Salmos.
91.
Jini muꞌ bʌ i chumtyʌl yicꞌot jini Ñoj Ñuc Bʌ Mi yajñel ti axñal jini Machꞌʌ baꞌan i Pꞌisol i Pꞌʌtyʌlel. 
Mi quej c sub: Lajalʌch lac Yum bajcheꞌ tsꞌajc muꞌ bʌ i joy mʌc otyot baꞌ mic putsꞌel. C Diosʌch, chʌncol bʌ j chꞌujbin, choꞌon. 
Dios mi quej i cʌñʌtyañet ame chujquiquet ti yac cheꞌ bajcheꞌ xmaꞌtyeꞌ mut. Mi quejel i locꞌsañet ti cꞌamꞌan tyac muꞌ bʌ ti tsʌnsa. 
Dios mi quej i cʌñʌtyañet ti yebal i wichꞌ yubil, cheꞌ bajcheꞌ juncojt ñaꞌ mut miꞌ lutsꞌ i yal. I xucꞌtyʌlel i pusicꞌal Dios, jiñʌch lac mʌctijib baꞌ mi laj cʌñʌtyʌntyel. 
Maꞌan mi quej a bʌcꞌñan jini bʌbʌqꞌuen tyac bʌ ti acꞌbʌlel. Mi jinic wʌn tyeꞌ muꞌ bʌ i julet ti qꞌuinil. 
Mi jinic wocol bʌ cꞌamꞌan tyac muꞌ bʌ i ñumel ti acꞌbʌlel, mi jinic muꞌ bʌ ti jisaya ti xinqꞌuinil. 
Aunque ti tsʌnsʌntiyob jumpꞌej mil ti a tꞌejl Yicꞌot diez mil yaꞌ ti ñoj bʌ a cꞌʌb, maꞌan mi quej i tyajet. 
Ti a wut mi quej a qꞌuel i xotꞌob jini simaroñoꞌ bʌ jini tsaꞌ bʌ i ñiqꞌui chaꞌleyob. 
Como lac Yum jiñʌch lac putsꞌib. Jatyet jeꞌel tsaꞌix a wʌcꞌʌ a bʌ tiꞌ wenta jini Ñoj Ñuc Bʌ. 
Jin chaꞌan maꞌan mi quej a wubin wocol. Maꞌan mi quej i tyajet jini cꞌamꞌan tyac muꞌ bʌ ti tsʌnsa yaꞌ baꞌ chumulet. 
Como jini Ñoj Nuc Bʌ tsaꞌix i yʌqꞌue ajtroñel i chaꞌan chꞌoyol bʌ ti panchan, chaꞌan i cʌñʌtyañet baꞌical jach maꞌ majlel. 
Mi quej i chuquet ame maꞌ jatsꞌ a woc ti xajolel. 
Jinic tyo jini bajlʌm yicꞌot lucum maꞌan mi quej i tyʌcꞌlañet. Cheꞌ bajcheꞌ mi quej a tyecꞌ jini simaron bʌ bajlʌm yicꞌot lucum pero maꞌix chʌ bʌ mi tyumbeñet. 
Dios mi yʌl: Mi quej j cotyan loqꞌuel ti wocol jini ochem bʌ tic wenta como miꞌ pꞌuntyañon. Mi quej j cʌñʌtyan como miꞌ cʌñon. Miꞌ pejcañon tij cꞌabaꞌ. 
Cheꞌ miꞌ cꞌajtibeñon mi quej c jacꞌben i tꞌan. Mi quej cajñel yicꞌot cheꞌ ti yorojlel wocol. Mi quej cʌcꞌ ti colel. Mi quej cʌqꞌuen i ñuclel. 
Mi quej c tijicñisan ti cabʌl i jabilel. Mi quej j cotyan, cheꞌ mi yʌl Dios.