1 Pues e Jonás machi tzay tamar lo que uche e Dios, y tamar era qꞌuijna meyra. 2 Y war aqꞌuecran cay uyare e Dios cocha era y che:

—O Niwinquiraret Dios, jax era lo que cay imbꞌijnu que bꞌan tuaꞌ ache conda turento tama nilugar, y tamar era locꞌoy ajnien tuaꞌ inxin esto tama e lugar Tarsis. Pues cocha nen warix innata que net incꞌun awirnar, y que machi iqꞌuijna wacchetaca y que nojta acꞌunersiaj tut tunor e gente tara tor e rum y que tamar era conda aware que cꞌani awebꞌta inteꞌ nuxi jatzꞌuar tama ujor e gente tama e chinam era, innata que cꞌani isutpa abꞌijnu otronyajr tuaꞌ machi acꞌapa asati tunorobꞌ. 3 Y tamar era, Niwinquiraret Dios, inwaret tuaꞌ alocse nicuxtar. Taniut nen más ani bueno tuaꞌ intaca inchamay y que machi ixto tuaꞌ inturuan, che e Jonás.

4 Entonces Cawinquirar Dios sutpa ojron taca e Jonás otronyajr y che:

—Jonás, pues majax bueno tuaꞌ iqꞌuijna tama tunor era, che Cawinquirar Dios.

5 Entonces e Jonás locꞌoy tama e chinam y ixin turuan tut e rum tama e lugar tiaꞌ atobꞌoy watar e qꞌuin. Y yajaꞌ taca uche inteꞌ chuchuꞌ champa y turuan tamar, war achꞌujcsan tuaꞌ uwira tucꞌa tuaꞌ anumuy tama e chinam Nínive, jay cꞌanto atijresna umen e Dios conda acꞌapa e cuarenta día era.

6 Y de allí Cawinquirar Dios uche cuxpa inteꞌ chꞌan xeꞌ nojta uyopor xeꞌ chꞌi wacchetaca tuyejtzꞌer yer uchampa e Jonás, y jaxir cay turuan yebꞌar usombrir e chꞌan tuaꞌ machi apurutna umen e qꞌuin, y tamar era cay tzay meyra e Jonás que chꞌi yer e chꞌan era.

7 Pero conda sacojpa tama otronteꞌ día Cawinquirar Dios uche locꞌoy incojt ubꞌiꞌ xeꞌ cay ucꞌuxi e chꞌan y tamar era taqui. 8 Y conda tobꞌoy locꞌoy e qꞌuin e Dios uyebꞌta tari inteꞌ nuxi icꞌar xeꞌ apurutsan xeꞌ tari tiaꞌ atobꞌoy watar e qꞌuin, y cay purutna ujor e Jonás umen e qꞌuin y jaxir cay jayjayran umen e qꞌuin, y tamar era cay ubꞌijnu que cꞌanix achamay otronyajr. Entonces ojron jax taca y che:

—Pues taniut nen más ani bueno tuaꞌ inchamay, che e Jonás.

9 Entonces sutpa ojron e Dios otronyajr y che:

—O ¿war ca iqꞌuijna tamar taca que taqui e chꞌan? che e Dios. Entonces ojron e Jonás otronyajr y che:

—Bꞌan yaꞌ. War inqꞌuijna meyra este que cꞌanix inchamay, che e Jonás.

10 Entonces ojron Cawinquirar Dios otronyajr y che:

—Pues majax net xeꞌ apaqꞌui e chꞌan era, y nien majax net xeꞌ ache aꞌchꞌi. Pues tamar taca inteꞌ acbꞌar cuxpa, y tama otronteꞌ acbꞌar taqui. Pues net war ayajta ut yer e chꞌan xeꞌ taqui, y net abꞌijnu que ucꞌani ani tuaꞌ incorpes. 11 Y nen, ¿machi ca erer inyajta ut tin e turobꞌ tama e nuxi chinam Nínive tuaꞌ incorpesobꞌ jay bꞌan imbꞌijnu inche? Pues jax inteꞌ nuxi chinam tiaꞌ ayan más que 120,000 maxtac xeꞌ machito unatobꞌ tin unojcꞌabꞌ y tin utzꞌejcꞌabꞌ. Y ayan meyra aracꞌobꞌ tama e chinam era ubꞌan, che e Dios uyare e Jonás.

Tara acꞌapa tunor niwojroner, che e Jonás.