1 A vin̈aj Josafat chi', ix te aj sb'eyumal vin̈, ix te b'inaj vin̈. Axo ix yisil vin̈aj Acab sreyal Israel ix och yalib'oc vin̈.

2 Ix ec' jaye' ab'il, ix b'at vin̈ d'a Samaria yil vin̈aj Acab chi'. Tzijtum noc' calnel yed' noc' vacax ix schec vin̈aj Acab chi' miljocchamoc yic tz'och q'uin̈ yujto ix c'och vin̈aj Josafat yed' eb' ajun yed'oc. Ix yalan vin̈aj Acab chi' d'a vin̈ to tz'och vin̈ yed' vin̈ yic syac'an oval vin̈ yed' chon̈ab' Ramot d'a yol yic Galaad. 3 Ix yalan vin̈aj Acab chi' d'a vin̈aj Josafat chi' icha tic:

—¿Mamax yal a c'ol tzach och ved'oc yic scac'an oval d'a chon̈ab' Ramot d'a yol yic Galaad? xchi vin̈.

Ix tac'vi vin̈aj Josafat chi':

—A in tic ol in b'at ed'oc yed' masanil eb' vin̈ in soldado d'a oval chi'. 4 Palta ayic manto on̈ b'ati, co c'anb'ej tas xchi Jehová, xchi vin̈.

5 Yuj chi' ix schec vin̈ sreyal Israel chi' molb'aj masanil eb' vin̈ syaloch sb'a schecab'oc Dios, 400 sb'isul eb' vin̈ smasanil. Ix sc'anb'an vin̈ d'a eb' vin̈ icha tic:

—¿Tzam cac' oval d'a Ramot d'a yol yic Galaad, ma to maay? xchi vin̈.

Ix tac'vi eb' vin̈ d'a vin̈ icha tic:

—Ac' oval chi', yujto a Dios ol ac'anoch d'a yol a c'ab', xchi eb' vin̈.

6 Palta ix yalan vin̈aj Josafat chi' icha tic:

—¿Mama junoc vin̈ schecab' Jehová d'a tic yic sco c'anb'ej pax d'a vin̈? xchi vin̈.

7 Ix tac'vi vin̈ sreyal Israel chi' d'a vin̈ icha tic:

—Ay jun vin̈ d'a tic, syal sc'anb'an vin̈ d'a Jehová cuuj, aton vin̈aj Micaías yuninal vin̈aj Imla. Palta tzin chac val jun vinac chi', yujto malaj juneloc ay jab'oc tas vach' syal vin̈ d'ayin, chucn̈ej tas syal vin̈, xchi vin̈. Palta ix yalanxi vin̈aj Josafat chi':

—Man̈ al jun chi', xchi vin̈.

8 Ix lajvi chi', ix yavtancot jun vin̈ schecab' vin̈ sreyal Israel chi', ix yalan vin̈ d'a vin̈:

—B'at avtejcot vin̈aj Micaías yuninal vin̈aj Imla d'a elan̈chamel, xchi vin̈.

9 A eb' vin̈ rey chi' schavan̈il, ayoch spichul eb' vin̈ yic sreyal yuuj, c'ojanem eb' vin̈ d'a sc'ojnub' b'aj tz'ochc'och anima d'a yol chon̈ab' Samaria. Ayec' masanil eb' vin̈ syaloch sb'a schecab'oc Dios chi' d'a yichan̈ eb' vin̈. 10 A vin̈aj Sedequías yuninal vin̈aj Quenaana, ay juntzan̈ q'ueen icha noc' ch'aac ix sb'o vin̈, te chaan̈ ix yal vin̈ icha tic: A Jehová tz'alan icha tic: A yed' juntzan̈ ch'aac tic ol ac' oval yed' eb' sirio, masanto ol lajvoquel eb' smasanil, xchi vin̈ d'a vin̈aj Acab chi'.

11 Ix yalanpax masanil eb' vin̈ syaloch sb'a checab'oc Dios chi' d'a vin̈ rey chi' icha tic: Ochan̈ ac' oval yed' Ramot d'a yol yic Galaad chi', ol ac' ganar, yujto a Jehová ol ac'anoch d'a yol a c'ab', xchi eb' vin̈.

12 A vin̈ checab' ix b'at avtancot vin̈aj Micaías chi', ix yal vin̈ d'a vin̈aj Micaías chi' icha tic:

—Masanil eb' vin̈ schecab' Dios, vach'n̈ej ix yutej eb' vin̈ yalan d'a vin̈ rey chi'. Yuj chi' sval d'ayach, icha ix yutej eb' vin̈ yalan chi', icha pax chi' tzutej alani, vach'n̈ej ol utej alani, xchi vin̈.

13 Ix tac'vi vin̈aj Micaías chi' icha tic:

—Svac' in ti' d'a Jehová to an̈ej tas ol yal d'ayin, a' ol vala', xchi vin̈.

14 Ix c'och vin̈aj Micaías chi' d'a yichan̈ vin̈ rey chi', ix sc'anb'an vin̈ rey chi' d'a vin̈ icha tic:

—Micaías ¿tzam yal cac'an oval yed' chon̈ab' Ramot d'a yol yic Galaad, mato maay? xchi vin̈.

Ix stz'acan yal vin̈aj Micaías chi' icha tic:

—Ixic ac' oval chi', ol ac' ganar, yujto ol ac'chajoch jun chon̈ab' chi' d'a yol a c'ab', xchi vin̈.

15 Palta ix yalan vin̈ rey chi' icha tic:

—Tzijtum elxo ix val d'ayach to tzac' a ti' to an̈ej tas yel tzal d'ayin d'a sb'i Jehová, xchi vin̈.

16 Ix yalan vin̈aj Micaías chi' icha tic:

17 Yuj chi' ix yal vin̈ sreyal Israel chi' d'a vin̈aj Josafat chi' icha tic:

—Inaton val sval d'ayach, to a jun vinac tic malaj b'aj syal jab'oc tas vach' vin̈ d'ayin, te chucn̈ej tas syal vin̈, xchi vin̈.

18 Ix yalanxi vin̈aj Micaías chi' icha tic:

—Ab' val tas syal Jehová d'ayach: Ix vila' c'ojanem Jehová d'a sdespacho, masanil eb' ángel d'a satchaan̈ lin̈jab'och d'a spatic yichan̈. 19 Ix sc'anb'an Jehová chi' icha tic: ¿Mach sb'at iptzitan vin̈aj Acab sreyal Israel, yic sb'at yac'an oval vin̈ yed' chon̈ab' Ramot d'a yol yic Galaad, yic schamcan vin̈ ta'? xchi Jehová chi'. Ch'oc tas syal juntzan̈ eb', ch'oc pax tas syal juntzan̈xo eb'. 20 Palta ay jun espíritu ix och d'a yichan̈ Jehová, ix yalan icha tic: Ol in b'at vac' sc'ulej vin̈ rey chi', xchi. Ix sc'anb'an Jehová chi' d'ay tas ol yutej. 21 Ix yalan icha tic: Masanil eb' vin̈ syaloch sb'a a checab'oc, ol vac' yac' es eb' vin̈ d'a vin̈ rey chi', xchi. Ix yalan Jehová chi' d'ay icha tic: Ol yal uj icha chi', ixic, b'at c'ulej icha tzal chi', xchi d'ay. 22 A ticnaic jun, ojtaquejeli to a Jehová ix chaan sc'ulej eb' vin̈ syaloch sb'a schecab'oc tic yic junn̈ej syutej eb' vin̈ yac'an es d'ayach, icha chi' ol aj scotcan chamel d'a ib'an̈, xchi vin̈aj Micaías chi'.

23 Yuj chi' ix snitzancot sb'a vin̈aj Sedequías chi' ix stz'itanb'at sat vin̈aj Micaías chi' vin̈, ix yalan vin̈:

—A jun espíritu tz'esan ix cot d'a Jehová chi', ¿tas ix aj yel d'ayin, axo d'ayach sloloni? xchi vin̈.

24 Ix tac'vi vin̈aj Micaías chi' d'a vin̈ icha tic:

—Ol a nacot jun tic d'a jun c'u chi', aton yic toxon̈ej ol ach ec' tic ol ach ec' tic a say b'aj ol a c'ub'ejel a b'a, xchi vin̈.

25 Ix yalan vin̈ sreyal Israel chi' icha tic:

—Yamec vin̈aj Micaías tic, tzeyic'anb'at vin̈ d'a vin̈aj Amón yajal d'a chon̈ab' tic yed' d'a vin̈ vuninal aj Joás. 26 Tzeyalani to a in svala' to tz'och vin̈ d'a preso, jab'n̈ej tas tzeyac' sva vin̈ yed' tas syuq'uej vin̈, masanto ayic ol in meltzaj d'a tzalajc'olal, xchi vin̈.

27 Ixto yal jay b'elan̈xo vin̈aj Micaías chi' icha tic:

28 Ix b'at vin̈ sreyal Israel chi' yed' eb' soldado yed' vin̈aj Josafat sreyal Judá yed' eb' soldado yac' oval yed' chon̈ab' Ramot d'a yol yic Galaad chi'. 29 Ix yalan vin̈ sreyal Israel chi' d'a vin̈aj Josafat chi' icha tic:

—Ayic ol co yamanoch oval chi', ol in q'uexel in pichul yic in reyal tic, a achxo tic, ol ac'n̈ejcanoch a pichul yic a reyal chi', xchi vin̈.

Yuj chi' ix sq'uexel spichul vin̈ sreyal Israel chi', ix och eb' vin̈ yac' oval chi' schavan̈il. 30 Palta a vin̈ sreyal Siria, toxo ix yal vin̈ d'a eb' vin̈ sat yajal yaj d'a carruaje yic oval to max yac' oval eb' vin̈ yed' junocxo mach, palta an̈ej d'a vin̈ sreyal Israel b'aj tz'och eb' vin̈. 31 Ayic ix ilji vin̈aj Josafat yuj eb' vin̈ sat yajal yaj chi', a snaan eb' vin̈ to a vin̈ sreyal Israel chi', yuj chi' ix oymaj eb' vin̈ d'a spatic vin̈, yic syac'an oval eb' vin̈ yed' vin̈ yalani. Yuj chi', ix el yav vin̈, ix colji vin̈ yuj Jehová, ix ic'jiel eb' vin̈ yajal chi' yuj Jehová d'a vin̈. 32 Axo ix yilan eb' vin̈ to man̈oclaj vin̈ sreyal Israel chi', ix yactan eb' vin̈ syaman vin̈. 33 Palta ay jun vin̈ soldado comonn̈ej ix julvajb'ati, a val d'a vin̈ sreyal Israel chi' ix och sirnaj jun yol jul-lab' chi'. A val b'aj schalaj sb'a sq'ueen pichul vin̈ rey chi' ayochi, ata' ix och ch'apnaj jun yol jul-lab' chi'. Yuj chi' ix yal vin̈ d'a vin̈ ed'jinac carruaje chi' icha tic:

—Ic' meltzaj carruaje tic, tzin ic'anel d'a scal oval tic, yujto te nivan ix in aj in lajvi, xchi vin̈.

34 Te ov ix aj yoch oval d'a jun c'u chi', ixto stec'b'ej sb'a vin̈ sreyal Israel chi' scan tec'tec' d'a yol scarruaje ayic ayoch vin̈ d'a yichan̈ eb' sirio chi', masanto yic ix em c'u. Palta axo yic van sb'at pilnaj c'u, ix cham vin̈.