1  Sabbath poeng kah a cuek hnin mincang hi ah bo-ul a hmoel te a khuen uh tih phuel la cet uh. 2  Tedae phuel lamkah lungto vik a paluet te a hmuh uh. 3 A kun uh vaengah tah Boeipa Jesuh pum te hmu uh pawh. 4  He kawng dongah amamih te ingang la a om vaengah hlang panit te himbai leklek a phaa la tarha a pai pauh. 5  Amih khaw lakueng ngaiha neh om uh tih diklai la a maelhmai a buluk uh. Te vaengah amih te, “Balae tih aka hing te aka duek taengah na toem uh. 6  Mat 16. 21; 17. 22,23; 20. 18,19; Mark 8. 31; 9. 31; 10. 33,34; Luke 9. 22; 18. 31-33. He ah a om moenih thoo coeng. Galilee ah a om vaengah nangmih taengah a thui te poek uh. 7 'Hlang capa he hlang tholh kut ah a voeih vetih a tai ni, a thum hnin ah a thoh ham a kuek,’ a ti ta,” a ti rhoi. 8  A ol te a poek uh van dongah, 9  phuel lamloh bal uh tih hlaiat taeng neh a tloe rhoek boeih taengah puen uh. 10 Te vaengah Magadala Mary, Joanna, Jakob manu Mary khaw om. Te phoeiah amih taengkah a tloe rhoek long khaw caeltueih rhoek taengah a thui pauh. 11  Tedae amih taengah tah cil ol bangla a om pah dongah a hnalval takuh. 12  Peter tah thoo tih phuel la yong. Te phoeiah a sawt thuk hatah himbai bueng te a hmuh. Te dongah amah khaw aka om hno dongah ngaihmang la khoe uh.

13  Amah tekah khohnin ah Jerusalem lamkah phalong sawmrhuk aka hla, a ming ah Emmaus vangca la khoem aka cet rhoi te om. 14  Amih rhoi loh te rhoek kah aka thoeng hno boeih te khatneh khat taengah a thui rhoi. 15  A thui rhoi tih a oelh uh rhoi vaengah Jesuh amah long khaw a paan tih amih rhoi te a puei. 16  Tedae anih te a hmat pawt ham a mik a buem bah. 17 Te phoeiah amih rhoi te, “Aka cet paitai loh khatneh khat taengah na saep rhoi te mebang olka nim he,” a ti nah hatah a hmueprhut la pai rhoi. 18 Te dongah Kleopas aka ming nah loh anih te a doo tih, “Namah loh Jerusalem te na kuepkol thil dae tihnin kah a khuiah aka om te na ming mahnim?” a ti nah.

19 Te vaengah amih rhoi te, “ Aba e te?” a ti nah.

Te rhoi van loh amah te, “Nazareth Jesuh kawng ca, anih tah tonghma pa la om, a khoboe neh a ol khaw Pathen neh pilnam boeih taengah a thaom. 20  Anih te mamih kah khosoihham rhoek neh boei rhoek loh dueknah neh laitloek thil ham a voeih uh tih a tai uh. 21  Tedae Israel tlan ham aka cai tah anih ni tila kaimih loh ka ngaiuep uh. Te boeih te khaw a poeng tih, tahae kah hno a om lamloh a thum hnin pataeng a pha coeng he. 22  Kamamih khuikah huta hlangvang long khaw kaimih n'limlum sakuh. Phuel ah yue om uh coeng. 23  Tedae a pum te hmu uh mueh la ha pawk uh. Puencawn rhoek kah mangthui a hmuh te khaw a thui uh. Amah a hing te amih loh a thui uh. 24 Te dongah kaimih taengkah hlangvang tah phuel la cet uh. Te vaengah huta rhoek loh a thui bangla a hmuh uh van tangloeng tih amah te tah hmu uh pawh,” a ti nah rhoi.

25  Te vaengah amah loh amih rhoi te, “ Hlangang rhoi aw, na thinko a rhihnun cukduk la, tonghma rhoek loh a thui te boeih tangnah rhoi saw. 26  Khrih te a patang phoeiah a thangpomnah khuila a kun te a kuek moenih a?” a ti nah.

27  Moses lamkah a tong tih tonghma rhoek boeih neh cacim boeih khuiah khaw amah kawng te amih ham a thuicaih pah coeng. 28  Vangca te vat a pha uh vaengah amah tah voelh cet la sa uh. 29  Tedae amah te a hloh rhoi tih, “Kaimih rhoi taengah rhaeh mai , hlaem a pha tih khohnin khaw khum coeng,” a ti nah.

Te dongah amih rhoi taengah rhaeh hamla kun. 30 A tue a pha tih amih rhoi taengah a ngol puei. Vaidam te a loh tih a uem phoeiah a aeh tih amih rhoi te a paek. 31 Te vaengah a mik tah a tueng pah rhoi tih amah te a hmat rhoi. Tedae amah tah amih rhoi taeng lamloh vova a hma pah. 32  Te daengah khatneh khat te, “Mamih rhoi kah thinko tah a ung moenih a? Longpueng ah mamih ham a thui bangla mamih rhoi taengah om pai, cacim he mamih rhoi khuiah puk pai,” a ti rhoi. 33 Te dongah amah tekah a tue ah thoo rhoi tih Jerusalem la bal rhoi. Te vaengah hlaikhat rhoek neh a taengkah rhoek ana tingtun uh te a hmuh rhoi. 34  Boeipa tah thoo rhep tih Simon taengla a phoe te ana thui uh. 35  Amih rhoi long khaw longpueng kah te a thui rhoi tih vaidam a aehnah nen te amih a ming sak.

36  A thui uh li vaengah amah te amih lakli ah a pai pah tih amih te, “ Nangmih taengah ngaimongnah om saeh,” a ti nah.

37  Tedae let uh tih mueihla aka hmuh bangla a poek uh dongah lakueng ngaiha la om uh. 38 Te phoeiah amih te, “ Balae tih, na thuen neh na om uh, poeknah te balae tih na thinko ah a phul? 39  Kai kamah ni tite ka kut rhoi neh ka kho rhoi he souh. Kai he n'phathuep uh lamtah m'ming uh, mueihla loh a saa neh a rhuh a khueh moenih, nam hmuh uh vanbangla kai ka khueh he,” a ti nah.

40  He he a thui phoeiah a kut rhoi neh a kho rhoi te amih a tueng. 41  Tedae omngaihnah lamloh a hnalval uh pueng tih a ngaihmang uh dongah amih te, “ Caakkoi khat khaw na khueh uh a he?” a ti nah.

42 Amih loh amah te nga phoeng kaekvang a paek uh. 43 Te dongah a doe tih amih hmaiah a caak pah. 44 Te phoeiah amih te, “ Nangmih taengah ka om vaengah nangmih ham ka thui ka ol tah he ni. Moses kah olkhueng neh tonghma rhoek, tingtoeng dongah khaw kai kawng a daek te boeih a soep ham a kuek ta,” a ti nah.

45 Te daengah cacim hmuhming ham te a lungbuei puk uh. 46 Te dongah amih te, “ Khrih a patang ham neh a thum hnin ah duek lamkah a thoh ham kha, 47  Jerusalem lamkah loh tong uh lamtah namtom boeih taengah tholh khodawkngainah ham yutnah te amah ming neh hoe ham a daek tangloeng coeng. 48  Nangmih tah he rhoek kah laipai rhoek ni. 49  Cael 1. 4. Kai loh nangmih taengah a pa kah olkhueh te kan tueih coeng he. Tedae nangmih tah a sang lamkah thaomnah na bai uh hlan atah kho khuiah ana ngol uh,” a ti nah.

50  Cael 1.9-11. Amih te Bethany duela voelh a khuen phoeiah a kut a phuel tih amih te yoethen a paek . 51  Amih yoethen a paek nen tah amih taeng lamloh khoe uh tih vaan la a khuen. 52  Te vaengah amih loh amah te a bawk uh tih Jerusalem ah omngaihnah neh muep bal uh. 53 Te phoeiah bawkim khuiah om taitu uh tih Pathen te a uem uh.