7
Ni tsa lo tyaꞌa nguꞌ Israel nu cua ngaꞌa̱ cuayáꞌ jiꞌi̱ ycuiꞌ Ndyosi nde tyaca̱a̱ nguꞌ
1 Tiyaꞌ la liꞌ naꞌa̱ naꞌ jiꞌi̱ jacua tyaꞌa xca̱ jiꞌi̱ ycuiꞌ Ndyosi; naꞌa̱ naꞌ nde quiyaꞌ chalyuu, nde jacua seꞌi̱ su ndu̱ nu jacua tyaꞌa nguꞌ xca̱ biꞌ. Ndacaꞌa xca̱ biꞌ jiꞌi̱ ca taꞌa jacua cuiꞌi̱ nu nclyatuꞌu lo chalyuu; ngaꞌaa nda nguꞌ xca̱ biꞌ chacuayáꞌ culatuꞌu cuiꞌi̱ biꞌ, masi nde lo yuu, masi nde tyujoꞌo, ni sca chu̱ꞌ yaca ná culatuꞌu cuiꞌi̱. 2 Liꞌ naꞌa̱ naꞌ nduꞌu tucua chaca yu xca̱, nu nduꞌu tucua lijya̱ nde su ntyucua cuichaa. Ndyiꞌya yu cuayáꞌ nu cua nda ycuiꞌ Ndyosi jiꞌi̱ yu, chaꞌ cuaꞌa̱ yu hichu̱ꞌ ñati̱ jiꞌi̱ ycuiꞌ Ndyosi; la cuiꞌ Ni nu nda chalyuu jiꞌna laca biꞌ. Cui̱i̱ nchcuiꞌ yu loꞌo nu jacua tyaꞌa xca̱ nu ntsuꞌu chacuayáꞌ jiꞌi̱ chaꞌ cuaꞌni ñuꞌu̱ jiꞌi̱ chalyuu loꞌo jiꞌi̱ tyujoꞌo. 3 Ndiꞌya̱ nchcuiꞌ yu loꞌo nguꞌ xca̱ biꞌ liꞌ:
―Ná calaꞌ ma̱ chalyuu, ná calaꞌ ma̱ tyujoꞌo, ná calaꞌ ma̱ yaca; tya lyiji cuaꞌa̱ ycuiꞌ Ndyosi cuayáꞌ nde tyaca̱a̱ ñati̱ nu ndyuꞌni cña jiꞌi̱ ycuiꞌ Ni.
4 Liꞌ nguluꞌu nguꞌ ꞌna ni tsa lo tyaꞌa ñati̱ nu cua nguaꞌa̱ ycuiꞌ Ndyosi cuayáꞌ nde tyaca̱a̱ nguꞌ; sca siyento ntucua tuꞌba ntucua jacua mil tyaꞌa ñati̱ laca biꞌ. Tyuꞌu nguꞌ biꞌ jiꞌi̱ nu tii tyucuaa tyaꞌa taju nguꞌ Israel, nu sca xtañi laca jiꞌi̱ sca taju nguꞌ:
5 Tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Judá nu nguaꞌa̱ ycuiꞌ Ndyosi cuayáꞌ jiꞌi̱,
cuati tyuꞌu chaca tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Rubén,
cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Gad,
6 cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Aser,
cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Neftalí,
cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Manasés;
7 la cuiꞌ juaꞌa̱ tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Simeón,
cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Leví,
cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Isacar,
8 cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Zabulón,
cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi José,
cuati tyuꞌu tii tyucuaa mil tyaꞌa ñati̱ jiꞌi̱ nguꞌ tyaꞌa xtañi Benjamín.
Tsa lo cua ti tyaꞌa nguꞌ Israel nguaꞌa̱ ycuiꞌ Ndyosi cuayáꞌ jiꞌi̱.
Nu xaꞌ la ñati̱ tyucui ñaꞌa̱ chalyuu nu ta ycuiꞌ Ndyosi lateꞌ ngati̱ jiꞌi̱
9 Tiyaꞌ la liꞌ naꞌa̱ naꞌ ndu̱ tsa tlyu ti ñati̱ nu cua nguaꞌni lyaá Jesús jiꞌi̱; quiñaꞌa̱ tsa ñati̱ ngaꞌa̱, biꞌ chaꞌ ná tucui ngua jiꞌi̱ culacua jiꞌi̱ ñati̱ biꞌ. Tyucui ñaꞌa̱ chalyuu mala su ndiꞌi̱ ñati̱ ngutuꞌu nguꞌ ya̱a̱ nguꞌ; lcaa lo ñati̱ chalyuu ya̱a̱, chaꞌ cua ñaꞌa̱ ca quichi̱ tyi nguꞌ ngutuꞌu nguꞌ, cua ñaꞌa̱ ca lo chaꞌcña nu nchcuiꞌ ñati̱ chalyuu nchcuiꞌ nguꞌ biꞌ. Ndyatu̱ nguꞌ nde loo su ntucua yaca xlya tlyu, nde loo su ndu̱ nu ñiꞌya̱ ñaꞌa̱ xlyaꞌ biꞌ. Lateꞌ ngati̱ lacuꞌ nguꞌ, ntucua lacaꞌ nguiña yaꞌ nguꞌ ndu̱ nguꞌ. 10 Cui̱i̱ nchcuiꞌ nguꞌ liꞌ:
Cuaꞌni tlyu na jiꞌi̱ ycuiꞌ Ndyosi nu Xuꞌna na nu ntucua lo yaca xlya tlyu,
la cuiꞌ biꞌ laca nu nduꞌni lyaá jiꞌna,
nacui̱ nguꞌ jiꞌi̱ tyaꞌa nguꞌ;
juaꞌa̱ nu ñiꞌya̱ ñaꞌa̱ xlyaꞌ biꞌ nduꞌni lyaá jiꞌna,
nacui̱ nguꞌ. 11 Loꞌo juaꞌa̱ lcaa xca̱ jiꞌi̱ ycuiꞌ Ndyosi, loꞌo nguꞌ biꞌ ndu̱ nguꞌ nde chu̱ꞌ su ntucua yaca xlya biꞌ; nde chu̱ꞌ su ndu̱ naꞌni tacati biꞌ, nde chu̱ꞌ su ndu̱ nguꞌ cusuꞌ, ca biꞌ ndiꞌi̱ nguꞌ. Ndyaa stii nguꞌ nde loo nguꞌ lo yuu liꞌ, chaꞌ cuaꞌni tlyu nguꞌ jiꞌi̱ ycuiꞌ Ndyosi. 12 Liꞌ nacui̱ nu nguꞌ xca̱ biꞌ:
Juaꞌa̱ caca chaꞌ lacua; cuaꞌni tlyu na jiꞌi̱ Ni, cuaꞌni chi̱ na loo Ni,
tya na xlyaꞌbe jiꞌi̱ ycuiꞌ Ni.
Chcuiꞌ na chaꞌ lcaa chaꞌ jlo tiꞌ Ni, na jiꞌi̱ Ni laca lcaa lo na nu ntsuꞌu chalyuu;
lcaa lo cña tsiyaꞌ ti nchca jiꞌi̱ Ni cuaꞌni Ni, sca ti ycuiꞌ Ni ntsuꞌu chacuayáꞌ jiꞌi̱ Ni cuaꞌni Ni lcaa cña.
Lcaa yija̱ ná ngaꞌa̱ chaꞌ tye chaꞌ juaꞌa̱ caca jiꞌi̱ ycuiꞌ Ndyosi Sti na.
Chañi chaꞌ juaꞌa̱ caca.
Juaꞌa̱ nacui̱ nguꞌ xca̱ jiꞌi̱ tyaꞌa nguꞌ.
13 Liꞌ nchcuane sca nguꞌ cusuꞌ jnaꞌ:
―¿Tilaca laca ñati̱ nu nchcuꞌ lateꞌ ngati̱, ntiꞌ nuꞌu̱? ―nacui̱―. ¿Macala nduꞌu ñati̱ biꞌ lijya̱?
14 ―Ná jlo tiꞌ naꞌ, Cusuꞌ. Culuꞌu nuꞌu̱ xi jnaꞌ ―ni naꞌ jiꞌi̱.
Nchcuiꞌ nu cusuꞌ loꞌo naꞌ liꞌ:
―Cua nteje tacui ca ti chaꞌ lye tsa nchcubeꞌ ñati̱ biꞌ, xquiꞌya chaꞌ ngusñi nguꞌ chaꞌ jiꞌi̱ Jesús ―nacui̱ nu cusuꞌ jnaꞌ―. Cua laca lacuꞌ nguꞌ lateꞌ ngati̱; cua ngua lubii neꞌ cresiya jiꞌi̱ nguꞌ laca chaꞌ biꞌ, xquiꞌya chaꞌ cua ngujuii nu ñiꞌya̱ ñaꞌa̱ xlyaꞌ biꞌ lo crusi cuentya jiꞌi̱ nguꞌ. 15 Biꞌ chaꞌ ndu̱ nguꞌ nde loo su tlyu su ntucua ycuiꞌ Ndyosi juani ―nacui̱ nu cusuꞌ biꞌ―, chaꞌ tsa̱ loꞌo talya ndyuꞌni nguꞌ biꞌ cña jiꞌi̱ Ni ca su ndiꞌi̱ Ni. Ycuiꞌ Ni nu ntucua lo yaca xlya tlyu biꞌ tyanu cacua ti su ndiꞌi̱ nguꞌ, chaꞌ cuaꞌa jiꞌi̱ nguꞌ chaꞌ ná tyacua chaꞌ cuxi jiꞌi̱ nguꞌ. 16 Ngaꞌaa tyucua chaꞌ ntyuteꞌ nguꞌ biꞌ chaca quiyaꞌ, ni ngaꞌaa tyucua chaꞌ nguityi nguꞌ hitya; ngaꞌaa tsumi̱ꞌ xee cua̱ jiꞌi̱ nguꞌ, ni ngaꞌaa ca chiyaꞌa̱ tiꞌ nguꞌ loꞌo tyiqueꞌ cua̱. 17 Ñaꞌa̱si̱i̱ nu ñiꞌya̱ ñaꞌa̱ xlyaꞌ biꞌ jiꞌi̱ nguꞌ, chaꞌ ndiꞌi̱ Ni la cuiꞌ ca su ntucua ycuiꞌ Ndyosi loo; biꞌ laca nu tsaloꞌo jiꞌi̱ nguꞌ su caja hitya coꞌo nguꞌ chaꞌ caja chalyuu cucui jiꞌi̱ nguꞌ liꞌ. Loꞌo juaꞌa̱ xquityi Ni hitya cloo nguꞌ chaꞌ ngaꞌaa cunaa nguꞌ liꞌ.