1 Pues entonces tama e bꞌajxan día tuaꞌ e semana xeꞌ jax inteꞌ día domingo ixin e María xeꞌ tuaꞌ e chinam Magdala esto tiaꞌ mujca e Jesús. Y incsibꞌanto tama e hora era. Pero conda cꞌotoy, uwira que loqꞌuesbꞌirix e nuxi tun xeꞌ macar ani utiꞌ e chꞌen tamar. 2 Entonces ixin e María ajner tuaꞌ acꞌotoy tut e Pedro y tut inteꞌ ajcanuar xeꞌ chojresbꞌir ut meyra umen e Jesús y che:

—Ayan chi ulocse ucuerpo Cawinquirar macuir e chꞌen y machi canata tiaꞌ qꞌuejcha ixin, che e María.

3 Entonces locꞌoy wacchetaca e Pedro taca e ajcanuar era tuaꞌ axiobꞌ esto tiaꞌ mujca e Jesús. 4 Y war aꞌjniobꞌ chatertiobꞌ era, pero más ajni e ajcanuar era, y tamar era cꞌotoy tut e mujr bꞌajxan que e Pedro. 5 Y jaxir pacwan uchꞌujcu macuir e chꞌen y uwira que ajtaquix ubꞌajqꞌuibꞌir turu, pero machi ochoy macuir e chꞌen. 6 Y de allí cꞌotoy e Simón Pedro. Pero jaxir machi quetpa patir sino que ochoy wacchetaca macuir e chꞌen, y uwira ubꞌan que ajtaquix e bꞌajqꞌuibꞌir turu. 7 Pero uwira que ujobꞌ jor e Jesús quetpa najtir y que tzꞌotbꞌir turu y que majax tacar e bꞌujc xeꞌ bꞌacꞌar ani ucuerpo e Jesús tamar. 8 Y nacpat era ochoy e ajcanuar xeꞌ cꞌotoy bꞌajxan tama e chꞌen. Y uwira tunor era y cay cꞌupseyan tama e Jesús que jaxir sutpa bꞌixcꞌa tujam e chamenobꞌ. 9 Pues tama e hora era machito unatobꞌ tucꞌa war che uyojroner e Dios tiaꞌ che que e Jesús cꞌani asutpa abꞌixcꞌa tujam e chamenobꞌ. 10 Entonces sutpa ixiobꞌ esto tama uyototobꞌ otronyajr.

11 Pero e María xeꞌ tuaꞌ e chinam Magdala quetpa wawan patir tutiꞌ e chꞌen era, war aꞌru. Y conda warto aꞌru pacwan uchꞌujcu macuir e chꞌen. 12 Y uwira que ayan chateꞌ ángel xeꞌ sacsac ut ubꞌujcobꞌ, y uwira que turobꞌ tiaꞌ chꞌar ani ucuerpo e Jesús: inteꞌ tiaꞌ chꞌar ani ujor y otronteꞌ tiaꞌ aquetpa ani unuc uyoc. 13 Entonces ojronobꞌ e angelobꞌ y chenobꞌ:

—Ixic, ¿tucꞌa tuaꞌ war iyaru? che e angelobꞌ.

Y che e María:

—Pues umen que qꞌuejcha ixin Niwinquirar, y machi innata tiaꞌ ixin chꞌabꞌna, che e María.

14 Y wacchetaca sutpa eron tupat y uwira ut e Jesús, pero machi unata jay jax e Jesús era. 15 Entonces e Jesús uyubꞌi tuaꞌ e María y che:

—Ixic, ¿tucꞌa tuaꞌ war iyaru? Y ¿chi war asajca? che e Jesús.

Pues e María uchebꞌe que e Jesús jax e ajcojc huerto. Y tamar era uyare y che:

—¿O net ca xeꞌ aqꞌueche ixin ucuerpo e Jesús? Arenen tiaꞌ ixiet achꞌabꞌu tuaꞌ erer inxin impojro tuaꞌ inqꞌueche axin, che e María.

16 Entonces ojron e Jesús y che:

—María, che e Jesús.

Y wacchetaca e María sutpa uwira e Jesús y ojron tama e ojroner hebreo y che:

—Raboni, che e María.

Pues e ojroner raboni war che Niwajcanseyajet. 17 Y che e Jesús:

—Actanen era. Irix ameqꞌuen más era, porque merato inxin tut Nitata. Pero quiqui aren tunor niwermanuobꞌ que nen cꞌani intꞌabꞌay inxin tut Nitata xeꞌ jax Itata nox ubꞌan, y tut Nidiosir xeꞌ jax Idiosir nox ubꞌan, che e Jesús.

18 Entonces e María xeꞌ tuaꞌ e chinam Magdala ixin tuaꞌ uyare uyajcanuarobꞌ e Jesús que uwira ut Cawinquirar y uchecsu tutobꞌ tunor lo que arobꞌna umener.

19 Pues entonces tama e día era xeꞌ jax inteꞌ día domingo conda war acbꞌare, ya morojsebꞌir turobꞌ uyajcanuarobꞌ e Jesús tama inteꞌ otot tiaꞌ umaqui ubꞌobꞌ umen que war ubꞌacriobꞌ e gente tuaꞌ e Israel. Y wacchetaca checta wawan e Jesús tujamobꞌ y che:

—Chꞌamic e jiriar, che e Jesús.

20 Y conda cꞌapa ojron cocha era e Jesús cay uwirse ucꞌabꞌ y uchejchec tiaꞌ xejcꞌa. Y conda uyajcanuarobꞌ uwirobꞌ tunor era tzayobꞌ meyra porque uwirobꞌ ut Cawinquirar. 21 Entonces ojron e Jesús otronyajr y che:

—Chꞌamic e jiriar. Bꞌan cocha Nitata uyebꞌta tarien, y bꞌan ixto nen war inwebꞌtox ixixin ubꞌan tuaꞌ ichecsu niwojroner tut tunor e gente tara tor e rum, che e Jesús.

22 Y de allí uyujta umusic tamarobꞌ y che:

—Chꞌamic Unawalir e Dios. 23 Inwajcꞌox e cꞌotorer tuaꞌ iware e gente que: “Cꞌumpix e Dios tacarox tama tunor imabꞌambꞌanir.” Pues conda iware cocha era Cadiosir axin ixto acꞌumpa tacarobꞌ. Y inwajcꞌox e cꞌotorer ubꞌan tuaꞌ iware e gente que machito war acꞌumpa e Dios tacarobꞌ tamar e mabꞌambꞌanir lo que cay uchiobꞌ. Y conda iware cocha era war che que aquetpato tama ujorobꞌ e mabꞌambꞌanir lo que cay uchiobꞌ, che e Jesús.

24 Pues entonces e Tomás xeꞌ arobꞌna Cuach xeꞌ jax inteꞌ tujam e once ajcanuarobꞌ machi turu conda checta e Jesús tujam e inmojr era tama inteꞌ acbꞌar. 25 Pero e inmojr ajcanuarobꞌ uyareobꞌ e Tomás y chenobꞌ:

—Non cawira ut Cawinquirar, che e ajcanuarobꞌ era.

Pero e Tomás che:

—Jay machi inwira uchꞌenar e clavo tama ucꞌabꞌ machi tuaꞌ incꞌupse. Y jay machi onse nicꞌabꞌ tama uchꞌenar e clavo, y onse nicꞌabꞌ tama uchejchec, machi tuaꞌ incꞌupse, che e Tomás.

26 Entonces conda numuy ocho día sutpa umorojse ubꞌobꞌ uyajcanuarobꞌ e Jesús otronyajr tama inteꞌ otot. Y yixto turu e Tomás tacarobꞌ. Y macar e puerta tupatobꞌ conda wacchetaca checta wawan e Jesús tutobꞌ otronyajr y che:

—Chꞌamic e jiriar, che e Jesús.

27 Y wacchetaca uyare e Tomás y che:

—Chꞌujcun awira nicꞌabꞌ y osen or acꞌabꞌ tama uchꞌenar e clavo, y tares acꞌabꞌ era y osen tama nichejchec. Ira ache abꞌa que machi icꞌupseyan, sino que cꞌupsen que sutpa bꞌixqꞌuen, che e Jesús.

28 Entonces che e Tomás:

—Net jax Niwinquiraret y jax Nidiosiret, che e Tomás.

29 Y che e Jesús:

—Tomás, coner era war icꞌupseyan tamaren umen que awira niut. Pero más chojbꞌesbꞌir utobꞌ tin e axin acꞌupseyanobꞌ tamaren motor que ma tiaꞌ uwirenobꞌ, che e Jesús.

30 Pues entonces ayan meyra sian milagro xeꞌ cay uche e Jesús tut uyajcanuarobꞌ que majax tzꞌijbꞌabꞌir tama e jun era. 31 Pero tunor e sian milagro lo que tzꞌijbꞌabꞌir tama e jun era, tzꞌijbꞌabꞌir tuaꞌ erer ixcꞌupseyan tama e Jesús xeꞌ jax e Cristo xeꞌ jax Uyunen e Dios. Y tunor tin e acꞌotoy acꞌupseyanobꞌ tamar ucꞌabꞌa e Jesús era axin uchꞌamiobꞌ e cuxtar xeꞌ machi tuaꞌ acꞌapa.