1 Pues chequer tamar lo que che Unawalir e Dios que tama ucꞌapesnibꞌir or e rum era ayan meyra tin e tuaꞌ axin uyactobꞌ e cꞌupesiaj tama e Dios. Y tamar era cꞌani axiobꞌ tupat e sian mein xeꞌ ajmajresiajobꞌ y cꞌani acꞌupseyanobꞌ tamar lo que axin acansenobꞌ umen e sian mabꞌambꞌan mein era. 2 Pues e canseyaj cocha era watar tuaꞌ tin e ajqꞌuecranerobꞌ xeꞌ unatobꞌ amajresian y xeꞌ mix tucꞌa e subꞌar tamarobꞌ. 3 Pues jaxirobꞌ cꞌani ucansiobꞌ e gente que majax bueno tuaꞌ anujbꞌiobꞌ sino que más bueno tuaꞌ aquetpobꞌ ubꞌajnerobꞌ. Y axin acanseyanobꞌ que ayan e comida que ma erer acꞌujxa. Pero non xeꞌ ajcꞌupesiajon tama Cadiosir y xeꞌ war canata lo que erach canata que chembꞌir tunor e comida umen e Dios y que tamar era erer acꞌujxa umen tunor e gente, y que ucꞌani tuaꞌ atajttzꞌa ucꞌabꞌa e Dios tamar. 4 Porque tunor lo que chembꞌir umen e Dios quetpa imbꞌutz tunor, y matucꞌa tamar tuaꞌ caxejbꞌe ut, sino que erer cachꞌami tunor e comida jay catattzꞌi ucꞌabꞌa e Dios tamar. 5 Pues jax uyojroner e Dios taca e tattzꞌarsiaj xeꞌ uche aquetpa imbꞌutz tunor e comida lo que cachꞌami.

6 Jay iꞌxin awirse tunor era tut e hermanuobꞌ, cꞌani aquetpa chequer que net jax inteꞌ man xeꞌ imbꞌutz awirnar tut e Cristo Jesús, cocha war iqꞌuecꞌojsena umen lo que erach lo que war icꞌupseyan tamar y war iqꞌuecꞌojsena umen tunor e canseyaj xeꞌ imbꞌutz lo que cꞌapa achꞌami era. 7 Pues ira achiquini inteꞌ aras ojroner bꞌan cocha ayan tara tor e rum xeꞌ matucꞌa ucꞌampibꞌir, sino que turbꞌan abꞌa tuaꞌ iqꞌuecꞌo ixana tama ubꞌir e Dios. 8 Pues ayan ucꞌampibꞌir jay ayan lo que war cache tuaꞌ caqꞌuecꞌojse cacuerpo tara tor e rum, pero más ayan ucꞌampibꞌir conda cache lo que utacrion caqꞌuecꞌo caxana tama ubꞌir e Dios porque axin acꞌampa conda turonto tara tor e rum y axin acꞌampa conda caxin tut e qꞌuin ubꞌan. 9 Pues jax era inteꞌ ojroner xeꞌ tawar tuaꞌ acꞌupesna umen tunor e gente. 10 Y tamar era war inchecsu uyojroner e Dios tic taca y war inqꞌuecꞌo inwawan tut lo que watar porque inturbꞌix nicojcsiaj tama Nidiosir xeꞌ bꞌixir y xeꞌ jax Uyajcorpesiaj tunor e gente tara tor e rum, pero más Ajcorpesiaj tuaꞌ tin e war acꞌupseyanobꞌ tamar.

11 Entonces aren uchicobꞌ lo que war intzꞌijbꞌa tabꞌa era tunor e ajcꞌupesiajobꞌ, y cansenobꞌ tuaꞌ acꞌupseyanobꞌ tama tunor era ubꞌan. 12 Pero ira awacta ubꞌijnuobꞌ e gente que matucꞌa acꞌampibꞌir umen que chꞌom maxtaquet. Sino que turbꞌan abꞌa tuaꞌ iquetpa inteꞌ chequerir tutobꞌ tama tunor lo que aware, y tama tunor lo que ache, y que war ayajta ut tunor e ajcꞌupesiajobꞌ, y que war iqꞌuecꞌo icꞌupseyan tama e Dios, y que war aquetpa erach awirnar tut tunor e gente. 13 Pero tama e tiempo era conda merato incꞌotoy toit, turbꞌan abꞌa tuaꞌ ache leer uyojroner e Dios tut e gente axin, y tuaꞌ aware e gente tuaꞌ uyustes ubꞌobꞌ tut e Dios, y tuaꞌ icanseyan tama uyojroner e Dios. 14 Y ira awacta ucꞌampesnar acꞌampibꞌir lo que ajcꞌunet umen e Dios conda cay ucꞌatbꞌu ucꞌabꞌobꞌ tama ajor cora líder bꞌan cocha arobꞌnobꞌ tuaꞌ uchiobꞌ umen inteꞌ ojroner xeꞌ ajcꞌunobꞌ umen Unawalir e Dios.

15 Pues chen tunor lo que war intzꞌijbꞌa tabꞌa era y turbꞌan abꞌa tamar inyajrer, porque tamar era cꞌani uwirobꞌ tunor e gente que war abꞌoro lo que anata ache tama upatnar e Dios. 16 Y cojcon abꞌa tama tunor lo que war ache y tama tunor lo que war icanseyan. Ira awacta tuaꞌ ache tunor era, porque tamar era iꞌxin acorpes abꞌa y iꞌxin acorpes tunor tin e axin uyubꞌiobꞌ lo que war achecsu axin ubꞌan.