APALYNAH.
12.
Khuarawha chuipaw paching pakhanah alaipaw pui sangkheh cawh avai letah a va lang. Canu pakheh cawh ning a hrei ka, thlawpaw cawh a phe rai letah ung ka, a lu letah esi sanghrawhluihning lukhu tah a khu. 
Ama cawh sawtei pho ka, a chai zaa ka, ny ung risaw khei a ysang. 
Mataico, ahringpaw paching pakhanah a cangpaw paribui asaipaw alai ngeteipaw, lusarih hnui katei, a ki kihraw a hnuipaw, a lu maikaw letah builukhu a khupaw cawh avai letah a va lang. 
A lahme tah avai letei esi chythung chykheh khah cakhia hly he ka, alui lang a za thlah he. Taico, ma paribui cawh a chai a zapaw canuno a sawtei cawh a za pi cangkawleh e pawtah canuno a hme leco a daw thlang. 
Ma canu cawh mingphing vytei khah thaw cungcahrei tah a uh ruapaw he tah sawcapaw khah a sah. Taico a sawcapaw cawh pazah pahraw he ka, Khazing le a buidyching lang khah seikhui a cang. 
Canuno cawh Khazing tah ning 1260 chung mingkhai rua pawtah a pachia thahpaw raangcaa lang khah a sai. 
Taico vaicung letah rae a tho. Mikhal le a vaiming sahlo tah paribui khah dy he ka, paribui le a vaiming sahlo takhei aa dy hri hrah he. 
Canghrasala paribui tah te be ca he ka, ama le a vaiming sahlo cawh vaicung taitah aa nangthlah he. 
Paribui alaipaw pui cawh heihly a cang. Ma paribui cawh khuahlai paribui, khachia a cang ly leh Setan tahpaw khah cang ka, khazaw pungpaluh lang a pavesah paw khah a cang. Ama le a vaiming sahlo cawh alui lang khah heihly a cang he. 
Mataico vaicung letah, “Kaa Khazing pachahnah le hmingtuakhynah le painah le a Khri nawhnuinah cawh atoheh a tling myca, zecawtamaw tatah kaa uny sahlo sua a putu he, ching le zai tah kaa Khazing hmekaw letei sua a putu he cawh heihly a cang myca. 
Tuu teitei thihnah thisai thongtah le a dawkhuinah pawhe bia thongtah aaning sahlo taco, ama cawh aa te myca. Aa hringnah peh zong sai he ka, thih zong aa ngang. 
Macawtaco naaning vaicung sahlo le a chung letei a ungpaw sahlo, a lawng myca o! Canghrasala, alui le rili cawh naa cing a ping, zemaw tah pawco Setan cawh naaning khatah a tlahthlah myca! Ama cawh a thing a ling tah a paling thlang, zecawtamaw tatah cai a cawngpe long ka hnui takhah a hni cawtah a cang,” tatah tahpaw o khah ka thui. 
Paribui taco alui lang heihly ka cang myca takhah a hni tihtah sawcapaw a sahpaw canuno khah a cadai. 
Canuno cawh raangcaa letei aa pachia pahpaw hminghmaw lang a zy nápawtah pahmupui a mathlaw sanghning khah peh cang ka, ma leco kung thung le a chy mingkai cang ka, paribui taco phah khy be. 
Mataico, paribui taco canuno cawh phohly ná seh tah ka, a kaw taitah tuivaw hratah tui a phuhly. 
Canghrasala alui taco canuno cawh a baw ka, a kaw ang ka, paribui tei a kaw taitah a papiapaw tuivaw tui khah a lang thlu. 
Mataico, paribui cawh canuno cung leco a thingae ngetei ka, canuno a pathlah a tangpaw sahlo, Khazing biapeh nge he katei, Zisu a dawkhuipaw sahlo he khah rae dy rua pawtah a piathlah.