1 Pues entonces ixin e Jacob y utajwi ubꞌa taca e inmojr ufamilia. Y warto axana tor e bꞌir conda uchꞌujcu uwira que war watar e Esaú y que ayan 400 winicobꞌ tacar. Y cay bꞌacta e Jacob y tamar era cay uxere umaxtacobꞌ cora cora tujam e Lea y e Raquel y umanobꞌ xeꞌ ixictac. 2 Y uyare uman uwixcarobꞌ taca umaxtacobꞌ tuaꞌ axiobꞌ bꞌajxan, y de allí uyare tuaꞌ axin e Lea taca umaxtacobꞌ, y nacpat era uyare tuaꞌ axin e Raquel taca e José. 3 Y de allí numuy e Jacob bꞌajxan que e inmojr, y conda innajtto turu e Esaú, e Jacob cay cotuan tut jaxir este que utacbꞌu ut ujor tut e rum. Y bꞌan uche siete veces este que cꞌotoy usacun tuyejtzꞌer. 4 Y de allí ajni ixin e Esaú tuaꞌ utajwi ubꞌa taca e Jacob, y umori umeqꞌue ubꞌobꞌ y utzꞌujtzꞌi ucajram y cay aruobꞌ. 5 Y de allí e Esaú cay uchꞌujcu uwira que ayan e ixictac y e bꞌiqꞌuit maxtac tacarobꞌ, y entonces ojron cocha era y che:

—Y ¿chiobꞌ tunor e gente era xeꞌ turobꞌ tacaret? che e Esaú. Y ojron e Jacob y che:

—Pues jaxirobꞌ jax niwixcarobꞌ y nimaxtacobꞌ xeꞌ ajcꞌunen umen e Dios cocha nojta ucꞌunersiaj tacaren, che e Jacob.

6 Entonces ixiobꞌ e manobꞌ taca uyarobꞌ esto tuyejtzꞌer e Esaú y cotuanobꞌ tut este que utacbꞌu ut ujorobꞌ tut e rum. 7 Y de allí tari e Lea taca umaxtacobꞌ y cotuanobꞌ tut jaxir bꞌan taca cocha uchiobꞌ e inmojr, y de allí tari e José taca e Raquel y cotuanobꞌ ubꞌan. 8 Entonces ojron e Esaú y che:

—¿Tucꞌa war abꞌijnu ache taca tunor e sian aracꞌobꞌ era xeꞌ inwira conda yopen? che e Esaú uyare e Jacob. Entonces ojron e Jacob y che:

—Pues cꞌani inwajqꞌuet tunor era tuaꞌ icꞌotoy itzay awiren, che e Jacob uyare e Esaú.

9 Entonces ojron e Esaú y che:

—Ira abꞌijnu meyra tama tunor era, niwijtzꞌinet. Nen ayan meyra aracꞌobꞌ tacaren. Más imbꞌutz tuaꞌ taca acojco net tunor e aracꞌobꞌ era, che e Esaú.

10 Pero e Jacob ojron y che:

—Machi. Pues quisinic que achꞌami lo que war inwajqꞌuet era. Porque jay war itzay tacaren ucꞌani tuaꞌ achꞌami e aracꞌobꞌ lo que war inwajqꞌuet. Pues conda inwira oit sajmi que war itzay meyra, quetpa bꞌan ani cocha jay war inwira ut e Dios, cocha war itzay apejquen. 11 Y tamar era quisinic que achꞌami e aracꞌobꞌ era xeꞌ intares, porque Nidiosir xeꞌ nojta ucꞌunersiaj tacaren, ixin ubꞌorojse tunor lo que ayan tanibꞌa, che e Jacob.

Y cocha e Jacob war uyare iraj iraj tuaꞌ uchꞌami e aracꞌobꞌ, entonces e Esaú ixin uchꞌami. 12 Entonces ojron e Esaú cocha era y che:

—Incoꞌ ixto yaꞌ, porque ucꞌanto tuaꞌ caxana meyra tuaꞌ cacꞌotoy tiaꞌ turen, che e Esaú uyare e Jacob.

13 Pero majax bꞌan war ucꞌani e Jacob, y entonces ojron y che:

—Pues net jax nisacunet xeꞌ inyajta oit. Net anata que injayjayobꞌ nimaxtacobꞌ, y que ucꞌani tuaꞌ imbꞌijnu ubꞌan tama tunor e aracꞌobꞌ y tama tunor e wacaxobꞌ xeꞌ intocto acuxpa uyarobꞌ. Porque jay incꞌoyyesobꞌ umen que inchiobꞌ axanobꞌ wacchetaca, bꞌajcꞌat axin achamayobꞌ tunor e bꞌiqꞌuit aracꞌobꞌ tama inteꞌ taca día. 14 Pues más ani bueno taniut tuaꞌ iꞌxin bꞌajxan taca tunor aman, y nen tuaꞌ inxin cora cora bꞌan cocha ucꞌani tuaꞌ axanobꞌ e aracꞌobꞌ, y bꞌan cocha ucꞌani tuaꞌ axanobꞌ e bꞌiqꞌuit maxtac. Y tamar era axin incꞌotoy intajwiet watar e día tiaꞌ turet tama e lugar Seír* Pues e Jacob ma tiaꞌ cay ubꞌijnu tuaꞌ acꞌotoy esto tiaꞌ turu e Esaú, pero cocha e Esaú war uyare iraj iraj tuaꞌ acꞌotoy esto tuyotot, ojron e Jacob cocha era tuaꞌ ulocse ubꞌa tamar lo que war arobꞌna., che e Jacob uyare e Esaú.

15 Entonces ojron e Esaú y che:

—Bueno pue. Pero quisinic inwacta cora nimanobꞌ tuaꞌ ucojquetobꞌ, che e Esaú.

Entonces ojron e Jacob y che:

—Machi, ¿tucꞌa tuaꞌ que war abꞌijnu cocha era? Lo que más ayan ucꞌampibꞌir jax que cꞌumponix, che e Jacob uyare e Esaú.

16 Entonces tamar taca e día era cay xana e Esaú tuaꞌ asutpa axin esto tama e lugar Seír. 17 Pero e Jacob machi ixin esto tama e lugar Seír, sino que ixin esto tama e lugar Sucot, y yajaꞌ taca cay ujachi inteꞌ uyotot xeꞌ chembꞌir taca e bꞌujc y cay uche cora galera tuaꞌ uyaracꞌobꞌ ubꞌan. Pues jax tamar era que turbꞌana ucꞌabꞌa e lugar Sucot, cocha e ojroner Sucot war che “Galera” tama e ojroner hebreo.

18 Entonces bꞌan cocha era locꞌoyobꞌ e Jacob taca tunor ufamilia tama e lugar Padán-aram tuaꞌ axiobꞌ esto tama e lugar Canaán. Y tama tunor uxambꞌarobꞌ era mamajchi cay unumse ubꞌa, y cꞌotoy turuan tuyejtzꞌer inteꞌ chinam xeꞌ ucꞌabꞌa Siquem. 19 Pues ayan inteꞌ nuxi winic tama e chinam era xeꞌ ucꞌabꞌa Hamor xeꞌ ayan uyunenobꞌ y e Jacob umani inteꞌ tajo rum tuobꞌ tama cien ut e tumin xeꞌ chembꞌir taca e plata. Y yajaꞌ taca cay ujachiobꞌ uyototobꞌ† E ototobꞌ era chembꞌir taca e bꞌujc.. 20 Y nacpat era upetzꞌe cora tun tuaꞌ aquetpa bꞌan cocha inteꞌ altar tiaꞌ tuaꞌ uyujtzꞌi ut e Dios, y uturbꞌa ucꞌabꞌa El-elohé-israel xeꞌ war che “Cadiosir jax e Dios tuaꞌ e Israel”.