4
Ngiꞌni tnun neꞌ ꞌin Ndiose nde seꞌen ndukwa Ni niꞌ kwan
1 Chunꞌ ndiꞌin la naꞌaǎn kwiꞌyaǎn la niꞌ kwan, naꞌaǎn chaꞌ ndukwa laa ska tunaꞌan la kwa bra kanꞌ. Loꞌo xiyaꞌ nganen nchkwiꞌ ti kwiꞌ nu tka ykwiꞌ ti loꞌoǔn tsan; sa ñaꞌan nnen ndaꞌa neꞌ kuwi chkwan, kwiꞌ ngwañaꞌan msiꞌya Ni kanꞌ bra nu ykwiꞌ Ni loꞌoǔn. Nde ndiya chaꞌ nu ykwiꞌ Ni loꞌoǔn bra kanꞌ:
―Skween lyaa kaan nde re, chaꞌ kwaꞌuǔn ꞌiin nchga nan nu ndiꞌin chaꞌ ka nu ndyaa nde loo la.
2 Bra ti mbiꞌya Tyiꞌi Ndiose chuǔnꞌ bra kanꞌ. Jluꞌwe niꞌ kwan, kanꞌ naꞌaǎn ndukwa ska yka xlya tnun nu suꞌwe ꞌa ñaꞌan. Nde kwa ndukwa ska nu suꞌwa ñaꞌan loꞌo nten. 3 Xaa ꞌa ñaꞌan tloo yu kula nu ndukwa la kwa, tyun kolo nsuꞌwi tloo Ni, sa ñaꞌan lka kee xaa ngutsi, sa ñaꞌan lka kee xaa ngaꞌa. Tyiꞌiin chunꞌ seꞌen ndukwa Ni nduun kunan taa nu ngaꞌá xaa. 4 Nde chunꞌ la ndukwa xka ta yka xlya; lo yka kanꞌ ndukwa kala ndukwa jakwa yu kula, sa lo skwi ndukwa neꞌ tyiꞌiin chunꞌ seꞌen ndukwa Ni bra kanꞌ. Lkuꞌ yu kula kanꞌ teꞌ ngaten, loꞌo ngwañaꞌan ndukwa sneꞌ oro ke skaa yu. 5 Lye ꞌa nganen tiꞌyu bra kanꞌ, lye ꞌa ndyuwi seꞌen ndukwa Ndiose bra kanꞌ. Nde loo seꞌen tnun seꞌen ndukwa Ni, nde kwa nduun kati kityee skan nchkin, kanꞌ lka kati kwiꞌin luwi nu lka Tyiꞌi Ndiose nu ndyoꞌo ndyaa tyukwi ñaꞌaan chalyuu. 6 Nde loo seꞌen ndukwa Ni, mskeꞌ tiǎnꞌ naꞌaǎn ska tiyuꞌ; ñaꞌan tiꞌ ska kunan, xaa ꞌa tyukwi ñaꞌaan lo ran.
Nchga chunꞌ seꞌen ndukwa yka xlya tnun kanꞌ, nde kwa nduun jakwa nu luꞌu ñaꞌan tiꞌ ꞌni, ngwañaꞌan ñaꞌan ran; nduun iꞌ kwan. Tyukwi ñaꞌaan iꞌ ndukwa kiloo iꞌ; ni siya nde siꞌ iꞌ, ni siya nde chunꞌ iꞌ ndukwa kiloo iꞌ. 7 ꞌNi nu nchka kulo ni, ñaꞌan tiꞌ ska kwichi, ngwañaꞌan ñaꞌan iꞌ; ꞌni nu nchka tukwa ni, ñaꞌan tiꞌ ska toro, ngwañaꞌan ñaꞌan iꞌ; ꞌni nu nchka snan ni, suꞌwa ñaꞌan loꞌo ska nten; ꞌni nu nchka jakwa ni, ñaꞌan tiꞌ la kwiꞌya nu ndukwi niꞌ kwan, ngwañaꞌan ñaꞌan iꞌ bra kanꞌ. 8 Skaa ꞌni kanꞌ nsuꞌwi skwa jlyuꞌwe iꞌ; ndukwa kiloo iꞌ ñaꞌaan chunꞌ jlyuꞌwe iꞌ, loꞌo ñaꞌaan niꞌ jlyuꞌwe iꞌ ndukwa kiloo iꞌ. Nchga bra ngala tuꞌwa iꞌ tsan loꞌo tla:
Xkwiꞌ luwi ꞌa kasiya ꞌin Ndiose nu nchga tñan nchka ꞌin, ndukwin iꞌ xa nu ngala tuꞌwa iꞌ bra kanꞌ.
Nu ngwa ti kulo luꞌu Ndiose, kwiꞌ ngwañaꞌan luꞌu Ni ni, loꞌo ti luꞌu la Ni tyempu nde loo la.
Ngwañaꞌan ndukwin iꞌ xa nu ngala tuꞌwa iꞌ bra kanꞌ.
9 Taꞌa ti ngala tuꞌwa taꞌa jakwa ꞌni kti kanꞌ bra kanꞌ. Ngiꞌni tnun iꞌ ꞌin Ndiose, suꞌwe nchkwiꞌ iꞌ ꞌin Ni, ndya ꞌa iꞌ xuꞌwe ꞌin Ndiose nu ndukwa lo yka xlya tnun kanꞌ, chaꞌ nchga bra luꞌu Ni siyaꞌ ti. 10 Nchga yaꞌ nu ngala tuꞌwa ꞌni kanꞌ, loꞌo mduun xtyinꞌ yu kula kanꞌ tloo Ndiose seꞌen ndukwa Ni lo yka xlya tnun kanꞌ bra kanꞌ; ngiꞌni tnun yu kula kanꞌ ꞌin Ni chaꞌ nchga bra luꞌu Ni siyaꞌ ti. Ngwiꞌya yu kula kanꞌ sneꞌ oro nu ndukwa ke neꞌ, nguun neꞌ ꞌin ran nde loo seꞌen ndukwa Ndiose bra kanꞌ. Loꞌo nde ñaꞌan ykwiꞌ neꞌ loꞌo Ni bra kanꞌ:
11 Ndiose Xꞌnan ba, ndiꞌin chaꞌ kuꞌni tnun ba ꞌiin, chaꞌ chkwiꞌ chaꞌ suꞌwe ba ꞌiin, ndukwin neꞌ.
Nuꞌwin, nchka ꞌiin kuꞌnii nchga lo tñan siyaꞌ ti nu nchka tiiꞌ kuꞌnii lo chalyuu.
Nuꞌwin, wa ngwiñaan nchga lo nan nu nsuꞌwi lo chalyuu; chabiyaꞌ ꞌiin luꞌu nchga nan, chaꞌ nuꞌwin ndaa chabiyaꞌ chaꞌ ndiꞌin nchga nan luꞌu.
Ngwañaꞌan ndukwin neꞌ xa nu ngala tuꞌwa neꞌ bra kanꞌ.