1 Subenla wocox i yʌlʌ lac Yum, como ñoj wen lac Yum.

Ti beleꞌ ora an i yutslel i pusicꞌal.

2 Laꞌ i yʌlob jini israelob:

Ti pejtyelel ora an i yutslel i pusicꞌal lac Yum, cheꞌob.

3 Laꞌ i yʌlob i jiñʌjlelob Aarón: Ti pejtyelel ora an i yutslel i pusicꞌal lac Yum, cheꞌob.

4 Laꞌ i yʌlob jini muꞌ bʌ i chꞌujutisañob lac Yum: Ti pejtyelel ora an i yutslel i pusicꞌal lac Yum, cheꞌob.

5 Cheꞌ ñac ti cubi wocol tic pejcʌ lac Yum,

Tiꞌ jacꞌbeyon, ti yʌcꞌʌyon ti cojlel.

6 Lac Yum an quicꞌot.

Machꞌan mi quej c bʌcꞌñan chʌ bʌ yes miꞌ tyumbeñoñob quixtyañujob.

7 Lac Yum mi yajñel quicꞌot. Mi yʌqꞌueñon c pꞌʌtyʌlel.

Mi quej j qꞌuel i jilibal jini muꞌ bʌ i tsꞌaꞌleñon.

8 Yom mi lac xucꞌchocon lac pusicꞌal ti lac Yum.

Mach yom mi lac xucꞌchocon ti quixtyañujob.

9 Yom mi lac xucꞌchocon lac pusicꞌal ti lac Yum.

Mach yom mi lac xucꞌchocon ti yumʌlob.

10 Jini simaroñoꞌ bʌ ti jujumpꞌej pañimil tiꞌ joyoyoñob.

Tiꞌ cꞌabaꞌ lac Yum mi quejel c ganariñob.

Wocox i yʌlʌ lac Yum muꞌ bʌ i cotyañonla.

11 Tiꞌ joyoyoñob. Melel, joyolon i chaꞌañob.

Pero tic ganariyob tiꞌ cꞌabaꞌ lac Yum.

12 Jomjomñayob tic tꞌejl cheꞌ bajcheꞌ i ñaꞌ chab,

Colel i pulon cheꞌ bajcheꞌ chꞌix muꞌ bʌ ti lejmel tic joytyʌlel

Tiꞌ cꞌabaꞌ c Yum tic ganariyob.

13 Wen ñetꞌelon, colel c yajlel,

Pero lac Yum tiꞌ locꞌsʌyon.

14 Lac Yum c pꞌʌtyʌlelʌch. Jiñʌch muꞌ bʌ j cꞌʌyin.

Jiñʌch ajcotyaya c chaꞌan.

15 Ubinla jini tijicña bʌ tꞌan tiꞌ chumlib jini tyojoꞌ bʌ.

Como ti lac ganari tiꞌ pꞌʌtyʌlel lac Yum.

16 Wen ñuc i pꞌʌtyʌlel lac Yum.

Chaꞌan tiꞌ pꞌʌtyʌlel lac Yum mi lac ganarin.

17 Machꞌan mi quej c sajtyel. Cuxul mi quej cajñel.

Mi quej c sub i melbal lac Yum.

18 Lac Yum tiꞌ wen tyojꞌisʌbeyon c pusicꞌal ti wocol,

Pero maꞌan mi yʌcꞌon ti sajtyel.

19 Jambeñon i puertajlel Templo yaꞌ baꞌ mi yochelob jini tyojoꞌ bʌ,

Chaꞌan mi cochel cʌqꞌuen wocox i yʌlʌ lac Yum.

20 Jiñʌch i puertajlel lac Yum baꞌ mi quejelob ti ochel jini tyojoꞌ bʌ.

21 Mic subeñet wocox a wʌlʌ como ti a jacꞌbeyon.

Ti ochiyet ti Ajcotyaya c chaꞌan.

22 Jini tyun tsaꞌ bʌ i chocoyob jini ajmel tyun bʌ otyot ti ochi tiꞌ wentyʌlel oy ti xujcꞌ otyot.

23 Jiñʌch i chaꞌlibal lac Yum.

Tyoj bʌcꞌñʌjel mi laj qꞌuel jini tsaꞌ bʌ i chaꞌle.

24 Ili bʌ qꞌuin i melbalʌch lac Yum.

Laꞌ la cubin tijicña. Yom tijicña mi la cajñel.

25 C Yum, awocolic, cotyañon lojon.

Awocolic c Yum, laꞌ loqꞌuic ti wen chʌ bʌ mi lojon chaꞌlen.

26 Cꞌajacña i yoj jini muꞌ bʌ i tyʌlel tiꞌ cꞌabaꞌ lac Yum

Wʌꞌ ti a wotyot, c Yum, mi lojon c chꞌujutisañet.

27 Jiñʌch Dios lac Yum. Ti yʌcꞌʌ i sʌclel mulawil ti lac pusicꞌal.

Cʌchʌla ti chꞌajan tsʌnsʌbil bʌ i majtyan Dios yaꞌ ti yajnib i majtyan.

28 Jatyet c Dioset, mi quej c subeñet wocox a wʌlʌ.

C Dios, mi quej c pʌs a ñuclel.

29 Subenla wocox i yʌlʌ lac Yum, como ñoj wen lac Yum.

Ti pejtyelel ora an i yutslel i pusicꞌal.