1 A vin̈aj Hiram sreyal Tiro, ix yac'cot schecab' vin̈ d'a vin̈aj rey David. Ix yac'anpaxcot eb' albañil vin̈ yed' eb' n̈icum te', ix yic'ancot te' c'ute' eb' yic sb'ochaj spalacio vin̈aj rey David chi'. 2 Yuj chi' ix nachajel yuj vin̈aj rey David chi' to a Jehová ix ac'anoch vin̈ reyal d'a chon̈ab' Israel. Ix ic'jichaan̈ yopisio vin̈ yuj Jehová yujto xajan chon̈ab' Israel yuuj.

3 Ay juntzan̈xo eb' ix yetb'eyum vin̈aj rey David ix yic' d'a Jerusalén, yuj chi' ayto yuninal vin̈ yed' yisil ix alji yed' eb' ix. 4 A eb' vin̈ yuninal vin̈ ix alji d'a Jerusalén chi', aton vin̈aj Samúa, vin̈aj Sobab, vin̈aj Natán, vin̈aj Salomón, 5 vin̈aj Ibhar, vin̈aj Elisúa, vin̈aj Elpelet, 6 vin̈aj Noga, vin̈aj Nefeg, vin̈aj Jafía, 7 vin̈aj Elisama, vin̈aj Beeliada yed' vin̈aj Elifelet.

8 Ayic ix yab'an eb' filisteo to toxo ix och vin̈aj David sreyaloc masanil eb' israel, ix och ijan eb' sayan tas tz'aj yac'an ganar, palta elan̈chamel ix yab' vin̈, ix elta vin̈ d'a yichan̈ eb' chi'. 9 Ix javi eb' filisteo chi' yac' chucal d'a eb' anima cajan d'a sch'olanil Refaim. 10 Yuj chi' ix sc'anb'ej vin̈aj rey David d'a Dios icha tic:

—¿Tzam yal vac'an oval yed' eb' filisteo tic? ¿Ol am ac'och eb' d'a yol in c'ab'? xchi vin̈.

Ix tac'vi Jehová d'a vin̈:

—Ac' oval yed' eb', yujto ol vac'och eb' d'a yol a c'ab', xchi.

11 Yuj chi' ix q'ue vin̈aj rey David b'aj ayec' eb' filisteo chi'. Ata' ix ac'ji ganar eb' yuj vin̈. Ix yalan vin̈ icha tic: Icha val tz'aj sjacan sb'e junoc a' eluma', icha chi' ix aj sjacan b'e Jehová d'ayin d'a scal eb' vajc'ool, xchi vin̈. Yuj chi' Baal-perazim ix yac' vin̈ sb'iej jun lugar chi'.14.11Il nota d'a 2 Samuel 5.20. 12 Ix yactejcan juntzan̈ sdiosal eb' filisteo chi', yuj chi' ix schec vin̈aj rey David chi' n̈usjoctz'aoc.

13 Palta a eb' filisteo chi', ix jaxxi eb' d'a sch'olanil yic Refaim chi'. 14 Yuj chi', ix sc'anb'ejxi vin̈aj rey David chi' d'a Dios, ix yalan Dios d'a vin̈ icha tic:

—A ticnaic, man̈ ach och d'a sat eb' ac'an oval, palta to a d'a spatic eb' tzach coti, b'aj ay te' bálsamo. 15 Ayic ol ab'ani ichato ay mach van sb'eyec' d'a sc'ab'tac te te' chi', tzach och ac' oval yed' eb'. A jun chi' syalelc'ochi to a in ol in b'ab'laj d'a eyichan̈ yic tzin milancham eb' soldado filisteo chi', xchi Jehová.

16 Icha ix aj yalan Dios, icha val chi' ix yutej vin̈aj David chi', yuj chi' ix satel eb' soldado filisteo chi', ix b'atn̈ej d'a Gabaón masanto ix c'och d'a Gezer. 17 Icha val chi' ix aj sq'uechaan̈ sb'inajnaquil vin̈aj rey David d'a masanil nación. A Jehová ix ac'an xivq'ue masanil nación chi' d'a vin̈.