SAM.
76.
Kathutkung: Asaph Judah vah Cathut panue lah ao teh, Isarel vah a min teh a lentoe. 
Salem haiyah lukkareiim ao teh, Zion vah a onae hmuen ao. 
Hawvah, licung pala, tarantuknae, bahling hoi tahloinaw hah a khoe awh. Selah. 
Nang teh, tarantuknae monnaw hlak na sungren teh na hawihnawn. 
A tarankahawinaw lawp lah ao teh, mat a i awh toe. Tami a tha kaawm apinihai a kut dâw thai awh hoeh. 
Oe Jakop Cathut, na yuenae dawk hoi marang hoi ranglengnaw teh kadout e patetlah koung a rawp awh. 
Nang teh taki na tho doeh. Na lungkhuek pawiteh, na hmalah apimouh kangdout thai han. 
Talai vah repcoungroe e naw rungngang teh lawkceng hanelah Cathut a kangdue toteh, 
Na lawkcengnae lawk hah kalvan hoi na patoun teh, talai teh taki laihoi duem ao. Selah. 
Taminaw e lungkhueknae ni na pholen roeroe han. Ka cawi e lungkhueknae hai na keng dawk na kâyeng han. 
BAWIPA na Cathut koevah, lawkkam awh nateh, kuep sak awh. Atengpam kaawm e pueng ni, taki hanelah kaawm e koevah, poehno hah poe awh. 
Ama ni lawkcengkungnaw e lung hah, a rahnoum sak han. Talai siangpahrangnaw hanelah takikatho poung e lah ao.