1 Pues tama inyajr e Jesús cay umorojse e doce uyajcanuarobꞌ y cay uyajcꞌu ucꞌotorer tuaꞌ uyajnes axin tunor e mabꞌambꞌan mein y tuaꞌ utzꞌacpes tunor tin e ajmuac. 2 Y war uyebꞌta axiobꞌ uyajcanuarobꞌ tuaꞌ uchecsuobꞌ uyojroner e Dios tama uchinam e Dios tut e gente axin y tuaꞌ utzꞌacpesobꞌ tunor tin e ajmuac. 3 Y e Jesús uyare e doce uyajcanuarobꞌ y che:

—Matucꞌa tuaꞌ iqꞌueche axin conda ixixin tama e bꞌir. Ira iqꞌueche axin inteꞌ iteꞌ tuaꞌ ixbꞌoyo tamar, y nien imucuc machi tuaꞌ iqꞌueche axin, y nien e pan, y nien itumin, y ma erer iqꞌueche axin chateꞌ ibꞌujc. 4 Y tic taca tiaꞌ ixcꞌotoy tama ingojr otot, quetpenic yajaꞌ este que ixlocꞌoy tama e lugar yajaꞌ. 5 Y tiaꞌ machi cꞌani uchꞌamiox, loqꞌuenic quiquic tama e chinam era y tijtinic e tanlum tama iyoc tuaꞌ unatobꞌ e gente era que mabꞌambꞌan lo que war uchiobꞌ que machi cꞌani uyubꞌiobꞌ uyojroner e Dios, che e Jesús.

6 Entonces locꞌoyobꞌ e doce uyajcanuarobꞌ y ixiobꞌ tama inteꞌ inteꞌ aldea, war uchecsuobꞌ uyojroner e Dios tama e corpesiaj tut e gente axin y war utzꞌacpesobꞌ tin e ajmuac.

7 Pues entonces conda e Herodes xeꞌ jax gobernador tama e departamento Galilea cꞌotoy unata tunor lo que war uche e Jesús, machi unata tucꞌa tuaꞌ ubꞌijnu porque ayan tin e chenobꞌ que jax e Juan xeꞌ ajchꞌuymar xeꞌ sutpa bꞌixcꞌa. 8 Y ayan tin e chenobꞌ que sutpa checta e profeta Elías xeꞌ turuan tama e onian tiempo. Y ayan tin e chenobꞌ que sutpa bꞌixcꞌa inteꞌ profeta xeꞌ turuan tama e onian tiempo. 9 Pero e Herodes che:

—Nen inwarix tuaꞌ axujra alocꞌoy ujor e Juan, pero ¿chito ca nic era, que nen warto umbꞌi acꞌajna ucꞌabꞌa? che e Herodes.

Y war usajca cocha tuaꞌ uwira ut e Jesús.

10 Pues entonces sutpa tariobꞌ e doce apostolobꞌ y cay uyareobꞌ e Jesús tunor lo que numuy. Entonces e Jesús uqꞌueche ixiobꞌ tama inteꞌ choquem lugar xeꞌ majax innajt tut e chinam Betsaida. 11 Pero ayan cora sian gente xeꞌ cꞌotoy unatobꞌ tiaꞌ ixin e Jesús, y tamar era ixiobꞌ tupat ubꞌan. Y conda cꞌotoyobꞌ tiaꞌ turu e Jesús, jaxir atzay uchꞌamiobꞌ y cay uchecsu tutobꞌ tunor uchinam e Dios y cay utzꞌacpes tin e ajmuac. 12 Y conda e doce apostolobꞌ cay uwirobꞌ que cꞌanix acbꞌare, uyareobꞌ e Jesús y che:

—Cꞌanix acbꞌare y mix tucꞌa e ototobꞌ tara tiaꞌ erer utajwiobꞌ tucꞌa tuaꞌ ucꞌuxiobꞌ tunor e sian gente era. Actan chicobꞌ tuaꞌ axiobꞌ ajiriobꞌ y tuaꞌ awiobꞌ tama inteꞌ aldea o tama inteꞌ lugar xeꞌ majax innajt ticoit, che e apostolobꞌ.

13 Pero e Jesús che:

—Wesenic nox, che e Jesús.

Y che e apostolobꞌ:

—Pero matucꞌa ayan tara, ajrer taca cinco ut pan y chacojt chay. O ¿acꞌani ca tuaꞌ caxin camani e comida tuaꞌ cawese e sian gente era? che e apostolobꞌ.

14 Y ayan meyra sian gente era este 5,000 winicobꞌ, pero e Jesús uyare uyajcanuarobꞌ y che:

—Arenic e sian gente era tuaꞌ aturuanobꞌ intzujc intzujc de a cincuenta, che e Jesús.

15 Y bꞌan uchiobꞌ y turuanobꞌ tunorobꞌ. 16 Entonces e Jesús uchꞌami e cinco ut pan y chacojt chay tama ucꞌabꞌ y sutpa uwira tut e qꞌuin tichan y cay ucꞌajti taca e Dios y uyajcꞌu gracias tama e comida era y cay ucꞌajti que e pan y e chay axin abꞌoro. Y de allí cay uyajcꞌu uyajcanuarobꞌ tuaꞌ uxeriobꞌ taca e sian gente. Y conda war uxeriobꞌ e comida más abꞌoro axin. 17 Y tunor e gente wiobꞌ y chuanobꞌ, y nacpat era umorojsiobꞌ doce chiquiꞌ tamar lo que quetpato.

18 Pues tama inyajr e Jesús war ucꞌajti taca e Dios ubꞌajner y ya turobꞌ uyajcanuarobꞌ tacar ubꞌan. Entonces sutpa uyubꞌi tuobꞌ y che:

—¿Tucꞌa war che e gente tacaren? che e Jesús.

19 Y che uyajcanuarobꞌ:

—Ayan tin e war ubꞌijnuobꞌ que net jax e Juan xeꞌ ajchꞌuymar, y ayan tin e war ubꞌijnu que net jax e profeta Elías, y ayan tin e war ubꞌijnu que net jax inteꞌ onian profeta xeꞌ sutpa bꞌixcꞌa, che uyajcanuarobꞌ.

20 Entonces e Jesús sutpa uyubꞌi tuobꞌ y che:

—Y nox, ¿tucꞌa iware tamaren? che e Jesús.

Y e Pedro che:

—Net jax e Cristo xeꞌ ebꞌetna tariet umen e Dios tuaꞌ acorpeson, che e Pedro.

21 Pues entonces e Jesús uyare uyajcanuarobꞌ y che:

—Ira iwirse e gente lo que cꞌani inwareox era. 22 Nen xeꞌ Uyunenen e winic ucꞌani tuaꞌ innumse nibꞌa meyra y ucꞌani tuaꞌ axejbꞌna niut umen e nuquir winicobꞌ tama e Israel y umen uwinquir e inmojr sacerdotiobꞌ, y ucꞌani tuaꞌ axejbꞌna niut umen e ajcanseyajobꞌ tama uley e Moisés. Jaxirobꞌ tuaꞌ uchamsenobꞌ pero tama e uxteꞌ día cꞌani insujta imbꞌixqꞌuesna tujam e chamenobꞌ, xeꞌ ojron e Jesús taca uyajcanuarobꞌ.

23 Y de allí cay ojron e Jesús taca tunor e inmojr gente era y che:

—Jay ayan tin e cꞌani axin tanipat, ucꞌani tuaꞌ unajpes ubꞌa y axin tanipat ejcꞌar ejcꞌar motor que axin achamesna ani tamaren. 24 Porque tin e cꞌani ucorpes ucuxtar cꞌani asatpa, pero tin e usati ucuxtar tamaren cꞌani acorpesna. 25 ¿Tucꞌa ucꞌampibꞌir tut inteꞌ winic jay axin uchꞌami tunor lo que ayan tara tor e rum jay tamar era axin usati uyalma? 26 Y jay ayan tin e axin asubꞌajra tamaren y tamar niwojroner, nen xeꞌ Uyunenen e winic cꞌani insubꞌajra tamar jaxir ubꞌan conda waten tuaꞌ incꞌotori taca tunor utawarer Nitata y taca utawarer tunor e angelobꞌ xeꞌ erach. 27 Y inwareox coner que ayan tin e turox tara que machi tuaꞌ ixchamay este que iwiren waten taca ucꞌotorer e Dios, che e Jesús

28 Pues entonces conda cꞌapa numuy ocho día desde que e Jesús ojron cocha era, ixin tꞌabꞌay tujor inteꞌ witzir tuaꞌ ucꞌajti taca e Dios, y ixin ubꞌan e Pedro y e Santiago y e Juan. 29 Y conda e Jesús war ucꞌajti taca e Dios, sutpa intiach uwirnar, y ubꞌujc sutpa sacsac este que ejpray ut. 30 Y wacchetaca checta chateꞌ winicobꞌ; inteꞌ jax e Moisés y otronteꞌ jax e Elías. Y war oꞌjronobꞌ taca e Jesús. 31 Y war ejpray xojyna e winicobꞌ era umen utawarer e Dios, y cay ojronobꞌ taca e Jesús tamar e cꞌuxner lo que aquetpa tuaꞌ unumse ubꞌa conda axin achamay tama e chinam Jerusalem. 32 Y motor que e Pedro y upiarobꞌ jajpnobꞌ meyra umen e waynij pero machi wayanobꞌ, y tamar era uwirobꞌ utawarer e Jesús y uwirobꞌ utawarer e chateꞌ winicobꞌ era ubꞌan. 33 Entonces conda cay locꞌoyobꞌ e Moisés y e Elías, e Pedro uyare e Jesús y che:

—Cawajcanseyajet, catzay que turon tara tacaret. Cachenic uxteꞌ rancho, inteꞌ tabꞌa, y inteꞌ tuaꞌ e Moisés, y inteꞌ tuaꞌ e Elías, che e Pedro.

Pero e Pedro machi unata tucꞌa war oꞌjron. 34 Y conda wartocto oꞌjron e Pedro wacchetaca checta tari inteꞌ tocar xeꞌ ubꞌujcse tunor or e lugar era. Y conda cay uwirobꞌ macuir e tocar bꞌactobꞌ. 35 Y de allí cay uyubꞌiobꞌ inteꞌ nuc macuir e tocar xeꞌ ojron y che:

—Jaxto era Niunen xeꞌ inyajta ut, ubꞌinic lo que uyareox, che e nuc xeꞌ uyubꞌiobꞌ locꞌoy tama e tocar.

36 Pero conda cꞌapa ojron e nuc era, sutpa uwirobꞌ que ajtaca e Jesús war ubꞌajner. Pero uyajcanuarobꞌ quetpobꞌ tzꞌustaca, y mamajchi tacar ucꞌajtiobꞌ lo que uwirobꞌ era.

37 Entonces tama otronteꞌ día ecmay tariobꞌ tor e witzir, y conda ecmay utajwiobꞌ ubꞌobꞌ taca meyra gente. 38 Y ayan inteꞌ winic tujam e gente era xeꞌ cay ojron taca inteꞌ nuxi nuc y che:

—Cawajcanseyajet, yajtan ut yar niunen era, porque inteꞌ taca ayan tanibꞌa, 39 y jaxir chucur umen inteꞌ mabꞌambꞌan mein y achena aꞌru umener, y achamay achꞌan, y oꞌjmay uyar utiꞌ, y ucꞌuxi ut uyej, y utori ubꞌa iraj iraj, y machi cꞌani aꞌctana umen e mabꞌambꞌan mein era. 40 Y inwarix awajcanuarobꞌ tuaꞌ ulocsiobꞌ e mabꞌambꞌan mein pero machi obꞌnobꞌ, che utata e sitz era.

41 Y e Jesús uyare uyajcanuarobꞌ y che:

—Tzajtaca iut nox xeꞌ machi cꞌani ixcꞌupseyan tama e Dios porque warto ibꞌijnu tama e onian bꞌijnusiaj. ¿Cobꞌa tiempo tuaꞌ inquetpa tacarox y cobꞌa tiempo tuaꞌ innumse nibꞌa tama tunor lo que war iche? Tares e sitz yax, che e Jesús.

42 Pero conda e sitz war acꞌotoy tuyejtzꞌer e Jesús, wacarpa ixin tut e rum umen e mabꞌambꞌan mein y cay utori ubꞌa otronyajr. Pero e Jesús cay utzacre alocꞌoy e mabꞌambꞌan mein tama e sitz, y tamar era locꞌoy ajni e mabꞌambꞌan mein. Entonces cocha tzꞌacpesna e sitz sutpa ixin taca utata. 43 Y tunor e gente cay bꞌacta uwirobꞌ que nojta ucꞌotorer e Dios.

Entonces cay ojron e Jesús taca uyajcanuarobꞌ y che:

44 —Ubꞌinic lo que cꞌani inwareox era y ira inajpes; pues nen xeꞌ Uyunenen e winic ucꞌani tuaꞌ inqꞌuejcha inxin tuaꞌ inquetpa yebꞌar ucꞌabꞌobꞌ e winicobꞌ xeꞌ turobꞌ tara tor e rum, che e Jesús.

45 Pero uyajcanuarobꞌ machi unatobꞌ tucꞌa war aꞌrobꞌnobꞌ umen e Jesús, pues mucresbꞌir tunor era tutobꞌ umen e Dios, y tamar era ma chequer tutobꞌ. Y bꞌactobꞌ tuaꞌ ucꞌajtiobꞌ tuaꞌ e Jesús tuaꞌ uchectes tunor era tutobꞌ otronyajr.

46 Pues tama inyajr uyajcanuarobꞌ e Jesús cay bꞌiritiobꞌ jaxobꞌ taca que chi ca nic xeꞌ más ayan ucꞌampibꞌir tujamobꞌ. 47 Pero e Jesús war unata tucꞌa war ubꞌijnuobꞌ. Entonces uchꞌami inteꞌ yar chuchu sitz y uwabꞌu tuyejtzꞌerobꞌ 48 y che:

—Tin e uchꞌami inteꞌ yar chuchu sitz cocha era xeꞌ war acꞌupseyan tamaren, war uchꞌamien nen ubꞌan. Y tin e uchꞌamien nen, war uchꞌami tin e uyebꞌta tarien ubꞌan. Y tamar era tin e más chuchu tijam nox, jax xeꞌ más nojta tut e Dios, che e Jesús.

49 Pues tama inyajr conda e ajcanuarobꞌ turobꞌ taca e Jesús cay ojron e Juan y che:

—Niwinquiraret, catajwi cabꞌa taca inteꞌ winic xeꞌ war ucꞌampes acꞌabꞌa tuaꞌ utzacre alocꞌoy inteꞌ mabꞌambꞌan mein, pero machi cacꞌani y caware que ma erer ucꞌampes acꞌabꞌa cocha jaxir machi war axana tacaron, che e Juan.

50 Pero e Jesús che:

—Ira iware e winicobꞌ que ma erer ucꞌampesobꞌ nicꞌabꞌa, porque tin e machi war aqꞌuijna uwiron jax capiar ubꞌan, che e Jesús.

51 Pues conda warix acꞌotoy e día conda aquetpa tuaꞌ atꞌabꞌay axin e Jesús tut e qꞌuin, cay uyare uyajcanuarobꞌ y che:

—Nen ucꞌani ixto tuaꞌ inxin esto tama e chinam Jerusalem, che e Jesús.

52 Entonces e Jesús uyebꞌta ixin bꞌajxan cora winicobꞌ esto tama inteꞌ aldea tama e departamento Samaria tuaꞌ usajcobꞌ tiaꞌ tuaꞌ awayanobꞌ y tiaꞌ tuaꞌ awesenobꞌ. 53 Pero conda e gente xeꞌ turobꞌ tama e aldea era cꞌotoy unatobꞌ que war axiobꞌ esto tama e chinam Jerusalem, qꞌuijnobꞌ y machi acꞌajnobꞌ. 54 Pero conda natanwa tunor era umen uyajcanuarobꞌ e Jesús xeꞌ jax e Santiago y e Juan, cay uyareobꞌ e Jesús y chenobꞌ:

—Cawinquiraret, ¿Acꞌani ca tuaꞌ caware eꞌcmay watar e cꞌajc tichan tut e qꞌuin tuaꞌ acꞌaxi tama ujorobꞌ tuaꞌ acꞌapesnobꞌ umen e cꞌajc era bꞌan cocha cay uche e profeta Elías tama e onian tiempo? che e Santiago y e Juan.

55 Pero sutpa irna utobꞌ umen e Jesús xeꞌ cay ucꞌaye y che:

—Nox machi war inata tucꞌa mein xeꞌ war ubꞌijres ijor. 56 Porque nen xeꞌ Uyunenen e winic machi ebꞌetna tarien tuaꞌ insati e winicobꞌ axin, sino que tuaꞌ incorpesobꞌ, che e Jesús.

Entonces locꞌoy ixiobꞌ esto tama otronteꞌ aldea.

57 Entonces conda war axanobꞌ tama inteꞌ bꞌir, cꞌotoy inteꞌ winic tut e Jesús y che:

—Niwinquiraret, cꞌani inxin tacaret tic taca tiaꞌ iꞌxin, che e winic.

58 Y e Jesús uyare e winic y che:

—E chꞌajch ayan uchꞌen tiaꞌ tuaꞌ awayan, y e mut ayan usijc tiaꞌ tuaꞌ apacwan awayan, pero nen xeꞌ Uyunenen e winic ma tiaꞌ tuaꞌ inchꞌabꞌu nijor tuaꞌ inwayan, che e Jesús.

59 Y e Jesús uyare otronteꞌ winic y che:

—Lar tacaren, che e Jesús.

Pero e winic che:

—Niwinquiret, actanento tuaꞌ inxin incojco nitata este que axin achamay, y de allí waten tacaret, che e winic.

60 Pero e Jesús uyare e winic otronyajr y che:

—Actan tin e chamen turu tama uyalma tuaꞌ axin umuqui tin e war achamay, pero net, quiqui chectes tut e gente tic taca cocha tuaꞌ oꞌchoyobꞌ tama uchinam e Dios, che e Jesús.

61 Y cꞌotoy otronteꞌ winic xeꞌ upejca e Jesús y che:

—Niwinquiret, cꞌani inxin tacaret pero actanento tuaꞌ inxin tama niotot tuaꞌ inware nitata y nituꞌ y tunor nipiarobꞌ tucꞌa war inche era tuaꞌ machi ubꞌijnuobꞌ que ¿tiaꞌ ixien? che e winic.

62 Entonces e Jesús uyare e winic era y che:

—Tunor tin e war apatnobꞌ war uwirobꞌ tuaꞌ unatobꞌ jay war alocꞌoy imbꞌutz tunor upatnar. Pero jay war apatna inteꞌ winic y war achꞌujcsan tupat, machi tuaꞌ alocꞌoy imbꞌutz upatnar. Y bꞌan ubꞌan tin cꞌani oꞌchoy tama uchinam e Dios. Conda acay axana tama ubꞌir e Dios, jay warto uwira tupat tuaꞌ ubꞌijnu uche e mabꞌambꞌanir otronyajr, machi tuaꞌ oꞌchoy tama uchinam e Dios, che e Jesús.