1 Liƚya' Betania tipa'a anuli ƚafcuana cuftine Lázaro. Iƚque timana' lipimaye cacaƚ'no', liƚpuftine María y Marta. Iƚniya iƚpiƚya' Betania.

2 Ƚipima ƚafcuana, iƚque María, tixcuaf'i'ma laceite lojuepaj c'a li'mitsi' Jesús, tetufco'ma ƚijuac.

3 Iƚniya loquexi' lipimaye Lázaro umme'me cataiqui', tu'inna Jesús:

―Maƚ'ailli', ƚonƚejmalepa, iƚque Lázaro, textafque.

4 Licuej'ma Jesús lataiqui' ticua:

―Iƚe licuana aimima'aya nulemma Lázaro. Lo'iya iƚque timuc'i'mola' lan xanuc' te ts'i'ic' laimane, iya' i'Hua ȽanDios. Tixinƚe acueca' ȽanDios.

5 Jesús ti'ela' capic'a juaiconapa lapimaye Marta, María jouc'a Lázaro. 6 Licuej'ma textafque Lázaro icoƚ'ma, aiqui'huac'. Jiƚpe pe lopa'a ipanemma oquej quitine. 7 Lijou'ma timila' ts'ilihuequi:

―Ƚepá, aƚecona'me al distrito Judea.

8 Ts'ilihuequi timiyi:

―Momxi, lan judío nomana' jiƚpiya ma quite' coƚa' tipato' capic', tima'ato'. Itsiya, tocua: “Ca'huacona'ma pu'hua”.

9 Jesús timila':

―Anuli litine tipa'a imbamaj coque' hora. Ja'ni to'huaƚa' litine aimuc'uiyaco'. Cal 'ora tepalc'o'i'mo'. 10 Ja'ni to'huaƚa' lipuqui', tuc'ui'mo'. Ailopa'a napalc'o'iyaco'. To'hua al muf.

11 Lijou'ma timila':

―Ƚaƚejmalepa Lázaro tixmay. Ai'huapa jiƚpe, cummef'nata. 12 Ts'ilihuequi timiyi:

―Maƚ'ailli', ja'ni tixmay, tixaƚconna.

13 Jesús linespa: “Lázaro tixmay”, tuya'e': “Joupa imapa”. Ts'ilihuequi aiquiƚcueca. Ticuayi: “Lázaro ma le'a tixmay”.

14 Jesús ipalaic'o'mola' al cuajmaica cataiqui', timila':

―Lázaro joupa imapa. 15 Itsiya aicacua: “Coƚa' pu'hua caifpa'a”. Aicaxhueƚcocojma. Aixina' iƚe li'ipa titoc'i'molhuo' imanc'. Xonca aƚ'huaiyijm'ma iya'. Itsiya ƚepá. Aƚcuaita pe lopa'a iƚque.

16 Tomás ƚacui'ipa cal Cuatsi, timila' liƚejmale:

―¡Ƚepá! Ja'ni tima'antsa Jesús, illanc' jouc'a aƚma'atsonga'. Aƚma'monga' anuli.

17 Licuaitsi Jesús jiƚpe liƚya' joupa ixhuaita amalpuj quitine queminni Lázaro. 18 Liƚya' Betania ahuejnca Jerusalén. Laquipiculi' to afane' kilómetro. 19 Axpela' lan xanuc' judío quiyouyumma Jerusalén, icuaitsa lilejut'ƚ Marta y María, tiƚonc'e'entsola' liƚpixhuejma', joupa imapa ƚiƚpima Lázaro. 20 Marta icuej'ma icuaico'ma Jesús. Ipanni titalecuftsi. María ipanenni lajut'ƚ. 21 Marta timi Jesús:

―Mai'ailli', coƚa' topa'a fa'a, aimimaya ƚaipima. Joupa imanapa. 22 Tama imanapa ƚaipima, iya' ti'hua ca'huaiyijnhuo'. Aixina' ja'ni toxa'hue'ma ȽanDios iƚque tepi'i'mo' lofxahue'eya.

23 Jesús timi:

―Timaf'ina'ma ƚopima.

24 Marta timi:

―Ne'. Ticuaitsi Lijoujma Quitine timaf'ina'ma. Toƚta'a aixina'.

25 Jesús timi:

―Ma' iya' camaf'i'ina'mola' limanapola'. Capi'ina'mola' liƚpitine. Naitsi ƚaƚ'huaiyijmpa tama timanƚa' timaf'ina'ma. 26 Iƚne naƚ'huaiyijmpa ja'ni ts'iƚmaf'i' aimimayacola' nulemma. Ima', ¿te cofcuapa? ¿Ja'ni canesqui al ƚinca?

27 Marta timi:

―Mai'ailli', iya' cacua tonesqui al ƚinca. Aixina' ȽanDios tumme'ma ƚi'Hua, iƚque jifa'a ticuaihuo li'a ƚamats'. Iya' cacua: Ima' i'Hua ȽanDios, joupa ocuai'ma. Ima' unCristo.

28 Lijoupa toƚta'a linespa Marta, i'hua'ma ijoc'itsi ƚipima María. Ipalaic'o'moƚtsi caquiƚtuca'. Marta lipalaic'opa ƚipima, timi:

―Icuai'ma Ƚomxi. Tijoc'ihuo'.

29 Licuej'ma iƚe lataiqui', María aiquicoƚi, itsahuenni i'hua'ma titalecuftsi Jesús. 30 Jesús ai'a titsufai'ma liƚya' ipanemma maƚpiya pe litalecufhuo'ma Marta.

31 Jiƚpe lejut'ƚ María timana' lan judío, icuaita tiƚonc'e'e'me lipixhuejma'. Iƚne ixim'me María itsahuenni. Ixim'me aiquicoƚi, ipanni. Ticuayi:

―I'huapa al pu'hua. Jiƚpiya tijojta.

Ihuej'me.

32 María icuaitsi pe lopa'a Jesús. Exc'onƚingai'ma li'mitsi', timi:

―Mai'ailli', coƚa' topa'a fa'a, aimi'iya toƚta'a. Ƚaipima aimimaya.

33 Jesús ixim'mola' tijolijyi María jouc'a lan xanuc' judío lilihuequi María, ihuotsonni juaiconapa. Ixnalif'ma acueca'. 34 Icuis'e'mola', timila':

―¿Petsi colamu'ehuo'me?

Italai'e'me, timiyi:

―Mai'ailli', ƚepá. Aƚsinna.

35 Licuaitsa pe lamuya, Jesús ijoj'ma.

36 Lan xanuc' judío tinesyi:

―¡Toƚsinƚe! Juaiconapa i'epa capic'a Lázaro.

37 Locuenaye ticuayi:

―Iƚque ixaƚ'me'e'ma li'u' cal fo'. ¿Te aiquixaƚ'me Lázaro? ¿Te quipo'nocopa quimacopa?

38 Jesús icuaitsi petsi lamuya Lázaro. Ihuotsoconamma juaiconapa. Ixnalifcona'ma. Lamuya Lázaro unts'eja'. Lico cunts'eja' eti'icoya acueca' capic.

39 Jesús icuxe'e'mola' lan xanuc', timila':

―Tonliƚonc'eƚe iƚque ƚapic.

Marta ipima ƚimapa timi Jesús:

―Mai'ailli', itsiya tujuelojma. Ixhuaita amalpuj quitine quimac'.

40 Jesús timi:

―Joupa aimipo': “Ja'ni ima' aƚ'huaiyinge, toxim'ma acueca' ȽanDios, acueca' lo'eya”.

41 Iƚonc'em'me ƚapic.

Jesús ehuelojm'ma al toncay lema'a, timi qui'Ailli':

―Mai'Ailli', cax'najtsi'ihuo' joupa aƚquimf'epa. 42 Tama aixina' itine itine aƚquimf'e, aimipo': “Cax'najtsi'ihuo' joupa aƚquimf'epa”. Aipic'a aƚcuejla' iƚe laimipo' lan xanuc' nacaxhuoƚanna fa'a. Joupa ainu'ipola': “Cai'Ailli' lummepa fa'a li'a ƚamats'”. Itsiya aipic'a ti'eƚe ƚinca iƚe lainuya'apa.

43 Lijoupa toƚta'a licuapa Jesús ija'a'ma, timi:

―¡Lázaro! ¡Taipanni!

44 Ƚimapa ipanni ƚunts'eja'. Limane' li'mitsi' ifiyicoya ijahua', li'a iju'ecopa apa'yu. Jesús timila' lan xanuc':

―Toluhuaiƚƚe lijahua'. Ti'huanƚa'.

45 Lan xanuc' judío iƚne nahuejmpá María, axpela' iƚniya lixim'me li'epa Jesús, tixpic'eyi tihuejle. 46 Locuenaye iye'me pe lomana' lam fariseo, u'intsola' li'epa Jesús. 47 Lixanuc' cal cuecaj ca'ailli' jouc'a lam fariseo ijoc'im'mola' lan tsilaj xanuc' iƚne noxpijpá lataiqui'. Efot'ƚe'moƚtsi, timiyoƚtsi:

―¿Te caƚ'eyacu? Iƚque Jesús ti'ay al cueca'. 48 Ticuicomma aƚpa'neƚe, ja'ni a'i jahuay lan xanuc' tihuej'me. Tijouƚa' tixtulecu lan romano, teteƚ'me laƚcuecaj xoute', aƚjou'ne'monga' illanc' ninc'ijudío.

49 Maƚpe lefot'ƚeyopoltsi tipa'a anuli cal xans cuftine Caifás. Jiƚniya ƚitiné iƚque Caifás copa'a cal cuecaj ca'ailli'. Iƚque timila' lif'as xanuc':

―Imanc' ailopa'a coƚsina'. 50 Aimoƚspic'eyi. Xonca al c'a luyalaico'me ja'ni timaƚa' le'a anuli cal xans, toƚta'a tunƚu'e'mola' jahuay laƚxanuc'. Aimaƚjouyaconga' illanc' ninc'ixanuc' judío.

51 Caifás a'i quituca' lipicuejma' toƚta'a tipalay. Iƚniya ƚitiné iƚque copa'a cal cuecaj ca'ailli', ma tuya'e' lixpic'epa ȽanDios. Maƚque ȽanDios joupa ixpic'epa tima'anƚe Jesús, toƚta'a tunƚu'e'mola' lixanuc' ȽanDios, jiƚniya nomana' jiƚpiya ƚamats'. 52 A'i ma le'a lixanuc' ȽanDios nomana' jiƚpiya ƚamats', tunƚu'e'mola' jouc'a jahuay lixanuc', ni petsi lomana', tefot'ƚena'mola' anuli. 53 Ma jiƚiya litine iƚniya lan judío ixpic'e'me tima'anƚe Jesús.

54 Lijou'ma Jesús aimuyaicoconghua pe lomana' lan xanuc' judío. Ipanni jiƚpiya al distrito Judea. Icuaitsi anuli liƚya' cuftine Efraín. Iƚpe liƚya' tipa'a huejnca anuli ƚamats' petsi ailopa'a quiƚya'. Jiƚpe imanenca anuli, Jesús y ts'ilihuequi.

55 Joupa icuaico'ma al juic cuftine al Pascua. Axpela' lan xanuc' ipalunca ƚiƚpiƚeloƚya', if'ajli'me al toncay, ticuaita al cuecaj quiƚya' Jerusalén. Ticuaita ai'a ti'i'ma al juic. Tenant'ƚi'me lataiqui' loya'apa locuxepa ȽanDios. Toƚta'a ƚa'ailli' timi'mola': “Ima' unlimpio. Ti'i'ma tote'ma ƚotejacu jiƚpe al juic.” 56 Iƚne lan xanuc' ehue'me Jesús, ecaxhuoƚai'me pe lopa'a al cuecaj xoute', timiyoƚtsi:

―¿Te coƚcuapa? ¿Te ticuaihuo Jesús fa'a al juic, o aimicuaiya?

57 Lixanuc' cal cuecaj ca'ailli' jouc'a lam fariseo joupa icuxepá, timinnila' lan xanuc':

―Anuli imanc' ja'ni ti'iƚa' quixina' pe lopa'a Jesús, lu'itsonga'.

Iƚne tehueyi te co'iya mi'noƚyacu Jesús.