Salmos.
22.
C Dios, c Dios, ¿chucoch ti a cʌyʌyon? ¿Chucoch ñajt añet chaꞌan machꞌʌ baꞌan maꞌ cotyañon? ¿Chucoch machꞌʌ baꞌan maꞌ wubiñon cheꞌ ajacñayon? 
C Dios, cꞌam mic pejcañet ti qꞌuinil yicꞌot ti acꞌbʌlel, Machꞌan maꞌ jacꞌbeñon. Machꞌan ñʌchꞌʌl c pusicꞌal. 
Pero chꞌujulet. Buchulet yaꞌ baꞌ maꞌ chaꞌlen yumʌl, Miꞌ subob a ñuclel jini israelob. 
Lojon c yumob ti ñoj oniyix ti chꞌujbiyetyob; Tiꞌ chꞌujbiyetyob. Ti a cotyʌyob loqꞌuel ti i wocol. 
Cꞌam tiꞌ pejcʌyetyob. Ti a cotyʌyob loqꞌuel tiꞌ wocol. Tiꞌ chꞌujbiyetyob. Machꞌan tiꞌ quisni i chꞌujbiñetyob. 
Pero tyeqꞌuelon cheꞌ bajcheꞌ motsoꞌ. Cheꞌ bajcheꞌ mach winicon. Wajlebilon i chaꞌan quixtyañujob. Miꞌ tsꞌaꞌleñoñob. 
Pejtyel muꞌ bʌ i qꞌuelon miꞌ tseꞌtyañon. Miꞌ wajleñoñob, miꞌ pʌntsꞌuñob i jol. 
Mi yʌlob: Tiꞌ chꞌujbi lac Yum chaꞌan mi quej i bej cotyan. Laꞌ i cotyan wale iliyi, laꞌ i col loqꞌuel ti wocol mi chʌncol i pꞌuntyan, cheꞌob. 
Jatyet ti a wʌqꞌueyon ti chꞌoc an cheꞌ cʌñʌtyʌbilon tyo i chaꞌan c ñaꞌ. Jatyet ti a cʌñʌtyʌyon yaꞌ tiꞌ tyajn c ñaꞌ. 
Ti a lotyoyon cheꞌ ñac ti chꞌocꞌʌyon. C Dioset cꞌʌlʌ cheꞌ ñac cʌñʌtyʌbilon tyo tic ñaꞌ. 
Maꞌ maꞌ jis a bʌ tic tyojlel Como lʌcꞌʌl an wocol Machꞌan majch miꞌ cotyañon. 
Joyolon ti bʌbʌqꞌuen bʌ j contrajob lajalob bajcheꞌ pꞌʌtyʌl bʌ tyat wacax chꞌoyol bʌ ti Basán. 
Yomob i jisañon cheꞌ bajcheꞌ chʌc bajlʌm muꞌ bʌ i cawben i tiꞌ. Cheꞌ bajcheꞌ wen wiꞌña bʌ chʌc bajlʌm chʌncol bʌ ti cʌrʌcñʌyel. 
Chʌncol i jilel c wersa cheꞌ bajcheꞌ jaꞌ muꞌ bʌ ti sajpꞌel. Pejtyel c bʌquel tsaꞌix loqꞌui tiꞌ pꞌac. Lajalʌch c pusicꞌal yubil bajcheꞌ ñichim chʌncol bʌ yulmʌl. 
Jilemix c pꞌʌtyʌlel cheꞌ bajcheꞌ i xejtꞌil pꞌejt tsaꞌix bʌ wen tyʌqui. Mi ñochtyʌl cacꞌ chaꞌan tyʌquin c tiꞌ. Chʌncol a tyotsꞌchocoñon ti muconibʌl. 
Miꞌ joyoñob simaron bʌ winicob cheꞌ bajcheꞌ tsꞌiꞌ. Tiꞌ jecꞌboñob j cꞌʌb yicꞌot coc. 
Chꞌujbi c tsic pejtyel c bʌquel tyac chaꞌan luꞌ loqꞌuem tiꞌ pꞌac. Miꞌ chꞌuj qꞌueloñob, miꞌ tseꞌtyañoñob. 
Miꞌ pucbeñob i bʌ c pislel. Miꞌ chaꞌleñob yajcaya chaꞌan i ñaꞌtyan majchqui i chaꞌan mi majlel c bujc. 
C Yum, mach yom maꞌ cʌyon. Jatyet, c pꞌʌtyʌlel, laꞌ ti ora chaꞌan maꞌ cotyañon. 
Cotyañon chaꞌan machꞌan miꞌ tyajon espada, Ame i tsʌnsañoñob simaron bʌ quixtyañujob. 
Cotyañon loqꞌuel tiꞌ cꞌʌb simaron bʌ winicob cheꞌ bajcheꞌ ti tiꞌ chʌc bajlʌm, Cheꞌ bajcheꞌ tiꞌ xulub simaron bʌ tyat wacax. 
Mi quej c subeñob c piꞌʌlob chaꞌan pꞌʌtyʌlet. Mi quej c sub a ñuclel tiꞌ tyojlel jini muꞌ bʌ i muchꞌquiñob i bʌ. 
Subula i ñuclel jatyetla muꞌ bʌ laꞌ qꞌuel ti ñuc lac Yum, Pejtyel i jiñʌjlelet bʌ la Jacob, subula i ñuclel. Qꞌuelela ti ñuc lac Yum, pejtyel israelet bʌ la. 
Machꞌan tiꞌ wajleyon chaꞌan ti caj c wocol. Machꞌan ti yʌlꞌeyon. Machꞌan tiꞌ mʌctyʌbeyon i wut. Lac Yum ti yubi cheꞌ ñac cꞌam tic pejcʌ. 
Jin chaꞌan mic sub i ñuclel c Yum tiꞌ tyojlel jini muꞌ bʌ i muchꞌquiñob i bʌ. Mi quej c mel ti tsꞌʌcʌl bajcheꞌ tic wʌ subeyet yaꞌ tiꞌ tyojlel quixtyañujob muꞌ bʌ i chꞌujutisañob Dios. 
Jini pꞌumpꞌuñoꞌ bʌ mi quejelob ti uchꞌel. Mi quejel i ñajꞌañob. Jini muꞌ bʌ i sajcañob lac Yum, mi quejel i chꞌujutisañob. Laꞌ ajnicob ti pejtyel ora jini muꞌ bʌ i sajcañob. 
Mi quejel i cꞌajtisan lac Yum ti pejtyel añoꞌ bʌ ti mulawil. Mi quejel i sutquiñob i bʌ baꞌan lac Yum. Pejtyel quixtyañu ti mujchꞌ ti mujchꞌ mi quejel i chꞌujutisañob tiꞌ tyojel i wut. 
Como i chaꞌañʌch lac Yum i yumintyel. Mi yumintyel ti jujumpꞌej pañimil. 
Pejtyel quixtyañujob yujiloꞌ bʌ sajtyel, jini wen chumulob bʌ yicꞌot jini pꞌumpꞌuñoꞌ bʌ jeꞌel, Mi quejel i wersa chꞌujutisañob lac Yum. 
Lac jiñʌjlel mi quejel i yʌcꞌob i bʌ chaꞌan i chaꞌliben i toñel lac Yum. Mi quejel i subeñob i yalobilob i tꞌan lac Yum cꞌʌlʌ ti beleꞌ ora. 
Mi quejel i subob tyoj bʌ i melbal lac Yum. Jini max tyo bʌ ti chꞌocꞌʌyob mi quejel i subentyel i melbal lac Yum.