Judt.
12.
Te phoeiah anih te cak hnopai a khuehnah imkhui la khueh ham neh a buh an te tawn pah ham, amah kah misur tui te ok hamla ol a paek. 
Tedae Judtih loh, “Te te ka bawn mahpawh, tomban la om ve, kamah loh kang khuen he kai hamla rhoeh bitni,” a ti nah. 
Holofernes loh anih te, “Na lampu te na khawk koinih, me lamkah lae n'loh pai eh? Mamih taengah na pilnam pakhat khaw a om moenih,” a ti nah. 
Te vaengah Judith loh, “Ka boeipa kah, hingnah vanbangla, Boeipa loh a cai thil te ka kut dongah a thoeng sak hil tah ka hmai kah lampu he na salnu loh boeih ka khawk aih mahpawh,” a ti nah. 
Te phoeiah tah Holofernes kah tueihyoeih rhoek loh anih te dap khuila a khuen tih khoyin bangli hil ah ip. 
Mincang ben a pha caengah tah koe thoo tih Holofernes taengah, “Ka boeipa na salnu he rhamvoel ah thangthui hamla n'caeh sak mai dae,” tila ol a pat. 
Te dongah a taengom rhoek te Judtih kanghalh pawt hamla ol a paek. Judith he rhaehhmuen ah hnin thum om. Hlaem takuem Bethulia kolvan la cet tih tui a hluk. 
Tui a hluk phoeiah tah a pilnamkah tanah longpuei hoihaeng hamla Israel Pathen Boeipa taengah thangthui. 
Te phoeiah tui a hluk tih hlaem buh a caak hil amah kah dap ah kho a sak. 
A hnin hlaili dongah tah Holofernes loh loh amah kah a taengom rhoek te buhkoknah a saii tih a sal rhoek pakhat khaw khue pawh. 
Te vaengah anih kah ngoengaihnah dongah hutnah aka khueh hlueikhu boei Bagoas te a khue tih, “Nang loh na dawn Hebru nu te mawt lamloh mamih taengah o van ca van saeh. 
Tebang huta te amah te m'pha muehla n'caeh sak koinih rhaidaeng la om ni. Amah te n'hloeih bal pawt cakhaw mamih nueih thil pawn ni,” a ti nah. 
Te dongah Bagoas tah Holofernes hmuh lamloh cet tih Judtih te a paan. “Hlang then nu aw, uelh boeh ka boei taengla halo lamtah a thangpomnah te doe mai laeh. Kaimih taengah omngaih kohoe neh ca van lamtah o van laeh. Nebuchadnezzar im ah thotat lamtah Assyria nu pakhat bangla tihnin ah om laeh,” a ti nah. 
Judtih loh, “Ka boeipa ka aal ham khaw kai he ba aih nim? A ngaih boeih te ka saii bitni. Ka dueknah hnin duela ka omngaih puei ni,” a ti nah. 
Te dongah thoo tih amah huta kah pueinak hnicu te koe a bai. A taengom nu lamhma tih Holofernes hmaiah anih ham te tupho a phaih pah. Tupho te hnin takuem kah buh vael vaengah phaih hamla Bagoas loh anih te a paek. 
Te phoeiah Judtih te kun tih koe yalh. Te vaengah Holofernes tah anih taenga a ko umya tih kohlopnah loha carhoeh coeng. 
Te dongah Holofernes loh anih te, “Misur tui o lamtah kamih taengah omngaih van,” a ti nah. 
Judith loh, “Kohoe la ka o bitni, ka boeipa, ka hing khuiah tihnin kah he ka kohoenah koek pawn ni,” a ti nah. 
Te phoeiah a taengom nu loh a tawn pah te a loh ti a mikhmuh ah a ok. 
Holofernes long khaw anih bahoeng a uem tih a ok khaw misurtui te a tarhing lakah a yet pah. A thang parhi te hnin at khaw te tlam te muep a ok aih moenih.