguꞌ jiꞌi̱; loꞌo nguxtyu̱u̱ yu ñaa yu slo xuꞌna yu, ni sca na ná nda nguꞌ jiꞌi̱. 11 Liꞌ nda xuꞌna yuu biꞌ chaca msu ndyaa. Pana la cuiꞌ juaꞌa̱ nguaꞌni nguꞌ loꞌo nu chaca msu biꞌ; chiyaꞌa̱ tsa nchcuiꞌ nguꞌ loꞌo, liꞌ ngujuiꞌi̱ nguꞌ jiꞌi̱, loꞌo la cuiꞌ juaꞌa̱ ná nda nguꞌ ni sca siꞌyu jiꞌi̱. 12 Xaꞌ nda xuꞌna yuu biꞌ jiꞌi̱ chaca msu ndyaa, chaꞌ jña yu na nu ntsuꞌu lo cña biꞌ. Pana loꞌo yu biꞌ, tiꞌí tsa nguaꞌni quicha nguꞌ nu ndyuꞌni cña biꞌ jiꞌi̱, ñaꞌa̱ cuayáꞌ nu nguloꞌo nguꞌ jiꞌi̱ nde chu̱ꞌ loꞌo biꞌ.

13 ’Loꞌo liꞌ ngulacua tiꞌ xuꞌna yuu biꞌ: “¿Ñiꞌya̱ cuaꞌni naꞌ juani? Ndiꞌya̱ cuaꞌni naꞌ: Ta naꞌ jiꞌi̱ sñiꞌ ycuiꞌ ca naꞌ nu tyacaꞌa tsa jnaꞌ chaꞌ tsaa ca biꞌ. Ná tyiqueeꞌ tyajaꞌa̱ nguꞌ taquiyaꞌ nguꞌ jiꞌi̱ yu biꞌ”, nacui̱ xuꞌna yuu biꞌ liꞌ. 14 Nu loꞌo naꞌa̱ nguꞌ nu ndyuꞌni cña neꞌ loꞌo biꞌ jiꞌi̱ yu cuañiꞌ chaꞌ lijya̱ yu, liꞌ ndiꞌya̱ nchcuiꞌ nguꞌ loꞌo tyaꞌa nguꞌ: “Yu cua laca nu ntiꞌ chaꞌ quiꞌya jiꞌi̱ cña re. ¿Ñiꞌya̱ cuaꞌni na chaꞌ cujuii na jiꞌi̱ chaꞌ tyanu cña re jiꞌna, chaꞌ caca na xuꞌna loꞌo re?” nacui̱ nu nguꞌ cuxi biꞌ jiꞌi̱ tyaꞌa nguꞌ liꞌ. 15 Hora ti nguloꞌo nguꞌ jiꞌi̱ sñiꞌ xuꞌna yuu biꞌ chu̱ꞌ loꞌo. Liꞌ ndyujuii nguꞌ jiꞌi̱.

Liꞌ nchcuane Jesús jiꞌi̱ nguꞌ nu ndyuna cui̱i̱ biꞌ:

―¿Na laca cuaꞌni nu xuꞌna yuu biꞌ loꞌo nu nguꞌ cuxi biꞌ, ntiꞌ ma̱? 16 Nclyacua tiꞌ naꞌ chaꞌ ca̱a̱ ycuiꞌ xuꞌna yuu tuꞌni, chaꞌ cujuii jiꞌi̱ nu nguꞌ cuxi biꞌ, loꞌo liꞌ ta yuu biꞌ jiꞌi̱ xaꞌ ñati̱ chaꞌ cuaꞌni nguꞌ cña ndacua.

Loꞌo ndyuna nguꞌ chaꞌ biꞌ, liꞌ nacui̱ nguꞌ:

―¡Ná cuaꞌni ycuiꞌ Ndyosi juaꞌa̱!

17 Naꞌa̱ tsa Jesús jiꞌi̱ nguꞌ, liꞌ xaꞌ nchcuiꞌ loꞌo nguꞌ chaca quiyaꞌ:

―¿Ni chaꞌ laca nu nchcuiꞌ quityi cusuꞌ jiꞌi̱ ycuiꞌ Ndyosi lacua? Ndiꞌya̱ nchcuiꞌ quityi biꞌ:

19 Loꞌo liꞌ lcaa sti joꞌó nu laca loo loꞌo nguꞌ mstru chaꞌ joꞌó, ngua tiꞌ nguꞌ chaꞌ xñi nguꞌ jiꞌi̱ Jesús chaꞌ tyaa loꞌo nguꞌ jiꞌi̱ preso la cuiꞌ hora biꞌ; cua ngua cuayáꞌ tiꞌ nguꞌ biꞌ, chaꞌ jiꞌi̱ ycuiꞌ nguꞌ nchcuiꞌ Jesús loꞌo nchcuiꞌ yu cui̱i̱ biꞌ. Pana ntsi̱i̱ nguꞌ xi jiꞌi̱ ñati̱ quichi̱ biꞌ. 20 Liꞌ ngusta nguꞌ jiꞌi̱ ñati̱ chaꞌ tyu̱ cua̱ jiꞌi̱ Jesús, chaꞌ cuiꞌya nguꞌ cuentya ni chaꞌ ta yu; cuaana ti nguaꞌni nguꞌ juaꞌa̱, chaꞌ culacua tiꞌ Jesús chaꞌ ñati̱ tsoꞌo laca nguꞌ. Na cua ntiꞌ nguꞌ chaꞌ cuna nguꞌ sca chaꞌ nu tyuꞌu tuꞌba Jesús, loꞌo liꞌ xquiꞌya chaꞌ biꞌ taca jiꞌi̱ nguꞌ sta nguꞌ quiꞌya jiꞌi̱ yu. Liꞌ tyaa loꞌo nguꞌ jiꞌi̱ yu yaꞌ nguꞌ gobierno, chaꞌ cuaꞌni cuayáꞌ nguꞌ jiꞌi̱ yu. 21 Biꞌ chaꞌ nchcuane nguꞌ cuiñi biꞌ jiꞌi̱ Jesús liꞌ:

―Mstru ―nacui̱ nu nguꞌ cuiñi biꞌ―, jlo tiꞌ ya chaꞌ xcuiꞌ chaꞌ liñi nchcuiꞌ nuꞌu̱. Tsoꞌo tsa ndyuꞌu lcaa chaꞌ nu nguluꞌu nuꞌu̱. Siꞌi na tyacaꞌa la nduꞌni nuꞌu̱ jiꞌi̱ sca nguꞌ; masi culiyaꞌ nguꞌ, masi nchca tsa jiꞌi̱ nguꞌ, stuꞌba ti nduꞌni nuꞌu̱ loꞌo cua ñaꞌa̱ ca ñati̱. Chaꞌ liñi jiꞌi̱ ycuiꞌ Ndyosi ncluꞌu nuꞌu̱. 22 Tyuꞌu chaꞌ clyu tiꞌ jinuꞌu̱, cachaꞌ liñi nuꞌu̱ jiꞌi̱ ya: ¿Ha ntsuꞌu chacuayáꞌ jiꞌna chaꞌ ta na cñi cña loo na jiꞌi̱ rey tlyu nu ndiꞌi̱ xaꞌ tsuꞌ biꞌ, o tsoꞌo la si ná ta na cñi cña loo jiꞌi̱ rey biꞌ? ―nacui̱ ñati̱ biꞌ jiꞌi̱ Jesús.

23 Ngua tii Jesús ñaꞌa̱ chaꞌ cuiñi nu ntsuꞌu tyiquee nguꞌ loꞌo nchcuane nguꞌ jiꞌi̱ yu juaꞌa̱. Liꞌ nacui̱ yu jiꞌi̱ nguꞌ:

―¿Ni chaꞌ laca nchcuiꞌ cuayáꞌ ma̱ juaꞌa̱ loꞌo naꞌ? ―nacui̱ yu jiꞌi̱ nguꞌ―. 24 Culuꞌu ma̱ sca cñi plata ꞌna.

Liꞌ nguluꞌu nguꞌ nu cñi plata biꞌ jiꞌi̱ yu.

―¿Tilaca laca nu ca jiꞌi̱ lcui̱ nu ngaꞌa̱ chu̱ꞌ cñi re? ¿Ti jiꞌi̱ xtañi yu nu nscua chu̱ꞌ cñi re? ―nacui̱ Jesús jiꞌi̱ nu nguꞌ cuiñi biꞌ liꞌ.

25 Nguxacui̱ nguꞌ chaꞌ jiꞌi̱ yu liꞌ:

―Xtañi rey tlyu nu ndiꞌi̱ xaꞌ tsuꞌ, biꞌ ngaꞌa̱ chu̱ꞌ cñi cua ―nacui̱ nguꞌ liꞌ.

―Tsoꞌo ―nacui̱ Jesús liꞌ―, jiꞌi̱ rey tlyu biꞌ tya ma̱ lcaa na nu ngaꞌa̱ chaꞌ ta ma̱ jiꞌi̱ lacua; juaꞌa̱ jiꞌi̱ ycuiꞌ Ndyosi tya ma̱ lcaa na nu ntsuꞌu chaꞌ tya ma̱ jiꞌi̱ Ni.

26 Ná ngujui ñiꞌya̱ nu sta nguꞌ quiꞌya jiꞌi̱ Jesús nde su ndiꞌi̱ nguꞌ quichi̱ biꞌ. Pana ndube tsa tiꞌ nguꞌ jiꞌi̱ yu xquiꞌya chaꞌ nu cua nguxacui̱ yu jiꞌi̱ nguꞌ biꞌ, biꞌ chaꞌ ti̱ tya ndyaa tiꞌi̱ nguꞌ biꞌ liꞌ.

27 Ca tiyaꞌ la liꞌ ndyalaa chaca taju nguꞌ judío, ndyaa naꞌa̱ nguꞌ jiꞌi̱ Jesús. Nguꞌ saduceo laca nguꞌ biꞌ, nguꞌ nu nacui̱ chaꞌ ná ntsuꞌu ni sca jyoꞌo nu taca jiꞌi̱ tyuꞌú chaca quiyaꞌ. 28 Loꞌo liꞌ nacui̱ nguꞌ biꞌ jiꞌi̱ Jesús:

―Mstru ―nacui̱ nguꞌ―, nu ngua saꞌni nguscua jyoꞌo Moisés sca chaꞌ lo quityi nu ndyanu jiꞌna. Ndiꞌya̱ nchcuiꞌ chaꞌ biꞌ: nu loꞌo cua ngujuii sca nu quiꞌyu loꞌo ndyanu tiꞌi clyoꞌo yu, si ná ndiꞌi̱ ni sca sñiꞌ nguꞌ, liꞌ ntsuꞌu chaꞌ jiꞌi̱ tyaꞌa ngula yu nu ntucua ycuiꞌ ti chaꞌ caja clyoꞌo loꞌo nu cunaꞌa̱ tiꞌi biꞌ. Loꞌo caja sñiꞌ nguꞌ liꞌ, sñiꞌ tyaꞌa yu nu cua ngujuii laca sñiꞌ clyo ñacui̱ nguꞌ. 29 Pana ndiꞌya̱ ngua sca quiyaꞌ: Ngutiꞌi̱ cati tyaꞌa nguꞌ quiꞌyu xcuiꞌ tyaꞌa ngula nguꞌ. Ngujui clyoꞌo nu cusuꞌ la, pana ngujuii yu loꞌo bilya caja ni sca sñiꞌ yu. 30 Tyaꞌa ngula yu nu nchca tyucuaa ngujui clyoꞌo loꞌo nu cunaꞌa̱ tiꞌi biꞌ liꞌ, pana la cuiꞌ ti ngujuii yu loꞌo bilya caja sñiꞌ yu. 31 Loꞌo juaꞌa̱ tyaꞌa ngula yu nu nchca tyuna, biꞌ ngujui clyoꞌo loꞌo nu cunaꞌa̱ biꞌ; juaꞌa̱ lcaa tyaꞌa nguꞌ biꞌ, ngujui clyoꞌo nguꞌ loꞌo nu cunaꞌa̱ biꞌ. Pana ngujuii ca taꞌa cati tyaꞌa nguꞌ quiꞌyu biꞌ, loꞌo ni sca sñiꞌ nguꞌ ná ntsuꞌu loꞌo nu cunaꞌa̱ biꞌ. 32 Ca su ndye chaꞌ liꞌ, loꞌo nu cunaꞌa̱ biꞌ ngujuii liꞌ ―nacui̱ nguꞌ jiꞌi̱ Jesús―. 33 Nu loꞌo tyuꞌú lcaa jyoꞌo chaca quiyaꞌ, ¿tilaca laca nu caca clyoꞌo nu cunaꞌa̱ biꞌ chañi ca? Loꞌo ngutuꞌú nu cunaꞌa̱ biꞌ chalyuu, ngujui clyoꞌo choꞌ loꞌo tsaca yu, loꞌo liꞌ ngujui clyoꞌo choꞌ loꞌo chaca yu, ñaꞌa̱ cuayáꞌ nu ngujui clyoꞌo loꞌo ca taꞌa cati tyaꞌa nguꞌ biꞌ. ¿Tilaca laca nu chañi ca chaꞌ ngua clyoꞌo choꞌ biꞌ?

34 Liꞌ nguxacui̱ Jesús chaꞌ jiꞌi̱ nguꞌ biꞌ:

―Nde chalyuu cua ñaꞌa̱ ca nguꞌ quiꞌyu loꞌo nguꞌ cunaꞌa̱ ndyiji clyoꞌo nguꞌ. 35 Pana ñati̱ nu caja chaca chalyuu nu ná ngaꞌa̱ chaꞌ tye jiꞌi̱ nguꞌ ca slo ycuiꞌ Ndyosi ni, nu loꞌo tyuꞌú nguꞌ biꞌ chaca quiyaꞌ, ngaꞌaa caja clyoꞌo nguꞌ, ni ngaꞌaa ta nguꞌ jiꞌi̱ sñiꞌ nguꞌ chaꞌ caca clyoꞌo nguꞌ, 36 chaꞌ ca biꞌ ngaꞌaa ntsuꞌu chaꞌ cajaa nguꞌ tsiyaꞌ ti. Caca nguꞌ biꞌ ñiꞌya̱ laca xca̱ nu ndiꞌi̱ slo ycuiꞌ Ndyosi; caca nguꞌ sñiꞌ ycuiꞌ Ndyosi tsiyaꞌ ti, chaꞌ cua ndyuꞌú nguꞌ chaca quiyaꞌ. 37 Jyoꞌo cusuꞌ Moisés ndachaꞌ jiꞌna chaꞌ chañi chaꞌ tyuꞌú jyoꞌo ñati̱ chaca quiyaꞌ. Lo quityi biꞌ nguscua Moisés ñiꞌya̱ ngua loꞌo naꞌa̱ yu yaca caꞌcña ti nu ndyatu̱ quiiꞌ tyucui ñaꞌa̱ lo yaca biꞌ, pana ná ndye ndyaqui̱ biꞌ. Liꞌ nguañi nchcuiꞌ ycuiꞌ Ndyosi laja quiiꞌ biꞌ loꞌo nacui̱ Ni chaꞌ Xuꞌna jyoꞌo Abraham laca Ni, Xuꞌna jyoꞌo Isaac laca Ni, Xuꞌna jyoꞌo Jacob laca Ni. Ñati̱ tyaꞌa na nu ngutiꞌi̱ chalyuu re cua saꞌni la ngua nguꞌ jyoꞌo biꞌ. 38 Pana ná nacui̱ quityi biꞌ, chaꞌ na cua ngua ycuiꞌ Ndyosi Xuꞌna nguꞌ biꞌ, masi ñaꞌa̱ ti tya laca Ni Xuꞌna nguꞌ biꞌ juani; juaꞌa̱ ndyuꞌu chaꞌ biꞌ. Biꞌ chaꞌ loꞌo jiꞌi̱ ñati̱ luꞌú laca Ni loo, loꞌo juaꞌa̱ ntiꞌ tsa Ni chaꞌ lcaa ñati̱ chalyuu tyiꞌi̱ cuentya jiꞌi̱ ycuiꞌ Ni ―nacui̱ Jesús.

39 Liꞌ nacui̱ sca tucua ti mstru chaꞌ joꞌó biꞌ jiꞌi̱ Jesús:

―Cusuꞌ, tsoꞌo tsa nchcuiꞌ nuꞌu̱ ―nacui̱ nguꞌ jiꞌi̱.

40 Ndyutsi̱i̱ nguꞌ liꞌ. Ngaꞌaa nguaꞌni tyiquee nguꞌ chaꞌ chcuiꞌ nguꞌ xi xaꞌ la chaꞌ loꞌo Jesús.

41 Liꞌ nchcuane Jesús jiꞌi̱ nguꞌ:

―¿Ni chaꞌ laca nacui̱ nguꞌ chaꞌ rey David ngua jyoꞌo cusuꞌ jiꞌi̱ Cristo? 42 Ndiꞌya̱ chaꞌ nguscua ycuiꞌ David biꞌ lo quityi Salmos:

45 Loꞌo liꞌ nchcuiꞌ Jesús loꞌo nu nguꞌ nu ndyaca tsaꞌa̱ jiꞌi̱. Loꞌo juaꞌa̱ lcaa ñati̱ nu ndiꞌi̱ slo nchcaꞌa̱ jyaca̱ nguꞌ jiꞌi̱ chaꞌ nu nchcuiꞌ Jesús loꞌo nguꞌ biꞌ:

46 ―Tii ti tiꞌ ma̱ chaꞌ ná cñiloꞌo mstru chaꞌ joꞌó jua jiꞌi̱ ma̱. Ndiya tsa tiꞌ mstru biꞌ, chaꞌ laca nguꞌ tlyu; biꞌ chaꞌ lacuꞌ nguꞌ biꞌ lateꞌ tyucui̱ cuꞌ, chaꞌ lye tsa cuaꞌni chi̱ nguꞌ loo nguꞌ biꞌ loꞌo tsaa nguꞌ biꞌ lcayaꞌ, juaꞌa̱ ntiꞌ nguꞌ mstru biꞌ. Xcuiꞌ lo yaca xlya nu tsoꞌo la ñaꞌa̱ ntyucua nguꞌ biꞌ neꞌ laa jiꞌi̱ nguꞌ, juaꞌa̱ ntyucua nguꞌ biꞌ ca su tsoꞌo la loꞌo ndyaꞌa̱ nguꞌ biꞌ taꞌa. 47 Hasta nxlyaá nguꞌ biꞌ ñaꞌa̱ tsaca niꞌi̱ jiꞌi̱ nu cunaꞌa̱ tiꞌi. Cñiloꞌo ti nguꞌ biꞌ jiꞌi̱ ñati̱ chaꞌ ñati̱ tsoꞌo laca nguꞌ biꞌ; biꞌ chaꞌ quiñaꞌa̱ tsa chaꞌ joꞌó nchcuiꞌ nguꞌ, tyiqueeꞌ tsa nchcuiꞌ nguꞌ loꞌo ycuiꞌ Ndyosi liꞌ. Pana tucua chaꞌ ntsuꞌu tyiquee nguꞌ biꞌ; biꞌ chaꞌ tlyu la chaꞌ tiꞌí caca jiꞌi̱ nguꞌ biꞌ, lye la chcubeꞌ nguꞌ biꞌ liꞌ.