2 CHRONICLES
THUSIM BU NINA
2 Chronicles Sung Thu Umdan 1 Chronicles kipatna lam chu Jabez taona thudol ahin, hiche bang chun 2 Chronicles kipatna lang hi taona thudol ahi. Hiche phatlai hin Pathen in Solomon adong in, “Ipi ham nangai chat? Keiman kapeh ding nahi,” ati! Chuin solmon in chihna athum tan ahi. Ahinlah, achainan Pathen in Solomon agih-in “Na sopi hon kathupeh adonse lou’uva, Pathen dang ang-sunga abohkhup uva ahi leh, ven keiman kapeh gamsung’a kon kasuh-mang diu ahi,” ati. Hitia Pathen in asei bang hin 2 Chronicles lekhabua thusim che dan jong gim-hesoh nan akichai in ahi. Tua chronicles nasim masang in hiche hi geldoh in: hinkho sunga thilkhat apatna langa phatah a i-bol bouseh hi thupi ahipon, amavang thilkhat phatah a achaina nachan a panlah nahi a thupi joi ti muchet ahi.
Lekhabu Jihpa, Akijih Kum Chule Koite Dinga Anajih Ham?
Ezra in ajih ahi tin Judah te chonna dan chun kicheh tah in a seiyin ahi. Hichu 430 BC phat laiya ana jih ahi. Chule hiche lekhabu hi, Israel chate dinga ana-jih ahi. Ajeh chu Judah gam'a ahung kithah sem phat’uva, chule achesa phat sunga pathena kona phatthei na achan nau avel geldoh kit’uva, chule pathen koma akitep nahou ahin tohdoh theina diu ahi. Chule achesa phat sunga pathen a dinga asuhkhel nahou avel’a anungbol kit tah lou na dinguva ahil chah na dinga anasut ahi. Israel chaten pathen dih tah ahou nau’va kona Pathen phatthei bohna achan nau hetdoh sah na ding ahi, chule Judah lengte hon Pathen ging pum a vai ahin hop nauva agamsunga kikhel na ahung umdoh theina ho muchet sah na dinga jong ahi; chule judah lengte hon Pathen kichalouva amaho dei dan dana vai ahin hop jeh’uva Pathen lunghan jeh a Pathen in achungthu atan dan thu hetchet sah na dinga ana sut ahi.
1
Solomon In Chihna Athum
1 David chapa Solomon chun alenggam dettah in atungdohtai; Ijeh inem itihleh Pakai a Pathen chun aumpia chuleh sangtah'a athaneisah ahitai. 2 Solomon chun Israel lamkaiho galsat sepai asang, aja chunga luboh ho thutan vaihom ho, gamsung lamkai hojouse chule phung lamkai ho akoukhomin ahi. 3 Chuin Solomon chun houbung mipi chu Gibeon kho’a chu Pathen houkhom dingin a lamkai in a chetaove ; Ijeh inem etileh hiche kho’a Pathen houbuh chu umma ahi(Hiche laimuna hi Pakai Lhacha Mose’n gamthip laiya Pathen houbuh asemna munchu ahi). 4 Ahinlah, David chun Jerusalem munna atunna dinga asemna Pathen Houbuh’a chu Pathen Thingkong chu Kiriath-Jearim akona ana pohlutsa ahitai. ✡ 2 Samuel 6:1-17; 1 Thusimbu 13:5-14; 15:25—16:1 5 Ahinlah Uri Chapa, Hur tupa Betzalel kitipan asem sum-eng maicham chu Gibeon muna Pakai houbuh mai’a chun aum nalaijin ahi. Chuti chun Solomon le mipi chu houbuh masanga chun akikhom un Pakai chu ahoutaovin ahi. ✡ Potdohbu 38:1-7 6 Chulkomma Houbuh masanga chun Solomon chu sum-eng maicham umna'a chun akaltaovin Pakai angsungah pumgo thilto sangkhat jen agalhandohtan ahi. 7 Chuche jan chun Solomon henga Pathen ahungkilah’in hitin ati “Epi pentah nadeijem ,Thummin , chuleh Keiman nangma kapeh ding nahi .” 8 Solomon in Pathen chu adonbutnin, Nangman kapa David chu lungsetna longlou hel nachanin,tun keima amakhellin lengin neipan sahtai, 9 O Pakai Pathen lungset tah in kapa David toh nakitepna koijinginlang Mihem hijat chunga hin lengin neipan sahtai. ✡ Semtilbu 13:16; 28:14 10 Mipi hijat chunga kituptah a kalam kai thei’a namite chunga vai kahom themtheina dingin chih na le hetna neipen, 11 Pathen chun Solomon jah a hitin aseijin, Neile gou, haona , loupina ahiloule nagal
mite thina ding ahiloule nahinkho sotna joh thumlouva nangaichat sangpen namite
kithopi thei nadingle achunguva vaihom them theina nathum tah jeh hin,
12 Keiman nathumpen chihna le hetna chu kapeh ding; Chujongleh neile gou, haosatna le minthanna jong kapehtha ding, hitobang thil hi nama sangleh khonunga leng hungchang ding hon jong aneilou diu ahitai. 13 Hitichun Solomon chu Gibeon kho’a Pathen Houbuh’a kon chun Jerusalem lama ahung kinunglen Israelte chunga lengvai ana potan ahi. 14 Solomon chun Kangtalai le sakol touthem ho chu akoukhom in ahileh kangtalai sangkhat le jali leh sakol touthem sang somle sangni aneijin ahi. Aman hichengse chu phabepkhat Kangtalai kikoina khopiho chule amakomnai sangsom le sangni nai’a Jerusalem khopi sunga chun atousah taove. ✡ 1 Lgt 4:26 15 Lengpa chun Sana le Dangka jong Jerusalem sunga chun songlheu lah abahsah jengin chuleh Cedar thing mantam jengjong Judah phaichama Theipi thinglah abahsah jengin ahi. 16 Solomon sakol ho chu ama dinga thilcho’a panghon Egypt gam le Celicia gam'a kona mantamtah’a agachoh uva ahin pohdoh’u ahi. ✡ Danbu Ni Na 17:16 17 Chuche phatlai chun Egypt gamma kangtalai ho chu, dangka shekel jagup chule sakol ho chu dangka Shekel Jakhat le somnga manna ana kichojouvin ahi. Hiti chun Thilho chu Hittite lengte le Ram lengte koma ana kitol lut jin ahi.
DRAFT COPY