LA CARTA A LOS HEBREOS.
1.
Oniba Dios a'uti u täscun u yajt'anob tuba u yälbenob cä najtäcäl noxi'papla u t'an. Cada juntu de ni ajt'anob jiniba, Dios u yälbi cache'tacda u xe u yäle'. Mach ump'e manera täcä u chi Dios tuba u pecänob. 
De ya'i ac'oti q'uin u täscun u Yajlo', aj Jesucristo, tuba u tzupsen u laj älbenonla upete cuaxca c'änä cuwina'tanla. Une chich u chi upete cua' an tu pancab y tä cielo ca' chich Dios u yäc'bi u chen. Dios u yäc'bi upete tu c'äb täcä. 
Uneba tä' pitzi, ixta taj säjq'uelan, ca' chich an u pitzilan Dios. Ca' chich an Dios, che' chich an täcä. T'oc u poder u t'an u yäc'ben ajnic tu lugar upete cua'tac ayan. Jinq'uin u tzupsi u chen upete cuaxcatac c'änä utic tuba u toje' cä tanäla, t'äbi tä cielo y chunwäni tu noj cä noj Papla Dios, jini más Ajnojaba. 
Dios u yäc'bi xic más ajnoja que ni ángelojob, uc'a une u yälbi cache' mero u Yajlo'. 
Niuntu ángelo mach bay a'uti Dios u yälben ca'da: Ane Cajlo'et. Sami chich cä'bet cuxlequet. Mach ángelo täcä u yäli Dios jinq'uin u yäli ca'da: No'on cä xe de u Pap. Une u xe de Cajlo'. 
Che' chich täcä jinq'uin u täsqui u juntul Ajlo' pancab, Dios u yäli ca'da: Upete ni ángelojob ta Dios c'änä u ch'u'ul c'ajti'inob. 
Dios u yäle' cache' u chen t'oc u ángelojob jinq'uin u yäle' ca'da: Jinq'uin cä c'äne' ni cä ángelojob tuba u cherbenon cä patan, cäq'ue' chänintic cache' chichca coli cäq'ue' chänintic, ca' a wälä ic', y ca' a wälä c'ac'. 
Dios u yäle' cache' u chen t'oc u Yajlo' täcä jinq'uin u yäle' ca'da: Ane chich ni Dioset. A xe a paq'uin chen manda. A c'alin chen tu toja bajca a chen manda. 
Ane tä' a wo a chen tu toja, y mach a wo a chen ni mach utz uticba. Jin uc'a Dios, ni Dios ta'aba, u yäc'bet más a poder que niuntu jinq'uin u yäc'bet más a ch'a'aljin que niuntu. 
Dios u yäli täcä ca'da: Ane, Ajnojalet, chäcäl najtäcä a chi u pancab y cielo. Ane chich a chi t'oc a c'äb. 
Ni jinijob u xe tä xupo une. Aneba paq'uin anet. Upete ni jinijob u xe tä jelman ca' a wälä ump'e buc. 
Ane chich a xe a tz'eje' ca' chich ump'e buc täcä u chojcan jinq'uin mach ni' utz. Mach uni' xin tä colanob ca' chich ayan. Pero aneba mach u yänä uba a jut. Mach uxet tä noxiban. 
Pero Dios mach bay u yälbi niuntu u ángelo ca'da: Chumi' täc noj ixta que mach cä laj pa'säben u poder jini que mach yo u chänenetba. 
Upete jini u ángelo Dios u yajpatan chich une. Dios u täscun tuba u täclen t'oc cua' chichca que c'änä uc'ajob jini machcatac u yaqui uneba tuba u nonoj japän.