Salmos.
40.
Jal tic pijtyʌ c Yum tiꞌ xucꞌtyʌlel c pusicꞌal. Tiꞌ ñʌchꞌtyʌyon. Ti yubibeyon c tꞌan. 
Tiꞌ locꞌsʌyon cheꞌ bajcheꞌ ti aban baꞌ bʌbʌqꞌuen mic jilel ti tyam bʌ ocꞌlel. Tiꞌ waꞌchocoyon ti pam xajolel. Tiꞌ xucꞌchocoyon ti xʌmbal. 
Ti yʌqꞌueyon tsijiꞌ bʌ cꞌay Chaꞌan j cꞌʌyiben i ñuclel lac Dios. Cabʌl c piꞌʌlob mi quej i qꞌuelob. Mi quej i bʌcꞌñañob lac Yum. Mi quej i chꞌujbiñob. 
Tijicña jini quixtyañu muꞌ bʌ i chꞌujbin lac Yum tiꞌ pusicꞌal. Machꞌan miꞌ tsʌclen majlel jini muꞌ bʌ i chanꞌisan i bʌ, muꞌ bʌ i cʌyob jini melel bʌ tꞌan. 
C Yum Dios, wen cabʌl jini ñuc tyac bʌ a chaꞌlibal tsaꞌix bʌ a chaꞌle. Chʌncol a chʌc ñaꞌtyañon lojon. Maꞌan yambʌ bajcheꞌet. Muqꞌuic c sub a chaꞌlibal Mach chꞌujbi tsicol a melbal. 
Machꞌan maꞌ mulan tsʌnsʌbil bʌ a majtyan yicꞌot ofrenda Machꞌan ti a cꞌajtibeyon pulem bʌ a majtyan yicꞌot majtyañʌl chaꞌan mulil mi machꞌan mi lojon chꞌujbiñet ti jumpꞌej lojon c pusicꞌal. Pero ti a wʌqꞌueyon c chꞌujbibeñet a tꞌan. 
Tic subeyet: Tyalon, choꞌon. Tsꞌijbubil chaꞌañon ti a jun: 
C Dios, cꞌajacña coj mic mel chʌ bʌ jach a wom. Lotyol a mandar tic pusicꞌal. 
Tic subu jini wen bʌ tꞌan baꞌ muchꞌquibilob cabʌl quixtyañujob. C Yum, mic wen sub a tꞌan. Wen a wujil maꞌ mʌcʌl c tiꞌ. 
Tic tsictisʌyet baꞌ miꞌ muchꞌquiñob i bʌ. Machꞌan tic mucuyet tiꞌ tyojlelob. Tic jamʌl subu chaꞌan xucꞌulet. Weñʌch maꞌ chaꞌlen cotyaya. Cabʌlʌch i yutslel a pusicꞌal. Melelʌch a tꞌan. 
C Yum, maꞌ maꞌ chʌquibeñon a pꞌuntyaya. Cʌñʌtyañon chaꞌan ti a pꞌuntyaya yicꞌot ti melel bʌ a tꞌan. 
Ti wen ocꞌʌ wocol tic tyojlel. Jini c mul ti yʌcꞌʌyon ti wocol. Mach cujilix chʌ bʌ yom c chaꞌlen. Más on c mul ti tsicol bajcheꞌ i tsutsel c jol. Tsitsiña c pusicꞌal ti caj. 
Awocolic c Yum, locꞌsañon ti ili wocol ti yutslel a pusicꞌal. C Yum, cotyañon ti ora. 
Laꞌ i chaꞌleñob quisin jini yomoꞌ bʌ i jisañon. Laꞌ sojquic i pensal. Laꞌ yʌsʌnticob. Laꞌ i yubiñob quisin jini yomoꞌ bʌ i yilan cubin wocol. 
Laꞌ i yubin ñoj bʌbʌqꞌuen bʌ tiꞌ pusicꞌal muꞌ bʌ i subeñon: Jajaja, cheꞌob, mi yʌlob ti caj c wocol. Laꞌ i chaꞌleñob quisin chaꞌan i mul. 
Laꞌ i yubiñob cꞌajacña bʌ i yoj ti pejtyelel muꞌ bʌ i sajcañet. Laꞌ i yʌlob ti beleꞌ ora ti pejtyelel muꞌ bʌ i pꞌuntyañetyob chʌncol bʌ i pijtyañob i cotyʌntyel ti a tyojlel: Ñoj ñucʌch lac Yum, cheꞌob. 
Pero joñon, pꞌumpꞌuñon. An tyo yom c wenlel, pero lac Yum miꞌ cꞌajtisañon: C Yum, ajcʌñʌtyajet c chaꞌan, laꞌ baꞌ añon ti ora. Ajcotyayajet c chaꞌan, C Dios, mach yom a jal pijtyan, choꞌon.