MATTHEW.
1.
Abraham le David i suan ahi, Jesus Christ i khang thu sia hibang a hihi. 
Abraham tapa Isaac; Isaac tapa Jacob; Jacob tapa Judah le a suapuite; 
Judah le Tamar tapa te Perez le Zerah, Perez ta Hezron; Hezron tapa Aram, 
Aram tapa Amminadab; Amminadab tapa Nahshon; Nahshon tapa Salmon; 
Salmon tapa Boaz hi; Boaz i nu Rahab; Boaz tapa Obed; Obed nu Ruth; Obed tapa Jesse; 
Jesse tapa David Kumpipa; David kumpipa tapa Solomon; a nu sia Uriah i zi hi ngei hi. 
Solomon tapa Roboam; Roboam tapa Abijah; Abijah tapa Asa; 
Asa tapa Jehoshaphat; Jehoshaphat tapa Jehoram; Jehoram ta Uzziah; 
Uzziah ta Jotham; Jotham ta Ahaz; Ahaz ta Hezekiah; 
Hezekiah ta Manasseh; Manasseh ta Amon; Amon tapa Josiah; 
Josiah ta Jechoniah, Jechoniah in Babylon khua ah a ki khin ma a nei a suapui te; 
Babylon a ki khin zawkciang Jechoniah tapa Shealtiel; Shealtiel tapa Zerubbabel; 
Zerubbabel ta Abiud; Abiud ta Eliakim; Eliakim ta Azor; 
Azor ta Zadok; Zadok ta Achim; Achim ta Elihud; 
Elihud ta Eleazar; Eleazar ta Matthan; Matthan ta Jacob; 
Jacob ta Joseph; Joseph sia Mary i pasal hi a, Mary sung pan Christ a kici Jesus hong suak hi. 
Tua ahikom Abraham pan in David dong khang sawm le khang li hi a; David pan in Babylon ah a ki khin dong khang sawm le khang li; Babylon a ki khin pan in Christ ciang dong khang sawm le khang li a hihi. 
Jesus Christ sua na thu sia hibang a hihi: A nu Mary sia Joseph in dokzu a piak sa hi a, a ki ngawm khop ma in Thaa Thiangtho taw nau ngil om hi. 
Joseph sia thutang khat hi a, Mary mindaisak nuam ngawl ahikom, nol ku tu in ngaisun hi. 
Tabang a ngaisut laitak in, a mang sung ah vantungmi khat hong ki lang a, David suan Joseph awng, Mary na zi tu in teenpui tu lau heak in: banghangziam cile a naungil sia Tha Thiangtho taw a hihi. 
Tapa nei tu a, tua tapa in a mite mawna pan ngum tu ahi man in, Jesus ci in a min na phuak tu hi: ci in vangtungmi in son hi. 
Hi te theampo Pathian in kamsang te tungtawn in a sonkholsa a tangtun na hi, kamsang i sonkhol na ah, 
En vun, ngaknu thiangtho khat naungil om tu a, tapa khat nei tu hi, a min Immanuel kiphuak tu hi, Emmanuel a khiakna sia, Pathian eite taw hong om hi, ci nopna a hihi. 
Joseph a khanlaw ciang, Topa vantungmi i sawl bang in, Mary tenpui hi. 
Ahihang taciil a nei dong luppui ngawl a, a min Jesus ci in phuak hi.