12
Ca₂jon₃ Jacobo, Pe₄ guë'₂ ca₂jné₂ dsa₂ 'né₅ 'má₃
1 Jmɨg₄ jaun₂ ca₂jme₃lióg₃ Rag₅₄ Herodes qui₂ca₂jmái'₂ dsa₂ i₂'én₂. 2 Ca₂jmo₃ 'éi'₃ ca₂jŋɨ'₃ dsa₂ Jacobo rɨn'₅₄ Juan₅₄, quian'₅₄ ŋi₁tág₂. 3 Jme₁ca₂jág₃ Herodes a₂ca₂të́₂ dsɨ́₅ dsa₂ judíos, jaun₂ ca₂jmo₃ táng₃ 'éi'₃ ca₂jŋa'₃ dsa₂ Pe₄ ján₃. Ca₂le₃jë́₃ a₂në₅ ca₂lë₃ lia'₂ con'₂ jmo₅ dsa₂ jmɨg₄ a₂guë́'₅ dsa₂ i₁ŋí'₄ 'ua'₂ a₂tsá₃ levadura quian'₅₄. 4 Jme₁ma₂në₂chán'₂ dsa₂ Pe₄, jaun₂ ca₂jmo₃ Herodes 'éi'₃ ca₂to'₂ 'né₅ 'má₃, jaun₂ ca₂tón'₂ quén₂ nió'₃ 'lióg₂ i₂lë́₂ jma₃quén₂ le₂caun₂ nió'₃, qui₂ca₂jmo₃ 'í₁ Pe₄. Jme₁dsɨ₂jiog₅ dsɨ́₅ Herodes jme₁dsei₂₃ të₃jɨn₄ dsa₂ juɨg₂ jë₁ma₂ca₂ŋɨ́₂ Jmɨg₄ Të₂'ɨn₅₄. 5 Jaun₂ le₂në₅ 'en₅₄ Pe₄ né'₃ 'má₃, lë́₅ 'í₁ dse₃ lɨn₃. La₁ dsa₂ rɨin'₅₄ në́₃ caun₂ chi₂léin'₂ Diú₄ bá₄ tioin'₅₄ mɨ₂₃ 'ŋio₅ lɨn₃ o₄quió'₄ 'éi₂.
Ca₂lión₂ Diú₄ Pe₄ 'né₅ 'má₃
6 Caun₂ 'uë₂, juɨ₁lia'₂ 'ióg₃ jme₁ma₂lë́₅ jág₁ jme₁dsei₅ Herodes jɨn₄ dsa₂ juɨg₂, a₂'uë₂ jaun₂ jme₁rë₂quian₅ Pe₄ rë₂güɨ́in₃ rë₂'ŋei₂₃ dse₃ lɨn₃ quian'₅₄ tɨn₃ cadenas jë₄ quió'₅ on₃ 'lióg₂. 'Lióg₂ sián'₂ guë'₂ jme₁tion'₅₄ o₄'né₄ jmo₂₃ 'í₁ 'né₅ 'má₃. 7 Të₃jë₄ jaun₂, ca₂jme₃jnia₅ jan₂ ángel quián₅ Te₁gui'₅₄, jaun₂ ca₂tág₃ si₂ ta₁caun₂ dsi₂néi₂ 'né₅ 'má₃. Jaun₂ ca₂quén'₃ ángel dsɨ₂con₂ Pe₄ a₂ca₂ŋei₃. Jaun₂ ca₂juá'₂:
―Nau₂ të₂në₃ cón'₅.
Jaun₂ ca₂séi'₂ 'uë₃ nɨ₁ŋí₁ cadenas a₂jme₁tio'₅₄ gu₂ Pe₄. 8 Jaun₂ ca₂juá'₂ táng₃ ángel:
―Dse₃ 'ŋéi₂ tog'₂, tio'₂ lau₂ tag'₅₄.
Jme₁ca₂lë₃ jmo₅ Pe₄ a₂jaun₂, jaun₂ ca₂juá'₂ táng₃ ángel:
―Qui'₂ 'mɨ'₂ dsiog₂ quiáng'₂, 'éin₃ jniá₂.
9 Jaun₂ ca₂o₃'ɨ́n₃ Pe₄ chi₁co'₅₄ quió'₅ ángel. Tsá₃ jaun₂ ŋi₅ chi₂jua'₂ dsón'₂ dsɨ₂jó'₃ a₂ca₂jmo₃ ángel le₂jaun₂, ia₁ a₂lë₁ca₂jág₃ bá₄ lɨ́in₂. 10 Jaun₂ ca₂ŋɨi₅ ja₁le₂'uɨg₅₄ tion'₅₄ 'lióg₂, ja₁ca₂të́₂ táng₃ në́₃. Jme₁ca₂dsi₃léin₂ o₄'né₄ a₂lë́₅ quian'₅₄ nɨ₁ŋí₁, ja₁'uɨn₂ dsa₂ jë₄ calle, a₂lë₁ca₂niá₃ 'ŋiog₅ bá₄ o₄'né₄. Ca₂'uɨin₂ bá₄ jaun₂ në́₃. Jme₁ma₂i₂nioi₅₄ caun₂ calle, jaun₂ ca₂ŋá'₃ ángel 'éi₂, ca₂téin₂ Pe₄. 11 Jaun₂ guë́₄ ca₂rë₃lí'₄ Pe₄, ca₂juá'₂:
―Në₃ guë́₄ dsón'₂ guion₄ jniá₂ a₂në₂chen₃ Te₁gui'₅₄ ángel quiáin₅ a₂në₂lió₂ ja₁con₂ Herodes, ca₂le₃jë́₃ guë́₄ 'e₂ jme₁'nio₃ dsa₂ judíos jmóg'₂.
12 Të₃ dsɨ₂jiog₅ dsɨ́₅ le₂jaun₂ Pe₄, ca₂ŋó₃ juɨ₅ ja₁quió'₄ María chog₅₄ Juan₅₄ i₂chen₂ Marcos ján₃. Ja₁jaun₂ jme₁tion'₅₄ dsa₂ le₁ŋɨi'₂ chi₂léin'₂ Diú₄. 13 Jme₁ca₂quein₃ Pe₄ o₄'né₄ i₁dsi₅, jaun₂ ca₂o₃'ɨ́n₃ jan₂ 'io₅₄ bë'₅₄ i₂chen₂ Rode i₃jág₂ 'ein₂ të́₂. 14 La₁ jme₁ca₂nág₂, ca₂rë₃cuɨ́'₅ jág₁ quió'₅ Pe₄ në́₃, jaun₂ tsá₃ ca₂niá₃ dsɨ₂juɨ₅, ia₁ ŋɨ́₄ lë₃ ca₂jmo₃ 'io'₂. Jaun₂ ca₂ŋái'₃ bá₄ táng₃ dsi₂néi₂ i₁con₂ jág₁, Pe₄ bá₄ 'éi₂ ca₂dsióg₃. 15 Jaun₂ ca₂juá'₂ dsa₂ ca₂tsɨ́'₃ 'io₅₄ bë'₅₄ 'éi₂:
―¡A₂lë₁të₂'ɨ'₂ bá₄ 'ne₂!
La₁ caun₂ ca₂juá'₂ bá₄ 'io₅₄, a₂dsón'₂ bá₄ 'éi₂. Jaun₂ ca₂ŋag₃ táng₃ dsa₂, ca₂juá'₂:
―¿'A₂ bá₄ lia'₂ jaun₂? On₃jua'₅₄ 'éi₂ në₅. 'Ɨn₁ ángel quiáin₅ bá₄ në₅.
16 Të₁lia'₂ jaun₂, caun₂ i₁të₅₄ bá₄ Pe₄ o₄'né₄ i₁chéin'₄. Jme₁ca₂niá₃, ca₂jɨ́in₂ Pe₄, jaun₂ ca₂i₃gó'₃ dsɨ́₅. 17 La₁ jaun₂ ca₂jmo₃ 'éi₂ léi₄ quian'₅₄ mɨ₂gu₂ a₂ca₂juá'₂ a₂jmo₃ dsa₂ tei₄. Jaun₂ ca₂dsia₃ 'a₂ lia'₂ ca₂lë₃ ca₂jmo₃ Te₁gui'₅₄ a₂ca₂i₁dsei₂₃ 'né₅ 'má₃. Jaun₂ ca₂juá'₂:
―O₂dsia₄ 'nia'₂ o₂chei'₅₄ Jacobo,* o₃, Santiago. Rɨn'₅₄ Jesús. I₂sián'₂ bá₄ Jacobo rɨn'₅₄ Juan₅₄ (ja₁ŋi'₅₄ Zebedeo) i₂ca₂jŋag'₃ Herodes, Hechos 12:1. ca₂le₃jɨ́n₃ guë́₄ rɨn'₅₄ jniog₄.
Jaun₂ ca₂o₃'ɨ́in₃ táng₃, ca₂ŋó₃ ja₁siá'₂.
18 Jme₁jnia₃ jaun₂, ca₂tón'₂ 'lióg₂ go₂'i₃, ia₁ tsá₃ ŋi₅ 'e₂ ca₂lë₃ quian'₅₄ Pe₄. 19 Jaun₂ Herodes ca₂chein₃ dsa₂ dsɨ₃'niog'₂. La₁ia₁ tsá₃ ma₃ca₂dsáu'₂. Jaun₂ jme₁ca₂cáun₂ jág₁ dsau₅ quió'₅ 'lióg₂ i₂jme₁jmo₅ 'í₁ 'éi₂, ca₂jmo₃ 'éi'₃ ca₂jme₃dsiog₅ dsa₂. Cang₂ jaun₂, ca₂o₃'ɨ́n₃ Herodes 'uë₃ Judea, jaun₂ ca₂ŋó₃ ca₂i₁gua₂ Cesarea.
Ca₂jon₃ Herodes
20 Jme₁'ne₂ Herodes quian'₅₄ dsa₂ i₂jme₁tián'₄ Tiro quian'₅₄ Sidón. La₁ dsa₂ 'éi₂ në́₃ ca₂jmo₃ caun₂ jág₁ ca₂i₁lein₅₄ ca₂jme₁jniai₂₃ ne₅₄. Ca₂jme₃'uáin₂ dsɨ́₅ jan₂ i₂chen₂ Blasto a₂jmo₃ dse₃ dsɨ́₅. Jme₁lɨ́n₄ Blasto jan₂ dsɨ₂tan₅₄ juɨn'₂ quián₅ Rag₅₄ Herodes. Ca₂nau₂ ne₄ jág₁, ca₂mɨ₃ dsian₅ mɨ'₅₄. Ia₁ juɨg₂ go₄ rag₅₄ bá₄ jme₁rau₂ a₂guë́'₅ dsa₂ chan₂ Tiro quian'₅₄ Sidón. 21 Herodes në́₃ ca₂të₃, ca₂tióng₃ caun₂ jmɨg₄ a₂chi₁jŋiog₂₃ dsi₁lén₂ dsa₂. Jme₁ca₂të́₂ jmɨg₄ jaun₂, ca₂quɨ́'₂ Herodes tsɨn'₅₄ a₂rë₂lɨin₅₄ a₂lɨ́in₅ rag₅₄, jaun₂ ca₂i₁gua₂ ne₄ ne₄ta₁ quió'₅, jaun₂ ca₂ton₃ jág₁. 22 Jaun₂ ca₂jme₃lióg₃ dsa₂ juɨg₂ qui₂ca₂guió'₃ ca₂juá'₂:
―¡I₂juá'₂ në₅, on₃jua'₅₄ dsa₂ mɨ₂güɨ́g₃! Jan₂ diú₄ bá₄ në₅.
23 Co₂tan₅₄ dsɨ₂juɨ₅ le₂jaun₂ ca₂jmo₃ ángel i₂chen₄ quián₅ Te₁gui'₅₄ a₂ca₂rë₃dso'₅₄ Herodes, ia₁ ca₂cuë₃ jmɨg₄ a₂jme₃juag'₂ dsa₂ 'ŋiog₅, 'nió'₄ a₂jme₁jme₃juɨin'₂ Diú₄. Ca₂join₃ bá₄ jaun₂ në́₃, ca₂dsó'₃ i₁ja'₅₄ quió'₅.
24 La₁ jág₁ dse₃ quió'₅ Te₁gui'₅₄ në́₃ caun₂ ca₂i₃'ág₃ bá₄, qui₂ca₂'ë́₂ dsa₂ 'lióng₂ juɨg₂.
25 Jme₁ca₂lë₃ ta₁ jaun₂ quió'₅ Bernabé quian'₅₄ Saulo, jaun₂ ca₂'uɨin₂ Jerusalén ca₂i₃lein₃† A₂lɨn₅₄ chog₅₄ si₂: “jaun₂ ca₂i₃lein₃ Jerusalén.” jŋiai₂₃ i₂jme₁chen₂ Juan₅₄ i₂jme₁të́'₂ dsa₂ Marcos ján₃.