1 Mach a chaꞌlen pensal chaꞌan ti caj i mul jini muꞌ bʌ i chaꞌleñob simaronlel.

Mach a mulan a chaꞌlen simaronlel bajcheꞌ miꞌ chaꞌlen xmulilob.

2 Mach jal mi quej i jilelob cheꞌ bajcheꞌ miꞌ tyʌquin jam yicꞌot pimel.

3 Chꞌujbin lac Yum ti a pusicꞌal, mele chʌ bʌ wen.

Cheꞌ jini jasʌl mi quejel laꞌ wʌqꞌuentyel chʌ bʌ yom a chaꞌan cheꞌ mi quej a chumtyʌl ti jini lum.

4 Yom tijicñayet ti lac Yum.

Mi quej i yʌqꞌueñet chʌ bʌ yom a pusicꞌal.

5 Acꞌʌ tiꞌ wenta lac Yum pejtyel a melbal.

Chꞌujbin lac Yum ti a pusicꞌal. Mi quej i cotyañet a jolontisan chʌ bʌ maꞌ ñaꞌtyan a chaꞌlen.

6 Mi quej i wen tsictiyel tyoj bʌ a pusicꞌal cheꞌ bajcheꞌ mi tsictiyel i sʌclel mulawil.

Dios mi quej i tsictisan cheꞌ bajcheꞌ i sʌclel mulawil ti xinqꞌuinil.

7 Ñʌchꞌchocon a bʌ ti lac Yum.

Pijtyan lac Yum tiꞌ xucꞌtyʌlel a pusicꞌal.

Mach a chaꞌlen pensal cheꞌ mi yocꞌan chʌ bʌ an i chaꞌan jini muꞌ bʌ i chaꞌlen simaronlel.

8 Laꞌ lajmic a michꞌlel.

Mach a pensalin a chaꞌlen machꞌʌ wen

9 Jini muꞌ bʌ i chaꞌlen simaronlel mi quej i jisʌntyel.

Jini muꞌ bʌ i chʌc pijtyañob lac Yum mi quej i yʌqꞌuentyelob jini lum.

10 Maꞌix jal mi quej i jilel jini mach bʌ baꞌan miꞌ chꞌujbiñob Dios.

Cheꞌ mi quej a qꞌuel jini simaron bʌ maꞌix yaꞌan.

11 Jini utsoꞌ bʌ i pusicꞌal mi quej i yʌqꞌuentyel jini lum.

Tijicña mi quej i yubiñob cheꞌ ñʌchꞌʌlob i pusicꞌal.

12 Jini simaroñoꞌ bʌ miꞌ pensalin bajcheꞌ mi quej i tyʌcꞌlan jini tyoj bʌ.

Miꞌ ñoj michꞌan.

13 Lac Yum miꞌ tseꞌtyan jini quixtyañu.

Yujil maꞌix jal mi quej i jilel.

14 Jini simaroñoꞌ bʌ miꞌ locꞌsañob i yespada tiꞌ yotyot.

Miꞌ sʌtsꞌob i wʌn tyeꞌ,

Chaꞌan i jisañob jini pꞌumpꞌun bʌ,

Chaꞌan i tsʌnsañob jini tyojoꞌ bʌ.

15 I yespada jini simaroñoꞌ bʌ mi quej i yochel ti bajñel bʌ i pusicꞌal.

Jini wʌn tyeꞌ tyac mi quej i xujlel.

16 Más wen aunque tsꞌityaꞌ jach chʌ bʌ an i chaꞌan cheꞌ wen bʌ quixtyañu cheꞌ bajcheꞌ mi an cabʌl chʌ bʌ an i chaꞌan cheꞌ simaron bʌ quixtyañujob.

17 Como mi quej i jisʌntyel i pꞌʌtyʌlel jini simaroñoꞌ bʌ

Pero lac Yum miꞌ cʌñʌtyan jini tyojoꞌ bʌ.

18 Lac Yum miꞌ qꞌuel bajcheꞌ miꞌ ñusañob qꞌuin jini tyojoꞌ bʌ.

Mach jil ti beleꞌ ora chʌ bʌ mi yʌqꞌueñob.

19 Machꞌan mi quej i yubin quisin tiꞌ yorojlel wocol.

Jasʌl i yuchꞌel ti yorojlel wiꞌñal.

20 Pero jini simaroñoꞌ bʌ mi quej i jilelob.

I contrajob lac Yum mi quej i jilelob cheꞌ bajcheꞌ tyʌquinix bʌ pimel.

Mi quejelob ti pulel, mi qujelob ti jilel cheꞌ bajcheꞌ butsꞌ.

21 Jini simaroñob miꞌ cꞌajtin ti bet.

Machꞌan miꞌ chaꞌ qꞌuextyʌben.

Pero an i yutslel i pusicꞌal jini tyoj bʌ.

Mi yʌcꞌ yañoꞌ bʌ loqꞌuem ti chʌ bʌ an i chaꞌan.

22 Jini pꞌuntyʌbiloꞌ bʌ ti lac Yum mi quej i yʌqꞌuentyelob jini lum.

Jini chocbiloꞌ bʌ ti lac Yum mi quej i jisʌntyelob.

23 Lac Yum miꞌ tyojꞌisan majlel jini wen bʌ quixtyañu

Chaꞌan xucꞌul mi majlel tiꞌ bijlel.

Tijicña mi qꞌuejlel ti lac Yum cheꞌ bajcheꞌ miꞌ mel.

24 Cheꞌ mi yajlel, machꞌan mi junyajlel cʌytyʌl.

Como lac Yum miꞌ chucben i cꞌʌb.

25 Alobon tyo wajali. Wale ñoxoñix.

Cꞌʌlʌ wale iliyi max tyo baꞌan baꞌ bʌ ora ti quilʌ juntiquil tyoj bʌ tsaꞌ bʌ chojqui ti Dios ti junyajlel.

Machꞌan miꞌ cꞌajtin ñumel i yuchꞌel i yalobilob.

26 Beleꞌ ora ti yutslel i pusicꞌal mi yʌcꞌ loqꞌuem bʌ ti chʌ bʌ an i chaꞌan chaꞌan cotyaj.

Cheꞌ jeꞌel yujilob cotya i yalobilob.

27 Cʌyʌ jini machꞌʌ wen. Mele chʌ bʌ wen.

Cheꞌ jini mi quej a wajñel chaꞌan ti beleꞌ ora.

28 Como lac Yum miꞌ mulan chʌ bʌ tyoj.

Machꞌan miꞌ cʌy i chaꞌañoꞌ bʌ.

Miꞌ cʌñʌtyañob ti pejtyelel ora.

Pero i jiñʌjlel jini simaroñoꞌ bʌ mi quej i yʌjqꞌuel ti jilel.

29 Mi quej i yʌqꞌuentyelob jini lum jini tyojoꞌ bʌ.

Mi quej i yajñelob yaꞌi ti beleꞌ ora.

30 Tsiquil i ñaꞌtyʌbal jini tyojoꞌ bʌ cheꞌ miꞌ chaꞌlen tꞌan.

Tyojʌch i tꞌan.

31 Miꞌ beleꞌ pensalin tiꞌ pusicꞌal chʌ bʌ yom Dios.

Xucꞌul mi majlel tiꞌ bijlel.

32 Jini simaroñoꞌ bʌ mi wen qꞌuel jini tyoj bʌ

Miꞌ sʌclan bajcheꞌ chꞌujbi i tsʌnsan.

33 Lac Yum machꞌan mi yʌcꞌ jini tyoj bʌ tiꞌ wenta simaron bʌ.

Machꞌan mi yʌqꞌuen i tyajtyʌl ti mulil jini tyoj bʌ cheꞌ ti yorojlel melojel.

34 Bej chꞌujbin lac Yum. Chꞌujbiben chʌ bʌ mi yʌl.

Mi quej i yʌqꞌueñet a ñuclel. Mi quej a wʌqꞌuentyel jini lum.

Mi quej a qꞌuel cheꞌ mi jisʌntyelob jini simaroñoꞌ bʌ.

35 Ti quilʌ juntiquil ñoj simaron bʌ quixtyañu.

Tiꞌ chanꞌisʌ i bʌ cheꞌ bajcheꞌ tyeꞌ muꞌ bʌ i colel ti ñoj colem.

36 Qꞌuele awilan, majlemix. Maꞌix chʌc tsiquil.

Tic sʌclʌ jini winic, Machꞌan tic tyaja.

37 Qꞌuele jini xucꞌul bʌ quixtyañu, jini tyoj bʌ.

Ñʌchꞌʌl mi quejel i yajñel jini tyoj bʌ quixtyañu.

Ñoj wen mi quejel i yujtyel yicꞌot.

38 Mi quej i luꞌ jisʌntyelob muꞌ bʌ i ñusʌbeñob i tꞌan Dios.

Mi quej i jisʌntyelob jini simaroñoꞌ bʌ yicꞌot jeꞌel i jiñʌjlelob.

39 Tyʌlem ti lac Yum i cotyʌntyelob jini tyojoꞌ bʌ.

Lac Yum i pꞌʌtyʌlelobʌch ti yorojlel wocol.

40 Lac Yum miꞌ cotyañob jini tyojoꞌ bʌ muꞌ bʌ i chꞌujbin.

Miꞌ locꞌsañob baꞌ bʌbʌqꞌuen mi jilelob tiꞌ pꞌʌtyʌlel jini simaroñoꞌ bʌ.